౩౦. లిఖితకచోరవత్థు

౯౩. తేన ఖో పన సమయేన అఞ్ఞతరో పురిసో చోరికం కత్వా పలాయిత్వా భిక్ఖూసు పబ్బజితో హోతి. సో చ రఞ్ఞో అన్తేపురే లిఖితో హోతి – యత్థ పస్సతి, తత్థ హన్తబ్బోతి. మనుస్సా పస్సిత్వా ఏవమాహంసు – ‘‘అయం సో లిఖితకో చోరో. హన్ద, నం హనామా’’తి. ఏకచ్చే ఏవమాహంసు – ‘‘మాయ్యో, ఏవం అవచుత్థ. అనుఞ్ఞాతం రఞ్ఞా మాగధేన సేనియేన బిమ్బిసారేన ‘‘యే సమణేసు సక్యపుత్తియేసు పబ్బజన్తి, న తే లబ్భా కిఞ్చి కాతుం, స్వాక్ఖాతో ధమ్మో, చరన్తు బ్రహ్మచరియం సమ్మా దుక్ఖస్స అన్తకిరియాయా’’తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘అభయూవరా ఇమే సమణా సక్యపుత్తియా, నయిమే లబ్భా కిఞ్చి కాతుం. కథఞ్హి నామ సమణా సక్యపుత్తియా లిఖితకం చోరం పబ్బాజేస్సన్తీ’’తి. భగవతో ఏతమత్థం ఆరోచేసుం. న, భిక్ఖవే, లిఖితకో చోరో పబ్బాజేతబ్బో. యో పబ్బాజేయ్య, ఆపత్తి దుక్కటస్సాతి.

లిఖితకచోరవత్థు నిట్ఠితం.