౮౩. పాతిమోక్ఖుద్దేసకఅజ్ఝేసనాది

౧౫౫. అథ ఖో భగవా రాజగహే యథాభిరన్తం విహరిత్వా యేన చోదనావత్థు తేన చారికం పక్కామి. అనుపుబ్బేన చారికం చరమానో యేన చోదనావత్థు తదవసరి. తేన ఖో పన సమయేన అఞ్ఞతరస్మిం ఆవాసే సమ్బహులా భిక్ఖూ విహరన్తి. తత్థ థేరో భిక్ఖు బాలో హోతి అబ్యత్తో. సో న జానాతి ఉపోసథం వా ఉపోసథకమ్మం వా, పాతిమోక్ఖం వా పాతిమోక్ఖుద్దేసం వా. అథ ఖో తేసం భిక్ఖూనం ఏతదహోసి – ‘‘భగవతా పఞ్ఞత్తం ‘థేరాధికం పాతిమోక్ఖ’న్తి, అయఞ్చ అమ్హాకం థేరో బాలో అబ్యత్తో, న జానాతి ఉపోసథం వా ఉపోసథకమ్మం వా, పాతిమోక్ఖం వా పాతిమోక్ఖుద్దేసం వా. కథం ను ఖో అమ్హేహి పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, యో తత్థ భిక్ఖు బ్యత్తో పటిబలో తస్సాధేయ్యం పాతిమోక్ఖన్తి.

తేన ఖో పన సమయేన అఞ్ఞతరస్మిం ఆవాసే తదహుపోసథే సమ్బహులా భిక్ఖూ విహరన్తి బాలా అబ్యత్తా. తే న జానన్తి ఉపోసథం వా ఉపోసథకమ్మం వా, పాతిమోక్ఖం వా పాతిమోక్ఖుద్దేసం వా. తే థేరం అజ్ఝేసింసు – ‘‘ఉద్దిసతు, భన్తే, థేరో పాతిమోక్ఖ’’న్తి. సో ఏవమాహ – ‘‘న మే, ఆవుసో, వత్తతీ’’తి. దుతియం థేరం అజ్ఝేసింసు – ‘‘ఉద్దిసతు, భన్తే, థేరో పాతిమోక్ఖ’’న్తి. సోపి ఏవమాహ – ‘‘న మే, ఆవుసో, వత్తతీ’’తి. తతియం థేరం అజ్ఝేసింసు – ‘‘ఉద్దిసతు, భన్తే, థేరో పాతిమోక్ఖ’’న్తి. సోపి ఏవమాహ – ‘‘న మే, ఆవుసో, వత్తతీ’’తి. ఏతేనేవ ఉపాయేన యావ సఙ్ఘనవకం అజ్ఝేసింసు – ‘‘ఉద్దిసతు ఆయస్మా పాతిమోక్ఖ’’న్తి. సోపి ఏవమాహ – ‘‘న మే, భన్తే, వత్తతీ’’తి. భగవతో ఏతమత్థం ఆరోచేసుం.

ఇధ పన, భిక్ఖవే, అఞ్ఞతరస్మిం ఆవాసే తదహుపోసథే సమ్బహులా భిక్ఖూ విహరన్తి బాలా అబ్యత్తా. తే న జానన్తి ఉపోసథం వా ఉపోసథకమ్మం వా, పాతిమోక్ఖం వా పాతిమోక్ఖుద్దేసం వా. తే థేరం అజ్ఝేసన్తి – ‘‘ఉద్దిసతు, భన్తే, థేరో పాతిమోక్ఖ’’న్తి. సో ఏవం వదేతి – ‘‘న మే, ఆవుసో, వత్తతీ’’తి. దుతియం థేరం అజ్ఝేసన్తి – ‘‘ఉద్దిసతు, భన్తే, థేరో పాతిమోక్ఖ’’న్తి. సోపి ఏవం వదేతి – ‘‘న మే, ఆవుసో, వత్తతీ’’తి. తతియం థేరం అజ్ఝేసన్తి – ‘‘ఉద్దిసతు, భన్తే, థేరో పాతిమోక్ఖ’’న్తి. సోపి ఏవం వదేతి – ‘‘న మే, ఆవుసో, వత్తతీ’’తి. ఏతేనేవ ఉపాయేన యావ సఙ్ఘనవకం అజ్ఝేసన్తి – ‘‘ఉద్దిసతు ఆయస్మా పాతిమోక్ఖ’’న్తి. సోపి ఏవం వదేతి – ‘‘న మే, భన్తే, వత్తతీ’’తి. తేహి, భిక్ఖవే, భిక్ఖూహి ఏకో భిక్ఖు సామన్తా ఆవాసా సజ్జుకం పాహేతబ్బో – గచ్ఛావుసో, సంఖిత్తేన వా విత్థారేన వా పాతిమోక్ఖం పరియాపుణిత్వాన ఆగచ్ఛాహీతి.

అథ ఖో భిక్ఖూనం ఏతదహోసి – ‘‘కేన ను ఖో పాహేతబ్బో’’తి? భగవతో ఏతమత్థం ఆరోచేసుం. అనుజానామి, భిక్ఖవే, థేరేన భిక్ఖునా నవం భిక్ఖుం ఆణాపేతున్తి. థేరేన ఆణత్తా నవా భిక్ఖూ న గచ్ఛన్తి. భగవతో ఏతమత్థం ఆరోచేసుం. న, భిక్ఖవే, థేరేన ఆణత్తేన అగిలానేన న గన్తబ్బం. యో న గచ్ఛేయ్య, ఆపత్తి దుక్కటస్సాతి.