౧౪౦. ద్వేవాచికాదిపవారణా

౨౩౪. తేన ఖో పన సమయేన కోసలేసు జనపదే అఞ్ఞతరస్మిం ఆవాసే తదహు పవారణాయ సవరభయం అహోసి. భిక్ఖూ నాసక్ఖింసు తేవాచికం పవారేతుం. భగవతో ఏతమత్థం ఆరోచేసుం. అనుజానామి, భిక్ఖవే, ద్వేవాచికం పవారేతున్తి.

బాళ్హతరం సవరభయం అహోసి. భిక్ఖూ నాసక్ఖింసు ద్వేవాచికం పవారేతుం. భగవతో ఏతమత్థం ఆరోచేసుం. అనుజానామి, భిక్ఖవే, ఏకవాచికం పవారేతున్తి.

బాళ్హతరం సవరభయం అహోసి. భిక్ఖూ నాసక్ఖింసు ఏకవాచికం పవారేతుం. భగవతో ఏతమత్థం ఆరోచేసుం. అనుజానామి, భిక్ఖవే, సమానవస్సికం పవారేతున్తి.

తేన ఖో పన సమయేన అఞ్ఞతరస్మిం ఆవాసే తదహు పవారణాయ మనుస్సేహి దానం దేన్తేహి యేభుయ్యేన రత్తి ఖేపితా హోతి. అథ ఖో తేసం భిక్ఖూనం ఏతదహోసి – ‘‘మనుస్సేహి దానం దేన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతి. కథం ను ఖో అమ్హేహి పటిపజ్జితబ్బ’’న్తి? భగవతో ఏతమత్థం ఆరోచేసుం. ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ మనుస్సేహి దానం దేన్తేహి యేభుయ్యేన రత్తి ఖేపితా హోతి. తత్ర చే, భిక్ఖవే, భిక్ఖూనం ఏవం హోతి – ‘‘మనుస్సేహి దానం దేన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతీ’’తి, బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. మనుస్సేహి దానం దేన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతి. యది సఙ్ఘస్స పత్తకల్లం, సఙ్ఘో ద్వేవాచికం, ఏకవాచికం, సమానవస్సికం పవారేయ్యా’’తి.

ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ భిక్ఖూహి ధమ్మం భణన్తేహి…పే… సుత్తన్తికేహి సుత్తన్తం సఙ్గాయన్తేహి… వినయధరేహి వినయం వినిచ్ఛినన్తేహి… ధమ్మకథికేహి ధమ్మం సాకచ్ఛన్తేహి… భిక్ఖూహి కలహం కరోన్తేహి యేభుయ్యేన రత్తి ఖేపితా హోతి. తత్ర చే భిక్ఖూనం ఏవం హోతి – ‘‘భిక్ఖూహి కలహం కరోన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతీ’’తి, బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. భిక్ఖూహి కలహం కరోన్తేహి యేభుయ్యేన రత్తి ఖేపితా. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం రత్తి విభాయిస్సతి. యది సఙ్ఘస్స పత్తకల్లం, సఙ్ఘో ద్వేవాచికం, ఏకవాచికం, సమానవస్సికం పవారేయ్యా’’తి.

తేన ఖో పన సమయేన కోసలేసు జనపదే అఞ్ఞతరస్మిం ఆవాసే తదహు పవారణాయ మహాభిక్ఖుసఙ్ఘో సన్నిపతితో హోతి, పరిత్తఞ్చ అనోవస్సికం [అనోవస్సకం (క.)] హోతి, మహా చ మేఘో ఉగ్గతో హోతి. అథ ఖో తేసం భిక్ఖూనం ఏతదహోసి – ‘‘అయం ఖో మహాభిక్ఖుసఙ్ఘో సన్నిపతితో, పరిత్తఞ్చ అనోవస్సికం, మహా చ మేఘో ఉగ్గతో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం మేఘో పవస్సిస్సతి. కథం ను ఖో అమ్హేహి పటిపజ్జితబ్బ’’న్తి? భగవతో ఏతమత్థం ఆరోచేసుం. ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ మహాభిక్ఖుసఙ్ఘో సన్నిపతితో హోతి, పరిత్తఞ్చ అనోవస్సికం హోతి, మహా చ మేఘో ఉగ్గతో హోతి. తత్ర చే భిక్ఖూనం ఏవం హోతి – ‘‘అయం ఖో మహాభిక్ఖుసఙ్ఘో సన్నిపతితో, పరిత్తఞ్చ అనోవస్సికం, మహా చ మేఘో ఉగ్గతో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం మేఘో పవస్సిస్సతీ’’తి. బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. అయం మహాభిక్ఖుసఙ్ఘో సన్నిపతితో, పరిత్తఞ్చ అనోవస్సికం, మహా చ మేఘో ఉగ్గతో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం మేఘో పవస్సిస్సతి. యది సఙ్ఘస్స పత్తకల్లం, సఙ్ఘో ద్వేవాచికం, ఏకవాచికం, సమానవస్సికం పవారేయ్యా’’తి.

ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ రాజన్తరాయో హోతి…పే… చోరన్తరాయో హోతి… అగ్యన్తరాయో హోతి… ఉదకన్తరాయో హోతి… మనుస్సన్తరాయో హోతి… అమనుస్సన్తరాయో హోతి… వాళన్తరాయో హోతి… సరీసపన్తరాయో హోతి… జీవితన్తరాయో హోతి… బ్రహ్మచరియన్తరాయో హోతి. తత్ర చే భిక్ఖూనం ఏవం హోతి – ‘‘అయం ఖో, బ్రహ్మచరియన్తరాయో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం బ్రహ్మచరియన్తరాయో భవిస్సతీ’’తి, బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. అయం బ్రహ్మచరియన్తరాయో. సచే సఙ్ఘో తేవాచికం పవారేస్సతి, అప్పవారితోవ సఙ్ఘో భవిస్సతి, అథాయం బ్రహ్మచరియన్తరాయో భవిస్సతి. యది సఙ్ఘస్స పత్తకల్లం, సఙ్ఘో ద్వేవాచికం, ఏకవాచికం, సమానవస్సికం పవారేయ్యా’’తి.

ద్వేవాచికాదిపవారణా నిట్ఠితా.