౬౩. ఉపసమ్పదావిధి

౧౨౫. తేన ఖో పన సమయేన ఉపసమ్పన్నా దిస్సన్తి కుట్ఠికాపి గణ్డికాపి కిలాసికాపి సోసికాపి అపమారికాపి. భగవతో ఏతమత్థం ఆరోచేసుం. అనుజానామి, భిక్ఖవే, ఉపసమ్పాదేన్తేన తేరస [తస్స (క.)] అన్తరాయికే ధమ్మే పుచ్ఛితుం. ఏవఞ్చ పన, భిక్ఖవే, పుచ్ఛితబ్బో – ‘‘సన్తి తే ఏవరూపా ఆబాధా – కుట్ఠం, గణ్డో, కిలాసో, సోసో, అపమారో? మనుస్సోసి? పురిసోసి? భుజిస్సోసి? అణణోసి? నసి రాజభటో? అనుఞ్ఞాతోసి మాతాపితూహి? పరిపుణ్ణవీసతివస్సోసి? పరిపుణ్ణం తే పత్తచీవరం? కింనామోసి? కోనామో తే ఉపజ్ఝాయో’’తి?

తేన ఖో పన సమయేన భిక్ఖూ అననుసిట్ఠే ఉపసమ్పదాపేక్ఖే అన్తరాయికే ధమ్మే పుచ్ఛన్తి. ఉపసమ్పదాపేక్ఖా విత్థాయన్తి, మఙ్కూ హోన్తి, న సక్కోన్తి విస్సజ్జేతుం. భగవతో ఏతమత్థం ఆరోచేసుం. అనుజానామి, భిక్ఖవే, పఠమం అనుసాసిత్వా పచ్ఛా అన్తరాయికే ధమ్మే పుచ్ఛితున్తి.

తత్థేవ సఙ్ఘమజ్ఝే అనుసాసన్తి. ఉపసమ్పదాపేక్ఖా తథేవ విత్థాయన్తి, మఙ్కూ హోన్తి, న సక్కోన్తి విస్సజ్జేతుం. భగవతో ఏతమత్థం ఆరోచేసుం. అనుజానామి, భిక్ఖవే, ఏకమన్తం అనుసాసిత్వా సఙ్ఘమజ్ఝే అన్తరాయికే ధమ్మే పుచ్ఛితుం. ఏవఞ్చ పన, భిక్ఖవే, అనుసాసితబ్బో –

౧౨౬. పఠమం ఉపజ్ఝం గాహాపేతబ్బో. ఉపజ్ఝం గాహాపేత్వా పత్తచీవరం ఆచిక్ఖితబ్బం – అయం తే పత్తో, అయం సఙ్ఘాటి, అయం ఉత్తరాసఙ్గో, అయం అన్తరవాసకో. గచ్ఛ, అముమ్హి ఓకాసే తిట్ఠాహీతి.

బాలా అబ్యత్తా అనుసాసన్తి. దురనుసిట్ఠా ఉపసమ్పదాపేక్ఖా విత్థాయన్తి, మఙ్కూ హోన్తి, న సక్కోన్తి విస్సజ్జేతుం. భగవతో ఏతమత్థం ఆరోచేసుం. న, భిక్ఖవే, బాలేన అబ్యత్తేన అనుసాసితబ్బో. యో అనుసాసేయ్య, ఆపత్తి దుక్కటస్స. అనుజానామి, భిక్ఖవే, బ్యత్తేన భిక్ఖునా పటిబలేన అనుసాసితున్తి.

అసమ్మతా అనుసాసన్తి. భగవతో ఏతమత్థం ఆరోచేసుం. న, భిక్ఖవే, అసమ్మతేన అనుసాసితబ్బో. యో అనుసాసేయ్య, ఆపత్తి దుక్కటస్స. అనుజానామి, భిక్ఖవే, సమ్మతేన అనుసాసితుం. ఏవఞ్చ పన, భిక్ఖవే, సమ్మన్నితబ్బో [సమ్మనితబ్బో (క.)] – అత్తనా వా [అత్తనావ (స్యా.)] అత్తానం సమ్మన్నితబ్బం, పరేన వా పరో సమ్మన్నితబ్బో.

కథఞ్చ అత్తనావ అత్తానం సమ్మన్నితబ్బం? బ్యత్తేన భిక్ఖునా పటిబలేన సఙ్ఘో ఞాపేతబ్బో – ‘‘సుణాతు మే, భన్తే, సఙ్ఘో. ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో. యది సఙ్ఘస్స పత్తకల్లం, అహం ఇత్థన్నామం అనుసాసేయ్య’’న్తి. ఏవం అత్తనావ అత్తానం సమ్మన్నితబ్బం.

కథఞ్చ పన పరేన పరో సమ్మన్నితబ్బో? బ్యత్తేన భిక్ఖునా పటిబలేన సఙ్ఘో ఞాపేతబ్బో – ‘‘సుణాతు మే, భన్తే, సఙ్ఘో. ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో. యది సఙ్ఘస్స పత్తకల్లం, ఇత్థన్నామో ఇత్థన్నామం అనుసాసేయ్యా’’తి. ఏవం పరేన పరో సమ్మన్నితబ్బో.

తేన సమ్మతేన భిక్ఖునా ఉపసమ్పదాపేక్ఖో ఉపసఙ్కమిత్వా ఏవమస్స వచనీయో – ‘‘సుణసి, ఇత్థన్నామ, అయం తే సచ్చకాలో భూతకాలో. యం జాతం తం సఙ్ఘమజ్ఝే పుచ్ఛన్తే సన్తం అత్థీతి వత్తబ్బం, అసన్తం నత్థీ’’తి వత్తబ్బం. మా ఖో విత్థాయి, మా ఖో మఙ్కు అహోసి. ఏవం తం పుచ్ఛిస్సన్తి – ‘‘సన్తి తే ఏవరూపా ఆబాధా – కుట్ఠం, గణ్డో, కిలాసో, సోసో, అపమారో? మనుస్సోసి? పురిసోసి? భుజిస్సోసి? అణణోసి? నసి రాజభటో? అనుఞ్ఞాతోసి మాతాపితూహి? పరిపుణ్ణవీసతివస్సోసి? పరిపుణ్ణం తే పత్తచీవరం? కింనామోసి? కోనామో తే ఉపజ్ఝాయో’’తి?

ఏకతో ఆగచ్ఛన్తి. న, భిక్ఖవే, ఏకతో ఆగన్తబ్బం. అనుసాసకేన పఠమతరం ఆగన్త్వా సఙ్ఘో ఞాపేతబ్బో – ‘‘సుణాతు మే, భన్తే, సఙ్ఘో. ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో. అనుసిట్ఠో సో మయా. యది సఙ్ఘస్స పత్తకల్లం, ఇత్థన్నామో ఆగచ్ఛేయ్యా’’తి. ఆగచ్ఛాహీతి వత్తబ్బో.

ఏకంసం ఉత్తరాసఙ్గం కారాపేత్వా భిక్ఖూనం పాదే వన్దాపేత్వా ఉక్కుటికం నిసీదాపేత్వా అఞ్జలిం పగ్గణ్హాపేత్వా ఉపసమ్పదం యాచాపేతబ్బో – ‘‘సఙ్ఘం, భన్తే, ఉపసమ్పదం యాచామి. ఉల్లుమ్పతు మం, భన్తే, సఙ్ఘో అనుకమ్పం ఉపాదాయ. దుతియమ్పి, భన్తే, సఙ్ఘం ఉపసమ్పదం యాచామి. ఉల్లుమ్పతు మం, భన్తే, సఙ్ఘో అనుకమ్పం ఉపాదాయ. తతియమ్పి, భన్తే, సఙ్ఘం ఉపసమ్పదం యాచామి. ఉల్లుమ్పతు మం, భన్తే, సఙ్ఘో అనుకమ్పం ఉపాదాయా’’తి. బ్యత్తేన భిక్ఖునా పటిబలేన సఙ్ఘో ఞాపేతబ్బో –

‘‘సుణాతు మే, భన్తే, సఙ్ఘో. అయం ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో. యది సఙ్ఘస్స పత్తకల్లం, అహం ఇత్థన్నామం అన్తరాయికే ధమ్మే పుచ్ఛేయ్య’’న్తి? సుణసి, ఇత్థన్నామ, అయం తే సచ్చకాలో భూతకాలో. యం జాతం తం పుచ్ఛామి. సన్తం అత్థీతి వత్తబ్బం, అసన్తం నత్థీతి వత్తబ్బం. సన్తి తే ఏవరూపా ఆబాధా – కుట్ఠం గణ్డో కిలేసో సోసో అపమారో, మనుస్సోసి, పురిసోసి, భుజిస్సోసి, అణణోసి, నసి రాజభటో, అనుఞ్ఞాతోసి మాతాపితూహి, పరిపుణ్ణవీసతివస్సోసి, పరిపుణ్ణం తే పత్తచీవరం, కింనామోసి, కోనామో తే ఉపజ్ఝాయోతి? బ్యత్తేన భిక్ఖునా పటిబలేన సఙ్ఘో ఞాపేతబ్బో –

౧౨౭. ‘‘సుణాతు మే, భన్తే, సఙ్ఘో. అయం ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో, పరిసుద్ధో అన్తరాయికేహి ధమ్మేహి, పరిపుణ్ణస్స పత్తచీవరం. ఇత్థన్నామో సఙ్ఘం ఉపసమ్పదం యాచతి ఇత్థన్నామేన ఉపజ్ఝాయేన. యది సఙ్ఘస్స పత్తకల్లం, సఙ్ఘో ఇత్థన్నామం ఉపసమ్పాదేయ్య ఇత్థన్నామేన ఉపజ్ఝాయేన. ఏసా ఞత్తి.

‘‘సుణాతు మే, భన్తే, సఙ్ఘో. అయం ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో, పరిసుద్ధో అన్తరాయికేహి ధమ్మేహి, పరిపుణ్ణస్స పత్తచీవరం. ఇత్థన్నామో సఙ్ఘం ఉపసమ్పదం యాచతి ఇత్థన్నామేన ఉపజ్ఝాయేన. సఙ్ఘో ఇత్థన్నామం ఉపసమ్పాదేతి ఇత్థన్నామేన ఉపజ్ఝాయేన. యస్సాయస్మతో ఖమతి ఇత్థన్నామస్స ఉపసమ్పదా ఇత్థన్నామేన ఉపజ్ఝాయేన, సో తుణ్హస్స; యస్స నక్ఖమతి, సో భాసేయ్య.

‘‘దుతియమ్పి ఏతమత్థం వదామి – సుణాతు మే, భన్తే, సఙ్ఘో. అయం ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో, పరిసుద్ధో అన్తరాయికేహి ధమ్మేహి, పరిపుణ్ణస్స పత్తచీవరం. ఇత్థన్నామో సఙ్ఘం ఉపసమ్పదం యాచతి ఇత్థన్నామేన ఉపజ్ఝాయేన. సఙ్ఘో ఇత్థన్నామం ఉపసమ్పాదేతి ఇత్థన్నామేన ఉపజ్ఝాయేన. యస్సాయస్మతో ఖమతి ఇత్థన్నామస్స ఉపసమ్పదా ఇత్థన్నామేన ఉపజ్ఝాయేన, సో తుణ్హస్స; యస్స నక్ఖమతి, సో భాసేయ్య.

‘‘తతియమ్పి ఏతమత్థం వదామి – సుణాతు మే, భన్తే, సఙ్ఘో. అయం ఇత్థన్నామో ఇత్థన్నామస్స ఆయస్మతో ఉపసమ్పదాపేక్ఖో, పరిసుద్ధో అన్తరాయికేహి ధమ్మేహి, పరిపుణ్ణస్స పత్తచీవరం. ఇత్థన్నామో సఙ్ఘం ఉపసమ్పదం యాచతి ఇత్థన్నామేన ఉపజ్ఝాయేన. సఙ్ఘో ఇత్థన్నామం ఉపసమ్పాదేతి ఇత్థన్నామేన ఉపజ్ఝాయేన. యస్సాయస్మతో ఖమతి ఇత్థన్నామస్స ఉపసమ్పదా ఇత్థన్నామేన ఉపజ్ఝాయేన, సో తుణ్హస్స; యస్స నక్ఖమతి, సో భాసేయ్య.

‘‘ఉపసమ్పన్నో సఙ్ఘేన ఇత్థన్నామో ఇత్థన్నామేన ఉపజ్ఝాయేన. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.

ఉపసమ్పదాకమ్మం నిట్ఠితం.