౧౪౧. పవారణాఠపనం

౨౩౫. తేన ఖో పన సమయేన ఛబ్బగ్గియా భిక్ఖూ సాపత్తికా పవారేన్తి. భగవతో ఏతమత్థం ఆరోచేసుం. న, భిక్ఖవే, సాపత్తికేన పవారేతబ్బం. యో పవారేయ్య, ఆపత్తి దుక్కటస్స. అనుజానామి, భిక్ఖవే, యో సాపత్తికో పవారేతి, తస్స ఓకాసం కారాపేత్వా ఆపత్తియా చోదేతున్తి.

తేన ఖో పన సమయేన ఛబ్బగ్గియా భిక్ఖూ ఓకాసం కారాపియమానా న ఇచ్ఛన్తి ఓకాసం కాతుం. భగవతో ఏతమత్థం ఆరోచేసుం. అనుజానామి, భిక్ఖవే, ఓకాసం అకరోన్తస్స పవారణం ఠపేతుం. ఏవఞ్చ పన, భిక్ఖవే, ఠపేతబ్బా. తదహు పవారణాయ చాతుద్దసే వా పన్నరసే వా తస్మిం పుగ్గలే సమ్ముఖీభూతే సఙ్ఘమజ్ఝే ఉదాహరితబ్బం – ‘‘సుణాతు మే, భన్తే, సఙ్ఘో. ఇత్థన్నామో పుగ్గలో సాపత్తికో. తస్స పవారణం ఠపేమి. న తస్మిం సమ్ముఖీభూతే పవారేతబ్బ’’న్తి. ఠపితా హోతి పవారణాతి.

తేన ఖో పన సమయేన ఛబ్బగ్గియా భిక్ఖూ – పురమ్హాకం పేసలా భిక్ఖూ పవారణం ఠపేన్తీతి – పటికచ్చేవ సుద్ధానం భిక్ఖూనం అనాపత్తికానం అవత్థుస్మిం అకారణే పవారణం ఠపేన్తి, పవారితానమ్పి పవారణం ఠపేన్తి. భగవతో ఏతమత్థం ఆరోచేసుం. న, భిక్ఖవే, సుద్ధానం భిక్ఖూనం అనాపత్తికానం అవత్థుస్మిం అకారణే పవారణా ఠపేతబ్బా. యో ఠపేయ్య, ఆపత్తి దుక్కటస్స. న, భిక్ఖవే, పవారితానమ్పి పవారణా ఠపేతబ్బా. యో ఠపేయ్య, ఆపత్తి దుక్కటస్స.

౨౩౬. ఏవం ఖో, భిక్ఖవే, ఠపితా హోతి పవారణా, ఏవం అట్ఠపితా. కథఞ్చ, భిక్ఖవే, అట్ఠపితా హోతి పవారణా? తేవాచికాయ చే, భిక్ఖవే, పవారణాయ భాసితాయ లపితాయ పరియోసితాయ పవారణం ఠపేతి, అట్ఠపితా హోతి పవారణా. ద్వేవాచికాయ చే, భిక్ఖవే,… ఏకవాచికాయ చే, భిక్ఖవే,… సమానవస్సికాయ చే, భిక్ఖవే, పవారణాయ భాసితాయ లపితాయ పరియోసితాయ పవారణం ఠపేతి, అట్ఠపితా హోతి పవారణా. ఏవం ఖో, భిక్ఖవే, అట్ఠపితా హోతి పవారణా.

కథఞ్చ, భిక్ఖవే, ఠపితా హోతి పవారణా? తేవాచికాయ, చే, భిక్ఖవే, పవారణాయ భాసితాయ లపితాయ అపరియోసితాయ పవారణం ఠపేతి, ఠపితా హోతి పవారణా. ద్వేవాచికాయ చే, భిక్ఖవే,… ఏకవాచికాయ చే, భిక్ఖవే,… సమానవస్సికాయ చే, భిక్ఖవే, పవారణాయ భాసితాయ లపితాయ అపరియోసితాయ పవారణం ఠపేతి, ఠపితా హోతి పవారణా. ఏవం ఖో, భిక్ఖవే, ఠపితా హోతి పవారణా.

౨౩౭. ఇధ పన, భిక్ఖవే, తదహు పవారణాయ భిక్ఖు భిక్ఖుస్స పవారణం ఠపేతి. తం చే భిక్ఖుం అఞ్ఞే భిక్ఖూ జానన్తి, ‘‘అయం ఖో ఆయస్మా అపరిసుద్ధకాయసమాచారో, అపరిసుద్ధవచీసమాచారో, అపరిసుద్ధాజీవో, బాలో, అబ్యత్తో, న పటిబలో అనుయుఞ్జీయమానో అనుయోగం దాతు’’న్తి, ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన పవారేతబ్బం.

ఇధ పన, భిక్ఖవే, తదహు పవారణాయ భిక్ఖు భిక్ఖుస్స పవారణం ఠపేతి. తం చే భిక్ఖుం అఞ్ఞే భిక్ఖూ జానన్తి, ‘‘అయం ఖో ఆయస్మా పరిసుద్ధకాయసమాచారో, అపరిసుద్ధవచీసమాచారో, అపరిసుద్ధాజీవో, బాలో, అబ్యత్తో, న పటిబలో అనుయుఞ్జీయమానో అనుయోగం దాతు’’న్తి, ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన పవారేతబ్బం.

ఇధ పన, భిక్ఖవే, తదహు పవారణాయ భిక్ఖు భిక్ఖుస్స పవారణం ఠపేతి. తం చే భిక్ఖుం అఞ్ఞే భిక్ఖూ జానన్తి, ‘‘అయం ఖో ఆయస్మా పరిసుద్ధకాయసమాచారో, పరిసుద్ధవచీసమాచారో, అపరిసుద్ధాజీవో, బాలో, అబ్యత్తో, న పటిబలో అనుయుఞ్జీయమానో అనుయోగం దాతు’’న్తి, ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన పవారేతబ్బం.

ఇధ పన, భిక్ఖవే, తదహు పవారణాయ భిక్ఖు భిక్ఖుస్స పవారణం ఠపేతి. తం చే భిక్ఖుం అఞ్ఞే భిక్ఖూ జానన్తి, ‘‘అయం ఖో ఆయస్మా పరిసుద్ధకాయసమాచారో, పరిసుద్ధవచీసమాచారో, పరిసుద్ధాజీవో, బాలో, అబ్యత్తో, న పటిబలో అనుయుఞ్జీయమానో అనుయోగం దాతు’’న్తి, ‘అలం, భిక్ఖు, మా భణ్డనం, మా కలహం, మా విగ్గహం, మా వివాద’న్తి ఓమద్దిత్వా సఙ్ఘేన పవారేతబ్బం.

ఇధ పన, భిక్ఖవే, తదహు పవారణాయ భిక్ఖు భిక్ఖుస్స పవారణం ఠపేతి. తం చే భిక్ఖుం అఞ్ఞే భిక్ఖూ జానన్తి, ‘‘అయం ఖో ఆయస్మా పరిసుద్ధకాయసమాచారో, పరిసుద్ధవచీసమాచారో, పరిసుద్ధాజీవో, పణ్డితో, బ్యత్తో, పటిబలో అనుయుఞ్జీయమానో అనుయోగం దాతు’’న్తి, సో ఏవమస్స వచనీయో, ‘‘యం ఖో త్వం, ఆవుసో, ఇమస్స భిక్ఖునో పవారణం ఠపేసి, కిమ్హి నం ఠపేసి, సీలవిపత్తియా వా ఠపేసి, ఆచారవిపత్తియా వా ఠపేసి, దిట్ఠివిపత్తియా వా ఠపేసీ’’తి? సో చే ఏవం వదేయ్య – ‘‘సీలవిపత్తియా వా ఠపేమి, ఆచారవిపత్తియా వా ఠపేమి, దిట్ఠివిపత్తియా వా ఠపేమీ’’తి, సో ఏవమస్స వచనీయో – ‘‘జానాసి పనాయస్మా సీలవిపత్తిం, జానాసి ఆచారవిపత్తిం, జానాసి దిట్ఠివిపత్తి’’న్తి? సో చే ఏవం వదేయ్య – ‘‘జానామి ఖో అహం, ఆవుసో, సీలవిపత్తిం, జానామి ఆచారవిపత్తిం, జానామి దిట్ఠివిపత్తి’’న్తి, సో ఏవమస్స వచనీయో – ‘‘కతమా పనావుసో, సీలవిపత్తి, కతమా ఆచారవిపత్తి, కతమా దిట్ఠివిపత్తీ’’తి? సో చే ఏవం వదేయ్య – ‘‘చత్తారి పారాజికాని, తేరస సఙ్ఘాదిసేసా, అయం సీలవిపత్తి; థుల్లచ్చయం, పాచిత్తియం, పాటిదేసనీయం, దుక్కటం, దుబ్భాసితం, అయం ఆచారవిపత్తి; మిచ్ఛాదిట్ఠి, అన్తగ్గాహికాదిట్ఠి, అయం దిట్ఠివిపత్తీ’’తి, సో ఏవమస్స వచనీయో – ‘‘యం ఖో త్వం, ఆవుసో, ఇమస్స భిక్ఖునో పవారణం ఠపేసి, దిట్ఠేన వా ఠపేసి, సుతేన వా ఠపేసి, పరిసఙ్కాయ వా ఠపేసీ’’తి? సో చే ఏవం వదేయ్య – ‘‘దిట్ఠేన వా ఠపేమి, సుతేన వా ఠపేమి, పరిసఙ్కాయ వా ఠపేమీ’’తి, సో ఏవమస్స వచనీయో – ‘‘యం ఖో త్వం, ఆవుసో, ఇమస్స భిక్ఖునో దిట్ఠేన పవారణం ఠపేసి, కిం తే దిట్ఠం, కిన్తి తే దిట్ఠం, కదా తే దిట్ఠం, కత్థ తే దిట్ఠం, పారాజికం అజ్ఝాపజ్జన్తో దిట్ఠో, సఙ్ఘాదిసేసం అజ్ఝాపజ్జన్తో దిట్ఠో, థుల్లచ్చయం… పాచిత్తియం… పాటిదేసనీయం… దుక్కటం… దుబ్భాసితం అజ్ఝాపజ్జన్తో దిట్ఠో, కత్థ చ త్వం అహోసి, కత్థ చాయం భిక్ఖు అహోసి, కిఞ్చ త్వం కరోసి, కిఞ్చాయం భిక్ఖు కరోతీ’’తి? సో చే ఏవం వదేయ్య – ‘‘న ఖో అహం, ఆవుసో, ఇమస్స భిక్ఖునో దిట్ఠేన పవారణం ఠపేమి, అపిచ సుతేన పవారణం ఠపేమీ’’తి, సో ఏవమస్స వచనీయో – ‘‘యం ఖో త్వం, ఆవుసో, ఇమస్స భిక్ఖునో సుతేన పవారణం ఠపేసి, కిం తే సుతం, కిన్తి తే సుతం, కదా తే సుతం, కత్థ తే సుతం, పారాజికం అజ్ఝాపన్నోతి సుతం, సఙ్ఘాదిసేసం అజ్ఝాపన్నోతి సుతం, థుల్లచ్చయం… పాచిత్తియం… పాటిదేసనీయం… దుక్కటం… దుబ్భాసితం అజ్ఝాపన్నోతి సుతం, భిక్ఖుస్స సుతం, భిక్ఖునియా సుతం, సిక్ఖమానాయ సుతం, సామణేరస్స సుతం, సామణేరియా సుతం, ఉపాసకస్స సుతం, ఉపాసికాయ సుతం, రాజూనం సుతం, రాజమహామత్తానం సుతం, తిత్థియానం సుతం, తిత్థియసావకానం సుత’’న్తి? సో చే ఏవం వదేయ్య – ‘‘న ఖో అహం, ఆవుసో, ఇమస్స భిక్ఖునో సుతేన పవారణం ఠపేమి, అపిచ పరిసఙ్కాయ పవారణం ఠపేమీ’’తి, సో ఏవమస్స వచనీయో – ‘‘యం ఖో త్వం, ఆవుసో, ఇమస్స భిక్ఖునో పరిసఙ్కాయ పవారణం ఠపేసి, కిం పరిసఙ్కసి, కిన్తి పరిసఙ్కసి, కదా పరిసఙ్కసి, కత్థ పరిసఙ్కసి, పారాజికం అజ్ఝాపన్నోతి పరిసఙ్కసి, సఙ్ఘాదిసేసం అజ్ఝాపన్నోతి పరిసఙ్కసి, థుల్లచ్చయం… పాచిత్తియం… పాటిదేసనీయం… దుక్కటం… దుబ్భాసితం అజ్ఝాపన్నోతి పరిసఙ్కసి, భిక్ఖుస్స సుత్వా పరిసఙ్కసి, భిక్ఖునియా సుత్వా పరిసఙ్కసి, సిక్ఖమానాయ సుత్వా పరిసఙ్కసి, సామణేరస్స సుత్వా పరిసఙ్కసి, సామణేరియా సుత్వా పరిసఙ్కసి, ఉపాసకస్స సుత్వా పరిసఙ్కసి, ఉపాసికాయ సుత్వా పరిసఙ్కసి, రాజూనం సుత్వా పరిసఙ్కసి, రాజమహామత్తానం సుత్వా పరిసఙ్కసి, తిత్థియానం సుత్వా పరిసఙ్కసి, తిత్థియసావకానం సుత్వా పరిసఙ్కసీ’’తి? సో చే ఏవం వదేయ్య – ‘‘న ఖో అహం, ఆవుసో, ఇమస్స భిక్ఖునో పరిసఙ్కాయ పవారణం ఠపేమి, అపి చ అహమ్పి న జానామి కేన పనాహం ఇమస్స భిక్ఖునో పవారణం ఠపేమీ’’తి. సో చే, భిక్ఖవే, చోదకో భిక్ఖు అనుయోగేన విఞ్ఞూనం సబ్రహ్మచారీనం చిత్తం న ఆరాధేతి, అననువాదో చుదితో భిక్ఖూతి అలం వచనాయ. సో చే, భిక్ఖవే, చోదకో భిక్ఖు అనుయోగేన విఞ్ఞూనం సబ్రహ్మచారీనం చిత్తం ఆరాధేతి, సానువాదో చుదితో భిక్ఖూతి అలం వచనాయ. సో చే, భిక్ఖవే, చోదకో భిక్ఖు అమూలకేన పారాజికేన అనుద్ధంసితం పటిజానాతి, సఙ్ఘాదిసేసం ఆరోపేత్వా సఙ్ఘేన పవారేతబ్బం. సో చే, భిక్ఖవే, చోదకో భిక్ఖు అమూలకేన సఙ్ఘాదిసేసేన అనుద్ధంసితం పటిజానాతి, యథాధమ్మం కారాపేత్వా సఙ్ఘేన పవారేతబ్బం. సో చే, భిక్ఖవే, చోదకో, భిక్ఖు అమూలకేన థుల్లచ్చయేన… పాచిత్తియేన… పాటిదేసనీయేన… దుక్కటేన… దుబ్భాసితేన అనుద్ధంసితం పటిజానాతి, యథాధమ్మం కారాపేత్వా సఙ్ఘేన పవారేతబ్బం. సో చే, భిక్ఖవే, చుదితో భిక్ఖు పారాజికం అజ్ఝాపన్నోతి పటిజానాతి, నాసేత్వా సఙ్ఘేన పవారేతబ్బం. సో చే, భిక్ఖవే, చుదితో భిక్ఖు సఙ్ఘాదిసేసం అజ్ఝాపన్నోతి పటిజానాతి, సఙ్ఘాదిసేసం ఆరోపేత్వా సఙ్ఘేన పవారేతబ్బం. సో చే, భిక్ఖవే, చుదితో భిక్ఖు థుల్లచ్చయం… పాచిత్తియం… పాటిదేసనీయం… దుక్కటం… దుబ్భాసితం అజ్ఝాపన్నోతి పటిజానాతి, యథాధమ్మం కారాపేత్వా సఙ్ఘేన పవారేతబ్బం.

పవారణాఠపనం నిట్ఠితం.