౨౯. కారభేదకచోరవత్థు

౯౨. తేన ఖో పన సమయేన రఞ్ఞా మాగధేన సేనియేన బిమ్బిసారేన అనుఞ్ఞాతం హోతి – ‘‘యే సమణేసు సక్యపుత్తియేసు పబ్బజన్తి, న తే లబ్భా కిఞ్చి కాతుం; స్వాక్ఖాతో ధమ్మో, చరన్తు బ్రహ్మచరియం సమ్మా దుక్ఖస్స అన్తకిరియాయా’’తి. తేన ఖో పన సమయేన అఞ్ఞతరో పురిసో చోరికం కత్వా కారాయ బద్ధో హోతి. సో కారం భిన్దిత్వా పలాయిత్వా భిక్ఖూసు పబ్బజితో హోతి. మనుస్సా పస్సిత్వా ఏవమాహంసు – ‘‘అయం సో కారభేదకో చోరో. హన్ద, నం నేమా’’తి. ఏకచ్చే ఏవమాహంసు – ‘‘మాయ్యో, ఏవం అవచుత్థ. అనుఞ్ఞాతం రఞ్ఞా మాగధేన సేనియేన బిమ్బిసారేన – ‘‘యే సమణేసు సక్యపుత్తియేసు పబ్బజన్తి, న తే లబ్భా కిఞ్చి కాతుం; స్వాక్ఖాతో ధమ్మో, చరన్తు బ్రహ్మచరియం సమ్మా దుక్ఖస్స అన్తకిరియాయా’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘అభయూవరా ఇమే సమణా సక్యపుత్తియా, నయిమే లబ్భా కిఞ్చి కాతుం. కథఞ్హి నామ సమణా సక్యపుత్తియా కారభేదకం చోరం పబ్బాజేస్సన్తీ’’తి. భగవతో ఏతమత్థం ఆరోచేసుం. న, భిక్ఖవే, కారభేదకో చోరో పబ్బాజేతబ్బో. యో పబ్బాజేయ్య, ఆపత్తి దుక్కటస్సాతి.

కారభేదకచోరవత్థు నిట్ఠితం.