౨౮. అఙ్గులిమాలచోరవత్థు

౯౧. తేన ఖో పన సమయేన చోరో అఙ్గులిమాలో భిక్ఖూసు పబ్బజితో హోతి. మనుస్సా పస్సిత్వా ఉబ్బిజ్జన్తిపి, ఉత్తసన్తిపి, పలాయన్తిపి, అఞ్ఞేనపి గచ్ఛన్తి, అఞ్ఞేనపి ముఖం కరోన్తి, ద్వారమ్పి థకేన్తి. మనుస్సా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా ధజబన్ధం చోరం పబ్బాజేస్సన్తీ’’తి. అస్సోసుం ఖో భిక్ఖూ తేసం మనుస్సానం ఉజ్ఝాయన్తానం ఖియ్యన్తానం విపాచేన్తానం. అథ ఖో తే భిక్ఖూ భగవతో ఏతమత్థం ఆరోచేసుం…పే… న, భిక్ఖవే, ధజబన్ధో చోరో పబ్బాజేతబ్బో. యో పబ్బాజేయ్య, ఆపత్తి దుక్కటస్సాతి.

అఙ్గులిమాలచోరవత్థు నిట్ఠితం.