౯౮. కుక్కుచ్చపకతపన్నరసకం

౧౭౫. ఇధ పన, భిక్ఖవే, అఞ్ఞతరస్మిం ఆవాసే తదహుపోసథే సమ్బహులా ఆవాసికా భిక్ఖూ సన్నిపతన్తి చత్తారో వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం ఉపోసథో కాతుం నామ్హాకం న కప్పతీ’’తి, కుక్కుచ్చపకతా ఉపోసథం కరోన్తి, పాతిమోక్ఖం ఉద్దిసన్తి. తేహి ఉద్దిస్సమానే పాతిమోక్ఖే, అథఞ్ఞే ఆవాసికా భిక్ఖూ ఆగచ్ఛన్తి బహుతరా. తేహి, భిక్ఖవే, భిక్ఖూహి పున పాతిమోక్ఖం ఉద్దిసితబ్బం. ఉద్దేసకానం ఆపత్తి దుక్కటస్స.

ఇధ పన, భిక్ఖవే, అఞ్ఞతరస్మిం ఆవాసే తదహుపోసథే సమ్బహులా ఆవాసికా భిక్ఖూ సన్నిపతన్తి చత్తారో వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం ఉపోసథో కాతుం నామ్హాకం న కప్పతీ’’తి, కుక్కుచ్చపకతా ఉపోసథం కరోన్తి, పాతిమోక్ఖం ఉద్దిసన్తి. తేహి ఉద్దిస్సమానే పాతిమోక్ఖే, అథఞ్ఞే ఆవాసికా భిక్ఖూ ఆగచ్ఛన్తి సమసమా. ఉద్దిట్ఠం సుఉద్దిట్ఠం, అవసేసం సోతబ్బం. ఉద్దేసకానం ఆపత్తి దుక్కటస్స.

ఇధ పన, భిక్ఖవే, అఞ్ఞతరస్మిం ఆవాసే తదహుపోసథే సమ్బహులా ఆవాసికా భిక్ఖూ సన్నిపతన్తి చత్తారో వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం ఉపోసథో కాతుం, నామ్హాకం న కప్పతీ’’తి, కుక్కుచ్చపకతా ఉపోసథం కరోన్తి, పాతిమోక్ఖం ఉద్దిసన్తి. తేహి ఉద్దిస్సమానే పాతిమోక్ఖే, అథఞ్ఞే ఆవాసికా భిక్ఖూ ఆగచ్ఛన్తి థోకతరా. ఉద్దిట్ఠం సుఉద్దిట్ఠం, అవసేసం సోతబ్బం. ఉద్దేసకానం ఆపత్తి దుక్కటస్స.

ఇధ పన, భిక్ఖవే, అఞ్ఞతరస్మిం ఆవాసే తదహుపోసథే సమ్బహులా ఆవాసికా భిక్ఖూ సన్నిపతన్తి చత్తారో వా అతిరేకా వా. తే జానన్తి ‘‘అత్థఞ్ఞే ఆవాసికా భిక్ఖూ అనాగతా’’తి. తే ‘‘కప్పతేవ అమ్హాకం ఉపోసథో కాతుం నామ్హాకం న కప్పతీ’’తి, కుక్కుచ్చపకతా ఉపోసథం కరోన్తి, పాతిమోక్ఖం ఉద్దిసన్తి. తేహి ఉద్దిట్ఠమత్తే పాతిమోక్ఖే,…పే… అవుట్ఠితాయ పరిసాయ…పే… ఏకచ్చాయ వుట్ఠితాయ పరిసాయ…పే… సబ్బాయ వుట్ఠితాయ పరిసాయ, అథఞ్ఞే ఆవాసికా భిక్ఖూ ఆగచ్ఛన్తి బహుతరా…పే… సమసమా …పే… థోకతరా. ఉద్దిట్ఠం సుఉద్దిట్ఠం, తేసం సన్తికే పారిసుద్ధి ఆరోచేతబ్బా. ఉద్దేసకానం ఆపత్తి దుక్కటస్స.

కుక్కుచ్చపకతపన్నరసకం నిట్ఠితం.