౫౯. గమికాదినిస్సయవత్థూని

౧౨౧. తేన ఖో పన సమయేన అఞ్ఞతరో భిక్ఖు కోసలేసు జనపదే అద్ధానమగ్గప్పటిపన్నో హోతి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘న అనిస్సితేన వత్థబ్బ’న్తి. అహఞ్చమ్హి నిస్సయకరణీయో అద్ధానమగ్గప్పటిపన్నో, కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, అద్ధానమగ్గప్పటిపన్నేన భిక్ఖునా నిస్సయం అలభమానేన అనిస్సితేన వత్థున్తి.

తేన ఖో పన సమయేన ద్వే భిక్ఖూ కోసలేసు జనపదే అద్ధానమగ్గప్పటిపన్నా హోన్తి. తే అఞ్ఞతరం ఆవాసం ఉపగచ్ఛింసు. తత్థ ఏకో భిక్ఖు గిలానో హోతి. అథ ఖో తస్స గిలానస్స భిక్ఖునో ఏతదహోసి – ‘‘భగవతా పఞ్ఞత్తం ‘న అనిస్సితేన వత్థబ్బ’న్తి. అహఞ్చమ్హి నిస్సయకరణీయో గిలానో, కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, గిలానేన భిక్ఖునా నిస్సయం అలభమానేన అనిస్సితేన వత్థున్తి.

అథ ఖో తస్స గిలానుపట్ఠాకస్స భిక్ఖునో ఏతదహోసి – ‘‘భగవతా పఞ్ఞత్తం ‘న అనిస్సితేన వత్థబ్బ’న్తి. అహఞ్చమ్హి నిస్సయకరణీయో, అయఞ్చ భిక్ఖు గిలానో, కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, గిలానుపట్ఠాకేన భిక్ఖునా నిస్సయం అలభమానేన యాచియమానేన అనిస్సితేన వత్థున్తి.

తేన ఖో పన సమయేన అఞ్ఞతరో భిక్ఖు అరఞ్ఞే విహరతి. తస్స చ తస్మిం సేనాసనే ఫాసు హోతి. అథ ఖో తస్స భిక్ఖునో ఏతదహోసి – ‘‘భగవతా పఞ్ఞత్తం ‘న అనిస్సితేన వత్థబ్బ’న్తి. అహఞ్చమ్హి నిస్సయకరణీయో అరఞ్ఞే విహరామి, మయ్హఞ్చ ఇమస్మిం సేనాసనే ఫాసు హోతి, కథం ను ఖో మయా పటిపజ్జితబ్బ’’న్తి? భగవతో ఏతమత్థం ఆరోచేసుం. అనుజానామి, భిక్ఖవే, ఆరఞ్ఞికేన భిక్ఖునా ఫాసువిహారం సల్లక్ఖేన్తేన నిస్సయం అలభమానేన అనిస్సితేన వత్థుం – యదా పతిరూపో నిస్సయదాయకో ఆగచ్ఛిస్సతి, తదా తస్స నిస్సాయ వసిస్సామీతి.