౪౭. పణ్డకవత్థు

౧౦౯. తేన ఖో పన సమయేన అఞ్ఞతరో పణ్డకో భిక్ఖూసు పబ్బజితో హోతి. సో దహరే దహరే భిక్ఖూ ఉపసఙ్కమిత్వా ఏవం వదేతి – ‘‘ఏథ, మం ఆయస్మన్తో దూసేథా’’తి. భిక్ఖూ అపసాదేన్తి – ‘‘నస్స, పణ్డక, వినస్స, పణ్డక, కో తయా అత్థో’’తి. సో భిక్ఖూహి అపసాదితో మహన్తే మహన్తే మోళిగల్లే సామణేరే ఉపసఙ్కమిత్వా ఏవం వదేతి – ‘‘ఏథ, మం ఆవుసో దూసేథా’’తి. సామణేరా అపసాదేన్తి – ‘‘నస్స, పణ్డక, వినస్స, పణ్డక, కో తయా అత్థో’’తి. సో సామణేరేహి అపసాదితో హత్థిభణ్డే అస్సభణ్డే ఉపసఙ్కమిత్వా ఏవం వదేతి – ‘‘ఏథ, మం, ఆవుసో, దూసేథా’’తి. హత్థిభణ్డా అస్సభణ్డా దూసేసుం. తే ఉజ్ఝాయన్తి ఖియ్యన్తి విపాచేన్తి – ‘‘పణ్డకా ఇమే సమణా సక్యపుత్తియా. యేపి ఇమేసం న పణ్డకా, తేపి ఇమే పణ్డకే దూసేన్తి. ఏవం ఇమే సబ్బేవ అబ్రహ్మచారినో’’తి. అస్సోసుం ఖో భిక్ఖూ తేసం హత్థిభణ్డానం అస్సభణ్డానం ఉజ్ఝాయన్తానం ఖియ్యన్తానం విపాచేన్తానం. అథ ఖో తే భిక్ఖూ భగవతో ఏతమత్థం ఆరోచేసుం. పణ్డకో, భిక్ఖవే, అనుపసమ్పన్నో న ఉపసమ్పాదేతబ్బో, ఉపసమ్పన్నో నాసేతబ్బోతి.