౬౭. తస్సుద్దానం

౧౩౧. వినయమ్హి మహత్థేసు, పేసలానం సుఖావహే;

నిగ్గహానఞ్చ పాపిచ్ఛే, లజ్జీనం పగ్గహేసు చ.

సాసనాధారణే చేవ, సబ్బఞ్ఞుజినగోచరే;

అనఞ్ఞవిసయే ఖేమే, సుపఞ్ఞత్తే అసంసయే.

ఖన్ధకే వినయే చేవ, పరివారే చ మాతికే;

యథాత్థకారీ కుసలో, పటిపజ్జతి యోనిసో.

యో గవం న విజానాతి, న సో రక్ఖతి గోగణం;

ఏవం సీలం అజానన్తో, కిం సో రక్ఖేయ్య సంవరం.

పముట్ఠమ్హి చ సుత్తన్తే, అభిధమ్మే చ తావదే;

వినయే అవినట్ఠమ్హి, పున తిట్ఠతి సాసనం.

తస్మా సఙ్గాహణాహేతుం [సఙ్గాహనాహేతుం (క.)], ఉద్దానం అనుపుబ్బసో;

పవక్ఖామి యథాఞాయం, సుణాథ మమ భాసతో.

వత్థు నిదానం ఆపత్తి, నయా పేయ్యాలమేవ చ;

దుక్కరం తం అసేసేతుం, నయతో తం విజానథాతి.

బోధి రాజాయతనఞ్చ, అజపాలో సహమ్పతి;

బ్రహ్మా ఆళారో ఉదకో, భిక్ఖు చ ఉపకో ఇసి.

కోణ్డఞ్ఞో వప్పో భద్దియో, మహానామో చ అస్సజి;

యసో చత్తారో పఞ్ఞాస, సబ్బే పేసేసి సో దిసా.

వత్థు మారేహి తింసా చ, ఉరువేలం తయో జటీ;

అగ్యాగారం మహారాజా, సక్కో బ్రహ్మా చ కేవలా.

పంసుకూలం పోక్ఖరణీ, సిలా చ కకుధో సిలా;

జమ్బు అమ్బో చ ఆమలో, పారిపుప్ఫఞ్చ ఆహరి.

ఫాలియన్తు ఉజ్జలన్తు, విజ్ఝాయన్తు చ కస్సప;

నిముజ్జన్తి ముఖీ మేఘో, గయా లట్ఠి చ మాగధో.

ఉపతిస్సో కోలితో చ, అభిఞ్ఞాతా చ పబ్బజుం;

దున్నివత్థా పణామనా, కిసో లూఖో చ బ్రాహ్మణో.

అనాచారం ఆచరతి, ఉదరం మాణవో గణో;

వస్సం బాలేహి పక్కన్తో, దస వస్సాని నిస్సయో.

న వత్తన్తి పణామేతుం, బాలా పస్సద్ధి పఞ్చ ఛ;

యో సో అఞ్ఞో చ నగ్గో చ, అచ్ఛిన్నజటిలసాకియో.

మగధేసు పఞ్చాబాధా, ఏకో రాజా [భటో చోరో (స్యా.)] చ అఙ్గులి;

మాగధో చ అనుఞ్ఞాసి, కారా లిఖి కసాహతో.

లక్ఖణా ఇణా దాసో చ, భణ్డుకో ఉపాలి అహి;

సద్ధం కులం కణ్టకో చ, ఆహున్దరికమేవ చ.

వత్థుమ్హి దారకో సిక్ఖా, విహరన్తి చ కిం ను ఖో;

సబ్బం ముఖం ఉపజ్ఝాయే, అపలాళన కణ్టకో.

పణ్డకో థేయ్యపక్కన్తో, అహి చ మాతరీ పితా;

అరహన్తభిక్ఖునీభేదా, రుహిరేన చ బ్యఞ్జనం.

అనుపజ్ఝాయసఙ్ఘేన, గణపణ్డకపత్తకో;

అచీవరం తదుభయం, యాచితేనపి యే తయో.

హత్థా పాదా హత్థపాదా, కణ్ణా నాసా తదూభయం;

అఙ్గులిఅళకణ్డరం, ఫణం ఖుజ్జఞ్చ వామనం.

గలగణ్డీ లక్ఖణా చేవ, కసా లిఖితసీపదీ;

పాపపరిసదూసీ చ, కాణం కుణి తథేవ చ.

ఖఞ్జం పక్ఖహతఞ్చేవ, సచ్ఛిన్నఇరియాపథం;

జరాన్ధమూగబధిరం, అన్ధమూగఞ్చ యం తహిం.

అన్ధబధిరం యం వుత్తం, మూగబధిరమేవ చ;

అన్ధమూగబధిరఞ్చ, అలజ్జీనఞ్చ నిస్సయం.

వత్థబ్బఞ్చ తథాద్ధానం, యాచమానేన లక్ఖణా [పేక్ఖనా (సబ్బత్థ)];

ఆగచ్ఛతు వివదన్తి, ఏకుపజ్ఝాయేన కస్సపో.

దిస్సన్తి ఉపసమ్పన్నా, ఆబాధేహి చ పీళితా;

అననుసిట్ఠా విత్థేన్తి, తత్థేవ అనుసాసనా.

సఙ్ఘేపి చ అథో బాలా, అసమ్మతా చ ఏకతో;

ఉల్లుమ్పతుపసమ్పదా, నిస్సయో ఏకకో తయోతి.

ఇమమ్హి ఖన్ధకే వత్థూని ఏకసతఞ్చ ద్వాసత్తతి.

మహాఖన్ధకో నిట్ఠితో.