౨౭. రాజభటవత్థు

౯౦. తేన ఖో పన సమయేన రఞ్ఞో మాగధస్స సేనియస్స బిమ్బిసారస్స పచ్చన్తో కుపితో హోతి. అథ ఖో రాజా మాగధో సేనియో బిమ్బిసారో సేనానాయకే మహామత్తే ఆణాపేసి – ‘‘గచ్ఛథ, భణే, పచ్చన్తం ఉచ్చినథా’’తి. ‘‘ఏవం, దేవా’’తి ఖో సేనానాయకా మహామత్తా రఞ్ఞో మాగధస్స సేనియస్స బిమ్బిసారస్స పచ్చస్సోసుం. అథ ఖో అభిఞ్ఞాతానం అభిఞ్ఞాతానం యోధానం ఏతదహోసి – ‘‘మయం ఖో యుద్ధాభినన్దినో గచ్ఛన్తా పాపఞ్చ కరోమ, బహుఞ్చ అపుఞ్ఞం పసవామ. కేన ను ఖో మయం ఉపాయేన పాపా చ విరమేయ్యామ కల్యాణఞ్చ కరేయ్యామా’’తి? అథ ఖో తేసం యోధానం ఏతదహోసి – ‘‘ఇమే ఖో సమణా సక్యపుత్తియా ధమ్మచారినో సమచారినో బ్రహ్మచారినో సచ్చవాదినో సీలవన్తో కల్యాణధమ్మా. సచే ఖో మయం సమణేసు సక్యపుత్తియేసు పబ్బజేయ్యామ, ఏవం మయం పాపా చ విరమేయ్యామ కల్యాణఞ్చ కరేయ్యామా’’తి. అథ ఖో తే యోధా భిక్ఖూ ఉపసఙ్కమిత్వా పబ్బజ్జం యాచింసు. తే భిక్ఖూ పబ్బాజేసుం, ఉపసమ్పాదేసుం. సేనానాయకా మహామత్తా రాజభటే పుచ్ఛింసు – ‘‘కిం ను ఖో, భణే, ఇత్థన్నామో చ ఇత్థన్నామో చ యోధా న దిస్సన్తీ’’తి? ‘‘ఇత్థన్నామో చ ఇత్థన్నామో చ, సామి, యోధా భిక్ఖూసు పబ్బజితా’’తి. సేనానాయకా మహామత్తా ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ సమణా సక్యపుత్తియా రాజభటం పబ్బాజేస్సన్తీ’’తి. సేనానాయకా మహామత్తా రఞ్ఞో మాగధస్స సేనియస్స బిమ్బిసారస్స ఏతమత్థం ఆరోచేసుం. అథ ఖో రాజా మాగధో సేనియో బిమ్బిసారో వోహారికే మహామత్తే పుచ్ఛి – ‘‘యో, భణే, రాజభటం పబ్బాజేతి, కిం సో పసవతీ’’తి? ‘‘ఉపజ్ఝాయస్స, దేవ, సీసం ఛేతబ్బం, అనుస్సావకస్స [అనుసావకస్స (క.)] జివ్హా ఉద్ధరితబ్బా, గణస్స ఉపడ్ఢఫాసుకా భఞ్జితబ్బా’’తి. అథ ఖో రాజా మాగధో సేనియో బిమ్బిసారో యేన భగవా తేనుపసఙ్కమి, ఉపసఙ్కమిత్వా భగవన్తం అభివాదేత్వా ఏకమన్తం నిసీది. ఏకమన్తం నిసిన్నో ఖో రాజా మాగధో సేనియో బిమ్బిసారో భగవన్తం ఏతదవోచ – ‘‘సన్తి, భన్తే, రాజానో అస్సద్ధా అప్పసన్నా. తే అప్పమత్తకేనపి భిక్ఖూ విహేఠేయ్యుం. సాధు, భన్తే, అయ్యా రాజభటం న పబ్బాజేయ్యు’’న్తి. అథ ఖో భగవా రాజానం మాగధం సేనియం బిమ్బిసారం ధమ్మియా కథాయ సన్దస్సేసి సమాదపేసి సముత్తేజేసి సమ్పహంసేసి. అథ ఖో రాజా మాగధో సేనియో బిమ్బిసారో భగవతా ధమ్మియా కథాయ సన్దస్సితో సమాదపితో సముత్తేజితో సమ్పహంసితో ఉట్ఠాయాసనా భగవన్తం అభివాదేత్వా పదక్ఖిణం కత్వా పక్కామి. అథ ఖో భగవా ఏతస్మిం నిదానే ఏతస్మిం పకరణే ధమ్మిం కథం కత్వా భిక్ఖూ ఆమన్తేసి – ‘‘న, భిక్ఖవే, రాజభటో పబ్బాజేతబ్బో. యో పబ్బాజేయ్య, ఆపత్తి దుక్కటస్సా’’తి.

రాజభటవత్థు నిట్ఠితం.