౬౬. ఆపత్తియా అదస్సనే ఉక్ఖిత్తకవత్థూని

౧౩౦. తేన ఖో పన సమయేన అఞ్ఞతరో భిక్ఖు ఆపత్తియా అదస్సనే ఉక్ఖిత్తకో విబ్భమి. సో పున పచ్చాగన్త్వా భిక్ఖూ ఉపసమ్పదం యాచి. భగవతో ఏతమత్థం ఆరోచేసుం.

ఇధ పన, భిక్ఖవే, భిక్ఖు ఆపత్తియా అదస్సనే ఉక్ఖిత్తకో విబ్భమతి. సో పున పచ్చాగన్త్వా భిక్ఖూ ఉపసమ్పదం యాచతి. సో ఏవమస్స వచనీయో – ‘‘పస్సిస్ససి తం ఆపత్తి’’న్తి? సచాహం పస్సిస్సామీతి, పబ్బాజేతబ్బో. సచాహం న పస్సిస్సామీతి, న పబ్బాజేతబ్బో. పబ్బాజేత్వా వత్తబ్బో – ‘‘పస్సిస్ససి తం ఆపత్తి’’న్తి? సచాహం పస్సిస్సామీతి, ఉపసమ్పాదేతబ్బో. సచాహం న పస్సిస్సామీతి, న ఉపసమ్పాదేతబ్బో. ఉపసమ్పాదేత్వా వత్తబ్బో – ‘‘పస్సిస్ససి తం ఆపత్తి’’న్తి? సచాహం పస్సిస్సామీతి, ఓసారేతబ్బో. సచాహం న పస్సిస్సామీతి, న ఓసారేతబ్బో. ఓసారేత్వా వత్తబ్బో – ‘‘పస్ససి [పస్సాహి (సీ.)] తం ఆపత్తి’’న్తి? సచే పస్సతి, ఇచ్చేతం కుసలం. నో చే పస్సతి, లబ్భమానాయ సామగ్గియా పున ఉక్ఖిపితబ్బో. అలబ్భమానాయ సామగ్గియా అనాపత్తి సమ్భోగే సంవాసే.

ఇధ పన, భిక్ఖవే, భిక్ఖు ఆపత్తియా అప్పటికమ్మే ఉక్ఖిత్తకో విబ్భమతి. సో పున పచ్చాగన్త్వా భిక్ఖూ ఉపసమ్పదం యాచతి. సో ఏవమస్స వచనీయో – ‘‘పటికరిస్ససి తం ఆపత్తి’’న్తి? సచాహం పటికరిస్సామీతి, పబ్బాజేతబ్బో. సచాహం న పటికరిస్సామీతి, న పబ్బాజేతబ్బో. పబ్బాజేత్వా వత్తబ్బో – ‘‘పటికరిస్ససి తం ఆపత్తి’’న్తి? సచాహం పటికరిస్సామీతి, ఉపసమ్పాదేతబ్బో. సచాహం న పటికరిస్సామీతి, న ఉపసమ్పాదేతబ్బో. ఉపసమ్పాదేత్వా వత్తబ్బో – ‘‘పటికరిస్ససి తం ఆపత్తి’’న్తి? సచాహం పటికరిస్సామీతి, ఓసారేతబ్బో. సచాహం న పటికరిస్సామీతి, న ఓసారేతబ్బో. ఓసారేత్వా వత్తబ్బో – ‘‘పటికరోహి తం ఆపత్తి’’న్తి. సచే పటికరోతి, ఇచ్చేతం కుసలం. నో చే పటికరోతి లబ్భమానాయ సామగ్గియా పున ఉక్ఖిపితబ్బో. అలబ్భమానాయ సామగ్గియా అనాపత్తి సమ్భోగే సంవాసే.

ఇధ పన, భిక్ఖవే, భిక్ఖు పాపికాయ దిట్ఠియా అప్పటినిస్సగ్గే ఉక్ఖిత్తకో విబ్భమతి. సో పున పచ్చాగన్త్వా భిక్ఖూ ఉపసమ్పదం యాచతి. సో ఏవమస్స వచనీయో – ‘‘పటినిస్సజ్జిస్ససి తం పాపికం దిట్ఠి’’న్తి? సచాహం పటినిస్సజ్జిస్సామీతి, పబ్బాజేతబ్బో. సచాహం న పటినిస్సజ్జిస్సామీతి, న పబ్బాజేతబ్బో. పబ్బాజేత్వా వత్తబ్బో – ‘‘పటినిస్సజ్జిస్ససి తం పాపికం దిట్ఠి’’న్తి? సచాహం పటినిస్సజ్జిస్సామీతి, ఉపసమ్పాదేతబ్బో. సచాహం న పటినిస్సజ్జిస్సామీతి, న ఉపసమ్పాదేతబ్బో. ఉపసమ్పాదేత్వా వత్తబ్బో – ‘‘పటినిస్సజ్జిస్ససి తం పాపికం దిట్ఠి’’న్తి? సచాహం పటినిస్సజ్జిస్సామీతి, ఓసారేతబ్బో. సచాహం న పటినిస్సజ్జిస్సామీతి, న ఓసారేతబ్బో. ఓసారేత్వా వత్తబ్బో – ‘‘పటినిస్సజ్జేహి తం పాపికం దిట్ఠి’’న్తి. సచే పటినిస్సజ్జతి, ఇచ్చేతం కుసలం. నో చే పటినిస్సజ్జతి, లబ్భమానాయ సామగ్గియా పున ఉక్ఖిపితబ్బో. అలబ్భమానాయ సామగ్గియా అనాపత్తి సమ్భోగే సంవాసేతి.

మహాఖన్ధకో పఠమో.