౬౪. చత్తారో నిస్సయా

౧౨౮. తావదేవ ఛాయా మేతబ్బా, ఉతుప్పమాణం ఆచిక్ఖితబ్బం, దివసభాగో ఆచిక్ఖితబ్బో, సఙ్గీతి ఆచిక్ఖితబ్బా, చత్తారో నిస్సయా ఆచిక్ఖితబ్బా [ఆచిక్ఖితబ్బా, చత్తారి అకరణీయాని ఆచిక్ఖితబ్బాని. (క.)] –

‘‘పిణ్డియాలోపభోజనం నిస్సాయ పబ్బజ్జా. తత్థ తే యావజీవం ఉస్సాహో కరణీయో. అతిరేకలాభో – సఙ్ఘభత్తం, ఉద్దేసభత్తం, నిమన్తనం, సలాకభత్తం, పక్ఖికం, ఉపోసథికం, పాటిపదికం.

‘‘పంసుకూలచీవరం నిస్సాయ పబ్బజ్జా. తత్థ తే యావజీవం ఉస్సాహో కరణీయో. అతిరేకలాభో – ఖోమం, కప్పాసికం, కోసేయ్యం, కమ్బలం, సాణం, భఙ్గం.

‘‘రుక్ఖమూలసేనాసనం నిస్సాయ పబ్బజ్జా. తత్థ తే యావజీవం ఉస్సాహో కరణీయో. అతిరేకలాభో – విహారో, అడ్ఢయోగో, పాసాదో, హమ్మియం, గుహా.

‘‘పూతిముత్తభేసజ్జం నిస్సాయ పబ్బజ్జా. తత్థ తే యావజీవం ఉస్సాహో కరణీయో. అతిరేకలాభో – సప్పి, నవనీతం, తేలం, మధు, ఫాణిత’’న్తి.

చత్తారో నిస్సయా నిట్ఠితా.