౧౨౪. సఙ్ఘపవారణాదిప్పభేదా

౨౧౫. తేన ఖో పన సమయేన అఞ్ఞతరస్మిం ఆవాసే తదహు పవారణాయ పఞ్చ భిక్ఖూ విహరన్తి. అథ ఖో తేసం భిక్ఖూనం ఏతదహోసి – ‘‘భగవతా పఞ్ఞత్తం ‘సఙ్ఘేన పవారేతబ్బ’న్తి. మయఞ్చమ్హా పఞ్చ జనా. కథం ను ఖో అమ్హేహి పవారేతబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, పఞ్చన్నం సఙ్ఘే పవారేతున్తి.

౨౧౬. తేన ఖో పన సమయేన అఞ్ఞతరస్మిం ఆవాసే తదహు పవారణాయ చత్తారో భిక్ఖూ విహరన్తి. అథ ఖో తేసం భిక్ఖూనం ఏతదహోసి – ‘‘భగవతా అనుఞ్ఞాతం పఞ్చన్నం సఙ్ఘే పవారేతున్తి. మయఞ్చమ్హా చత్తారో జనా. కథం ను ఖో అమ్హేహి పవారేతబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, చతున్నం అఞ్ఞమఞ్ఞం పవారేతుం. ఏవఞ్చ పన, భిక్ఖవే, పవారేతబ్బం. బ్యత్తేన భిక్ఖునా పటిబలేన తే భిక్ఖూ ఞాపేతబ్బా –

‘‘సుణన్తు మే ఆయస్మన్తో. అజ్జ పవారణా. యదాయస్మన్తానం పత్తకల్లం, మయం అఞ్ఞమఞ్ఞం పవారేయ్యామా’’తి.

థేరేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా తే భిక్ఖూ ఏవమస్సు వచనీయా – ‘‘అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తో అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తో అనుకమ్పం ఉపాదాయ. పస్సన్తో పటికరిస్సామీ’’తి.

నవకేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా తే భిక్ఖూ ఏవమస్సు వచనీయా – ‘‘అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తో అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తో అనుకమ్పం ఉపాదాయ. పస్సన్తో పటికరిస్సామీ’’తి.

తేన ఖో పన సమయేన అఞ్ఞతరస్మిం ఆవాసే తదహు పవారణాయ తయో భిక్ఖూ విహరన్తి. అథ ఖో తేసం భిక్ఖూనం ఏతదహోసి – ‘‘భగవతా అనుఞ్ఞాతం పఞ్చన్నం సఙ్ఘే పవారేతుం, చతున్నం అఞ్ఞమఞ్ఞం పవారేతుం. మయఞ్చమ్హా తయో జనా. కథం ను ఖో అమ్హేహి పవారేతబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, తిణ్ణం అఞ్ఞమఞ్ఞం పవారేతుం. ఏవఞ్చ పన, భిక్ఖవే, పవారేతబ్బం. బ్యత్తేన భిక్ఖునా పటిబలేన తే భిక్ఖూ ఞాపేతబ్బా –

‘‘సుణన్తు మే ఆయస్మన్తా. అజ్జ పవారణా. యదాయస్మన్తానం పత్తకల్లం, మయం అఞ్ఞమఞ్ఞం పవారేయ్యామా’’తి.

థేరేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా తే భిక్ఖూ ఏవమస్సు వచనీయా – ‘‘అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తా అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, ఆవుసో, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తా అనుకమ్పం ఉపాదాయ. పస్సన్తో పటికరిస్సామీ’’తి.

నవకేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా తే భిక్ఖూ ఏవమస్సు వచనీయా – ‘‘అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తా అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, భన్తే, ఆయస్మన్తే పవారేమి దిట్ఠేన వా సుతేన వా పరిసఙ్కాయ వా. వదన్తు మం ఆయస్మన్తా అనుకమ్పం ఉపాదాయ. పస్సన్తో పటికరిస్సామీ’’తి.

౨౧౭. తేన ఖో పన సమయేన అఞ్ఞతరస్మిం ఆవాసే తదహు పవారణాయ ద్వే భిక్ఖూ విహరన్తి. అథ ఖో తేసం భిక్ఖూనం ఏతదహోసి – ‘‘భగవతా అనుఞ్ఞాతం పఞ్చన్నం సఙ్ఘే పవారేతుం, చతున్నం అఞ్ఞమఞ్ఞం పవారేతుం, తిణ్ణం అఞ్ఞమఞ్ఞం పవారేతుం. మయఞ్చమ్హా ద్వే జనా. కథం ను ఖో అమ్హేహి పవారేతబ్బ’’న్తి. భగవతో ఏతమత్థం ఆరోచేసుం. అనుజానామి, భిక్ఖవే, ద్విన్నం అఞ్ఞమఞ్ఞం పవారేతుం. ఏవఞ్చ పన, భిక్ఖవే, పవారేతబ్బం. థేరేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా నవో భిక్ఖు ఏవమస్స వచనీయో – ‘‘అహం, ఆవుసో, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా. వదతు మం ఆయస్మా అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, ఆవుసో, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా. వదతు మం ఆయస్మా అనుకమ్పం ఉపాదాయ. పస్సన్తో పటికరిస్సామీ’’తి.

నవకేన భిక్ఖునా ఏకంసం ఉత్తరాసఙ్గం కరిత్వా ఉక్కుటికం నిసీదిత్వా అఞ్జలిం పగ్గహేత్వా థేరో భిక్ఖు ఏవమస్స వచనీయో – ‘‘అహం, భన్తే, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా. వదతు మం ఆయస్మా అనుకమ్పం ఉపాదాయ. పస్సన్తో పటికరిస్సామి. దుతియమ్పి…పే… తతియమ్పి అహం, భన్తే, ఆయస్మన్తం పవారేమి దిట్ఠేన వా సుతేన వా పరిసఙ్కాయ వా. వదతు మం ఆయస్మా అనుకమ్పం ఉపాదాయ. పస్సన్తో పటికరిస్సామీ’’తి.

౨౧౮. తేన ఖో పన సమయేన అఞ్ఞతరస్మిం ఆవాసే తదహు పవారణాయ ఏకో భిక్ఖు విహరతి. అథ ఖో తస్స భిక్ఖునో ఏతదహోసి – ‘‘భగవతా అనుఞ్ఞాతం పఞ్చన్నం సఙ్ఘే పవారేతుం, చతున్నం అఞ్ఞమఞ్ఞం పవారేతుం, తిణ్ణం అఞ్ఞమఞ్ఞం పవారేతుం, ద్విన్నం అఞ్ఞమఞ్ఞం పవారేతుం. అహఞ్చమ్హి ఏకకో. కథం ను ఖో మయా పవారేతబ్బ’’న్తి? భగవతో ఏతమత్థం ఆరోచేసుం.

ఇధ పన, భిక్ఖవే, అఞ్ఞతరస్మిం ఆవాసే తదహు పవారణాయ ఏకో భిక్ఖు విహరతి. తేన, భిక్ఖవే, భిక్ఖునా యత్థ భిక్ఖూ పటిక్కమన్తి ఉపట్ఠానసాలాయ వా మణ్డపే వా రుక్ఖమూలే వా, సో దేసో సమ్మజ్జిత్వా పానీయం పరిభోజనీయం ఉపట్ఠాపేత్వా ఆసనం పఞ్ఞపేత్వా పదీపం కత్వా నిసీదితబ్బం. సచే అఞ్ఞే భిక్ఖూ ఆగచ్ఛన్తి, తేహి సద్ధిం పవారేతబ్బం; నో చే ఆగచ్ఛన్తి, ‘అజ్జ మే పవారణా’తి అధిట్ఠాతబ్బం. నో చే అధిట్ఠేయ్య, ఆపత్తి దుక్కటస్స.

తత్ర, భిక్ఖవే, యత్థ పఞ్చ భిక్ఖూ విహరన్తి, న ఏకస్స పవారణం ఆహరిత్వా

చతూహి సఙ్ఘే పవారేతబ్బం. పవారేయ్యుం చే, ఆపత్తి దుక్కటస్స. తత్ర, భిక్ఖవే, యత్థ చత్తారో భిక్ఖూ విహరన్తి, న ఏకస్స పవారణం ఆహరిత్వా తీహి అఞ్ఞమఞ్ఞం పవారేతబ్బం. పవారేయ్యుం చే, ఆపత్తి దుక్కటస్స. తత్ర, భిక్ఖవే, యత్థ తయో భిక్ఖూ విహరన్తి, న ఏకస్స పవారణం ఆహరిత్వా ద్వీహి అఞ్ఞమఞ్ఞం పవారేతబ్బం. పవారేయ్యుం చే, ఆపత్తి దుక్కటస్స. తత్ర, భిక్ఖవే, యత్థ ద్వే భిక్ఖూ విహరన్తి, న ఏకస్స పవారణం ఆహరిత్వా ఏకేన అధిట్ఠాతబ్బం. అధిట్ఠేయ్య చే, ఆపత్తి దుక్కటస్సాతి.

సఙ్ఘపవారణాదిప్పభేదా నిట్ఠితా.