౬౫. చత్తారి అకరణీయాని

౧౨౯. తేన ఖో పన సమయేన భిక్ఖూ అఞ్ఞతరం భిక్ఖుం ఉపసమ్పాదేత్వా ఏకకం ఓహాయ పక్కమింసు. సో పచ్ఛా ఏకకోవ ఆగచ్ఛన్తో అన్తరామగ్గే పురాణదుతియికాయ సమాగఞ్ఛి. సా ఏవమాహ – ‘‘కిందాని పబ్బజితోసీ’’తి? ‘‘ఆమ, పబ్బజితోమ్హీ’’తి. ‘‘దుల్లభో ఖో పబ్బజితానం మేథునో ధమ్మో; ఏహి, మేథునం ధమ్మం పటిసేవా’’తి. సో తస్సా మేథునం ధమ్మం పటిసేవిత్వా చిరేన అగమాసి. భిక్ఖూ ఏవమాహంసు – ‘‘కిస్స త్వం, ఆవుసో, ఏవం చిరం అకాసీ’’తి? అథ ఖో సో భిక్ఖు భిక్ఖూనం ఏతమత్థం ఆరోచేసి. భిక్ఖూ భగవతో ఏతమత్థం ఆరోచేసుం. అనుజానామి, భిక్ఖవే, ఉపసమ్పాదేత్వా దుతియం దాతుం, చత్తారి చ అకరణీయాని ఆచిక్ఖితుం –

‘‘ఉపసమ్పన్నేన భిక్ఖునా మేథునో ధమ్మో న పటిసేవితబ్బో, అన్తమసో తిరచ్ఛానగతాయపి. యో భిక్ఖు మేథునం ధమ్మం పటిసేవతి, అస్సమణో హోతి అసక్యపుత్తియో. సేయ్యథాపి నామ పురిసో సీసచ్ఛిన్నో అభబ్బో తేన సరీరబన్ధనేన జీవితుం, ఏవమేవ భిక్ఖు మేథునం ధమ్మం పటిసేవిత్వా అస్సమణో హోతి అసక్యపుత్తియో. తం తే యావజీవం అకరణీయం.

‘‘ఉపసమ్పన్నేన భిక్ఖునా అదిన్నం థేయ్యసఙ్ఖాతం న ఆదాతబ్బం, అన్తమసో తిణసలాకం ఉపాదాయ. యో భిక్ఖు పాదం వా పాదారహం వా అతిరేకపాదం వా అదిన్నం థేయ్యసఙ్ఖాతం ఆదియతి, అస్సమణో హోతి అసక్యపుత్తియో. సేయ్యథాపి నామ పణ్డుపలాసో బన్ధనా పముత్తో అభబ్బో హరితత్థాయ, ఏవమేవ భిక్ఖు పాదం వా పాదారహం వా అతిరేకపాదం వా అదిన్నం థేయ్యసఙ్ఖాతం ఆదియిత్వా అస్సమణో హోతి అసక్యపుత్తియో. తం తే యావజీవం అకరణీయం.

‘‘ఉపసమ్పన్నేన భిక్ఖునా సఞ్చిచ్చ పాణో జీవితా న వోరోపేతబ్బో, అన్తమసో కున్థకిపిల్లికం ఉపాదాయ. యో భిక్ఖు సఞ్చిచ్చ మనుస్సవిగ్గహం జీవితా వోరోపేతి, అన్తమసో గబ్భపాతనం ఉపాదాయ, అస్సమణో హోతి అసక్యపుత్తియో. సేయ్యథాపి నామ పుథుసిలా ద్వేధా భిన్నా అప్పటిసన్ధికా హోతి, ఏవమేవ భిక్ఖు సఞ్చిచ్చ మనుస్సవిగ్గహం జీవితా వోరోపేత్వా అస్సమణో హోతి అసక్యపుత్తియో. తం తే యావజీవం అకరణీయం.

‘‘ఉపసమ్పన్నేన భిక్ఖునా ఉత్తరిమనుస్సధమ్మో న ఉల్లపితబ్బో, అన్తమసో ‘సుఞ్ఞాగారే అభిరమామీ’తి. యో భిక్ఖు పాపిచ్ఛో ఇచ్ఛాపకతో అసన్తం అభూతం ఉత్తరిమనుస్సధమ్మం ఉల్లపతి ఝానం వా విమోక్ఖం వా సమాధిం వా సమాపత్తిం వా మగ్గం వా ఫలం వా, అస్సమణో హోతి అసక్యపుత్తియో. సేయ్యథాపి నామ తాలో మత్థకచ్ఛిన్నో అభబ్బో పున విరుళ్హియా, ఏవమేవ భిక్ఖు పాపిచ్ఛో ఇచ్ఛాపకతో అసన్తం అభూతం ఉత్తరిమనుస్సధమ్మం ఉల్లపిత్వా అస్సమణో హోతి అసక్యపుత్తియో. తం తే యావజీవం అకరణీయ’’న్తి.

చత్తారి అకరణీయాని నిట్ఠితాని.