౫. ఆపత్తియా అదస్సనే ఉక్ఖేపనీయకమ్మం
౪౬. తేన సమయేన బుద్ధో భగవా కోసమ్బియం విహరతి ఘోసితారామే. తేన ఖో పన సమయేన ఆయస్మా ఛన్నో ఆపత్తిం ఆపజ్జిత్వా న ఇచ్ఛతి ఆపత్తిం పస్సితుం. యే తే భిక్ఖూ అప్పిచ్ఛా…పే… తే ఉజ్ఝాయన్తి ఖియ్యన్తి విపాచేన్తి – ‘‘కథఞ్హి నామ ఆయస్మా ఛన్నో ఆపత్తిం ఆపజ్జిత్వా న ఇచ్ఛిస్సతి ఆపత్తిం పస్సితు’’న్తి. అథ ఖో తే భిక్ఖూ భగవతో ఏతమత్థం ఆరోచేసుం.
అథ ఖో భగవా ఏతస్మిం నిదానే ఏతస్మిం పకరణే భిక్ఖుసఙ్ఘం సన్నిపాతాపేత్వా భిక్ఖూ పటిపుచ్ఛి – ‘‘సచ్చం కిర, భిక్ఖవే, ఛన్నో భిక్ఖు ఆపత్తిం ఆపజ్జిత్వా న ఇచ్ఛతి ఆపత్తిం పస్సితు’’న్తి? ‘‘సచ్చం భగవా’’తి. విగరహి బుద్ధో భగవా – ‘‘అననుచ్ఛవికం…పే… కథఞ్హి నామ సో, భిక్ఖవే, మోఘపురిసో ఆపత్తిం ఆపజ్జిత్వా న ఇచ్ఛిస్సతి ఆపత్తిం పస్సితుం? నేతం, భిక్ఖవే, అప్పసన్నానం వా పసాదాయ…పే… విగరహిత్వా…పే… ధమ్మిం కథం కత్వా భిక్ఖూ ఆమన్తేసి – తేన హి, భిక్ఖవే, సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం కరోతు – అసమ్భోగం సఙ్ఘేన. ఏవఞ్చ పన, భిక్ఖవే, కాతబ్బం – పఠమం ఛన్నో భిక్ఖు చోదేతబ్బో, చోదేత్వా సారేతబ్బో, సారేత్వా ఆపత్తిం ఆరోపేతబ్బో, ఆపత్తిం ఆరోపేత్వా బ్యత్తేన భిక్ఖునా పటిబలేన సఙ్ఘో ఞాపేతబ్బో –
౪౭. ‘‘సుణాతు మే, భన్తే, సఙ్ఘో. అయం ఛన్నో భిక్ఖు ఆపత్తిం ఆపజ్జిత్వా న ఇచ్ఛతి ఆపత్తిం పస్సితుం. యది సఙ్ఘస్స పత్తకల్లం, సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం కరేయ్య – అసమ్భోగం సఙ్ఘేన. ఏసా ఞత్తి.
‘‘సుణాతు మే, భన్తే, సఙ్ఘో. అయం ఛన్నో భిక్ఖు ఆపత్తిం ఆపజ్జిత్వా న ఇచ్ఛతి ఆపత్తిం పస్సితుం. సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం కరోతి – అసమ్భోగం సఙ్ఘేన. యస్సాయస్మతో ఖమతి ఛన్నస్స భిక్ఖునో, ఆపత్తియా అదస్సనే, ఉక్ఖేపనీయస్స కమ్మస్స కరణం – అసమ్భోగం సఙ్ఘేన, సో తుణ్హస్స; యస్స నక్ఖమతి, సో భాసేయ్య.
‘‘దుతియమ్పి ఏతమత్థం వదామి…పే… తతియమ్పి ఏతమత్థం వదామి – సుణాతు మే, భన్తే, సఙ్ఘో. అయం ఛన్నో భిక్ఖు ఆపత్తిం ఆపజ్జిత్వా న ఇచ్ఛతి ఆపత్తిం పస్సితుం. సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం కరోతి – అసమ్భోగం సఙ్ఘేన. యస్సాయస్మతో ఖమతి ఛన్నస్స భిక్ఖునో, ఆపత్తియా అదస్సనే, ఉక్ఖేపనీయస్స కమ్మస్స కరణం – అసమ్భోగం సఙ్ఘేన, సో తుణ్హస్స; యస్స నక్ఖమతి, సో భాసేయ్య.
‘‘కతం సఙ్ఘేన ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం – అసమ్భోగం సఙ్ఘేన. ఖమతి సఙ్ఘస్స, తస్మా తుణ్హీ, ఏవమేతం ధారయామీతి.
‘‘ఆవాసపరమ్పరఞ్చ, భిక్ఖవే, సంసథ – ‘ఛన్నో భిక్ఖు సఙ్ఘేన ఆపత్తియా [ఛన్నో భిక్ఖు ఆపత్తియా (సీ. క.)] అదస్సనే ఉక్ఖేపనీయకమ్మకతో – అసమ్భోగం సఙ్ఘేనా’తి.
అధమ్మకమ్మద్వాదసకం
౪౮. ‘‘తీహి, భిక్ఖవే, అఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం అధమ్మకమ్మఞ్చ హోతి, అవినయకమ్మఞ్చ, దువూపసన్తఞ్చ. అసమ్ముఖా కతం హోతి, అప్పటిపుచ్ఛా కతం హోతి, అప్పటిఞ్ఞాయ కతం హోతి – ఇమేహి ఖో, భిక్ఖవే, తీహఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం అధమ్మకమ్మఞ్చ హోతి, అవినయకమ్మఞ్చ, దువూపసన్తఞ్చ.
‘‘అపరేహిపి, భిక్ఖవే, తీహఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం అధమ్మకమ్మఞ్చ హోతి, అవినయకమ్మఞ్చ, దువూపసన్తఞ్చ. అనాపత్తియా కతం హోతి, అదేసనాగామినియా ఆపత్తియా కతం హోతి, దేసితాయ ఆపత్తియా కతం హోతి…పే… అచోదేత్వా కతం హోతి, అసారేత్వా కతం హోతి, ఆపత్తిం అనారోపేత్వా కతం హోతి…పే… అసమ్ముఖా కతం హోతి, అధమ్మేన కతం హోతి, వగ్గేన కతం హోతి…పే… అప్పటిపుచ్ఛా కతం హోతి, అధమ్మేన కతం హోతి, వగ్గేన కతం హోతి…పే… అప్పటిఞ్ఞాయ కతం హోతి, అధమ్మేన కతం హోతి, వగ్గేన కతం హోతి…పే… అనాపత్తియా కతం హోతి, అధమ్మేన కతం హోతి, వగ్గేన కతం హోతి…పే… అదేసనాగామినియా ఆపత్తియా కతం హోతి, అధమ్మేన కతం హోతి, వగ్గేన కతం హోతి…పే… దేసితాయ ఆపత్తియా కతం హోతి, అధమ్మేన కతం హోతి, వగ్గేన కతం హోతి…పే… అచోదేత్వా కతం హోతి, అధమ్మేన కతం హోతి, వగ్గేన కతం హోతి…పే… అసారేత్వా కతం హోతి, అధమ్మేన కతం హోతి, వగ్గేన కతం హోతి…పే… ఆపత్తిం అనారోపేత్వా కతం హోతి, అధమ్మేన కతం హోతి, వగ్గేన కతం హోతి – ఇమేహి ఖో, భిక్ఖవే, తీహఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం అధమ్మకమ్మఞ్చ హోతి, అవినయకమ్మఞ్చ, దువూపసన్తఞ్చ.
ఆపత్తియా అదస్సనే ఉక్ఖేపనీయకమ్మే అధమ్మకమ్మద్వాదసకం నిట్ఠితం.
ధమ్మకమ్మద్వాదసకం
౪౯. ‘‘తీహి, భిక్ఖవే, అఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం ధమ్మకమ్మఞ్చ హోతి, వినయకమ్మఞ్చ, సువూపసన్తఞ్చ. సమ్ముఖా కతం హోతి, పటిపుచ్ఛా కతం హోతి, పటిఞ్ఞాయ కతం హోతి – ఇమేహి ఖో, భిక్ఖవే, తీహఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం ధమ్మకమ్మఞ్చ హోతి, వినయకమ్మఞ్చ, సువూపసన్తఞ్చ.
‘‘అపరేహిపి, భిక్ఖవే, తీహఙ్గేహి సమన్నాగతం…పే…. ఆపత్తియా కతం హోతి, దేసనాగామినియా ఆపత్తియా కతం హోతి, అదేసితాయ ఆపత్తియా కతం హోతి…పే… చోదేత్వా కతం హోతి, సారేత్వా కతం హోతి, ఆపత్తిం ఆరోపేత్వా కతం హోతి…పే… సమ్ముఖా కతం హోతి, ధమ్మేన కతం హోతి, సమగ్గేన కతం హోతి…పే… పటిపుచ్ఛా కతం హోతి, ధమ్మేన కతం హోతి, సమగ్గేన కతం హోతి…పే… పటిఞ్ఞాయ కతం హోతి, ధమ్మేన కతం హోతి, సమగ్గేన కతం హోతి…పే… ఆపత్తియా కతం హోతి, ధమ్మేన కతం హోతి, సమగ్గేన కతం హోతి…పే… దేసనాగామినియా ఆపత్తియా కతం హోతి, ధమ్మేన కతం హోతి, సమగ్గేన కతం హోతి…పే… అదేసితాయ ఆపత్తియా కతం హోతి, ధమ్మేన కతం హోతి, సమగ్గేన కతం హోతి…పే… చోదేత్వా కతం హోతి, ధమ్మేన కతం హోతి, సమగ్గేన కతం హోతి…పే… సారేత్వా కతం హోతి, ధమ్మేన కతం హోతి, సమగ్గేన కతం హోతి…పే… ఆపత్తిం ఆరోపేత్వా కతం హోతి, ధమ్మేన కతం హోతి, సమగ్గేన కతం హోతి – ఇమేహి ఖో, భిక్ఖవే, తీహఙ్గేహి సమన్నాగతం, ఆపత్తియా అదస్సనే, ఉక్ఖేపనీయకమ్మం ధమ్మకమ్మఞ్చ హోతి, వినయకమ్మఞ్చ, సువూపసన్తఞ్చ.
ఆపత్తియా అదస్సనే ఉక్ఖేపనీయకమ్మే ధమ్మకమ్మద్వాదసకం నిట్ఠితం.
ఆకఙ్ఖమానఛక్కం
౫౦. [పరి. ౩౨౩] ‘‘తీహి, భిక్ఖవే, అఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. భణ్డనకారకో హోతి కలహకారకో వివాదకారకో భస్సకారకో సఙ్ఘే అధికరణకారకో; బాలో హోతి అబ్యత్తో ఆపత్తిబహులో అనపదానో; గిహిసంసట్ఠో విహరతి అననులోమికేహి గిహిసంసగ్గేహి – ఇమేహి ఖో, భిక్ఖవే, తీహఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
‘‘అపరేహిపి, భిక్ఖవే, తీహఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. అధిసీలే సీలవిపన్నో హోతి, అజ్ఝాచారే ఆచారవిపన్నో హోతి, అతిదిట్ఠియా దిట్ఠివిపన్నో హోతి – ఇమేహి ఖో, భిక్ఖవే, తీహఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
‘‘అపరేహిపి, భిక్ఖవే, తీహఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. బుద్ధస్స అవణ్ణం భాసతి, ధమ్మస్స అవణ్ణం భాసతి, సఙ్ఘస్స అవణ్ణం భాసతి – ఇమేహి ఖో, భిక్ఖవే, తీహఙ్గేహి సమన్నాగతస్స భిక్ఖునో, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
‘‘తిణ్ణం, భిక్ఖవే, భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. ఏకో భణ్డనకారకో హోతి కలహకారకో వివాదకారకో భస్సకారకో సఙ్ఘే అధికరణకారకో; ఏకో బాలో హోతి అబ్యత్తో ఆపత్తిబహులో అనపదానో; ఏకో గిహిసంసట్ఠో విహరతి అననులోమికేహి గిహిసంసగ్గేహి – ఇమేసం ఖో, భిక్ఖవే, తిణ్ణం భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
‘‘అపరేసమ్పి, భిక్ఖవే, తిణ్ణం భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. ఏకో అధిసీలే సీలవిపన్నో హోతి, ఏకో అజ్ఝాచారే ఆచారవిపన్నో హోతి, ఏకో అతిదిట్ఠియా దిట్ఠివిపన్నో హోతి – ఇమేసం ఖో, భిక్ఖవే, తిణ్ణం భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
‘‘అపరేసమ్పి, భిక్ఖవే, తిణ్ణం భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య. ఏకో బుద్ధస్స అవణ్ణం భాసతి, ఏకో ధమ్మస్స అవణ్ణం భాసతి, ఏకో సఙ్ఘస్స అవణ్ణం భాసతి – ఇమేసం ఖో, భిక్ఖవే, తిణ్ణం భిక్ఖూనం, ఆకఙ్ఖమానో సఙ్ఘో, ఆపత్తియా అదస్సనే, ఉక్ఖేపనీయకమ్మం కరేయ్య.
ఆపత్తియా అదస్సనే ఉక్ఖేపనీయకమ్మే
ఆకఙ్ఖమానఛక్కం నిట్ఠితం.
తేచత్తాలీసవత్తం
౫౧. ‘‘ఆపత్తియా అదస్సనే ఉక్ఖేపనీయకమ్మకతేన, భిక్ఖవే, భిక్ఖునా సమ్మా వత్తితబ్బం. తత్రాయం సమ్మావత్తనా – న ఉపసమ్పాదేతబ్బం, న నిస్సయో దాతబ్బో, న సామణేరో ఉపట్ఠాపేతబ్బో, న భిక్ఖునోవాదకసమ్ముతి సాదితబ్బా, సమ్మతేనపి భిక్ఖునియో న ఓవదితబ్బా. యాయ ఆపత్తియా సఙ్ఘేన, ఆపత్తియా అదస్సనే, ఉక్ఖేపనీయకమ్మం కతం హోతి సా ఆపత్తి న ఆపజ్జితబ్బా, అఞ్ఞా వా తాదిసికా, తతో వా పాపిట్ఠతరా; కమ్మం న గరహితబ్బం, కమ్మికా న గరహితబ్బా. న పకతత్తస్స భిక్ఖునో అభివాదనం, పచ్చుట్ఠానం, అఞ్జలికమ్మం, సామీచికమ్మం, ఆసనాభిహారో, సేయ్యాభిహారో, పాదోదకం, పాదపీఠం పాదకథలికం, పత్తచీవరప్పటిగ్గహణం, నహానే పిట్ఠిపరికమ్మం సాదితబ్బం. న పకతత్తో భిక్ఖు సీలవిపత్తియా అనుద్ధంసేతబ్బో, న ఆచారవిపత్తియా అనుద్ధంసేతబ్బో, న దిట్ఠివిపత్తియా అనుద్ధంసేతబ్బో, న ఆజీవవిపత్తియా అనుద్ధంసేతబ్బో, న భిక్ఖు భిక్ఖూహి భేదేతబ్బో [న భిక్ఖూ భిక్ఖూహి భేదేతబ్బా (స్యా.)], న గిహిద్ధజో ధారేతబ్బో, న తిత్థియద్ధజో ధారేతబ్బో, న తిత్థియా సేవితబ్బా; భిక్ఖూ సేవితబ్బా, భిక్ఖుసిక్ఖాయ సిక్ఖితబ్బం [భిక్ఖుసిక్ఖా సిక్ఖితబ్బా (స్యా.)]. న పకతత్తేన భిక్ఖునా సద్ధిం ఏకచ్ఛన్నే ఆవాసే వత్థబ్బం, న ఏకచ్ఛన్నే అనావాసే వత్థబ్బం, న ఏకచ్ఛన్నే ఆవాసే వా అనావాసే వా వత్థబ్బం, పకతత్తం భిక్ఖుం దిస్వా ఆసనా వుట్ఠాతబ్బం, న పకతత్తో భిక్ఖు ఆసాదేతబ్బో అన్తో వా బహి వా. న పకతత్తస్స భిక్ఖునో ఉపోసథో ఠపేతబ్బో, న పవారణా ఠపేతబ్బా, న సవచనీయం కాతబ్బం, న అనువాదో పట్ఠపేతబ్బో, న ఓకాసో కారేతబ్బో, న చోదేతబ్బో, న సారేతబ్బో, న భిక్ఖూహి సమ్పయోజేతబ్బ’’న్తి.
ఆపత్తియా అదస్సనే ఉక్ఖేపనీయకమ్మే
తేచత్తాలీసవత్తం నిట్ఠితం.
౫౨. అథ ఖో సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం అకాసి – అసమ్భోగం సఙ్ఘేన. సో సఙ్ఘేన, ఆపత్తియా అదస్సనే, ఉక్ఖేపనీయకమ్మకతో తమ్హా ఆవాసా అఞ్ఞం ఆవాసం అగమాసి. తత్థ భిక్ఖూ నేవ అభివాదేసుం, న పచ్చుట్ఠేసుం, న అఞ్జలికమ్మం న సామీచికమ్మం అకంసు, న సక్కరింసు, న గరు కరింసు [న గరుకరింసు (క.)], న మానేసుం, న పూజేసుం. సో భిక్ఖూహి అసక్కరియమానో అగరుకరియమానో అమానియమానో అపూజియమానో అసక్కారపకతో తమ్హాపి ఆవాసా అఞ్ఞం ఆవాసం అగమాసి. తత్థపి భిక్ఖూ నేవ అభివాదేసుం, న పచ్చుట్ఠేసుం, న అఞ్జలికమ్మం న సామీచికమ్మం అకంసు, న సక్కరింసు, న గరుం కరింసు, న మానేసుం, న పూజేసుం. సో భిక్ఖూహి అసక్కరియమానో అగరుకరియమానో అమానియమానో అపూజియమానో అసక్కారపకతో తమ్హాపి ఆవాసా అఞ్ఞం ఆవాసం అగమాసి. తత్థపి భిక్ఖూ నేవ అభివాదేసుం, న పచ్చుట్ఠేసుం, న అఞ్జలికమ్మం న సామీచికమ్మం అకంసు, న సక్కరింసు, న గరుం కరింసు, న మానేసుం, న పూజేసుం. సో భిక్ఖూహి అసక్కరియమానో అగరుకరియమానో అమానియమానో అపూజియమానో అసక్కారపకతో పునదేవ కోసమ్బిం పచ్చాగఞ్ఛి. సో సమ్మా వత్తతి, లోమం పాతేతి, నేత్థారం వత్తతి, భిక్ఖూ ఉపసఙ్కమిత్వా ఏవం వదేతి – ‘‘అహం, ఆవుసో, సఙ్ఘేన, ఆపత్తియా అదస్సనే, ఉక్ఖేపనీయకమ్మకతో సమ్మా వత్తామి, లోమం పాతేమి, నేత్థారం వత్తామి. కథం ను ఖో మయా పటిపజ్జితబ్బ’’న్తి? భిక్ఖూ భగవతో ఏతమత్థం ఆరోచేసుం…పే…. ‘‘తేన హి, భిక్ఖవే, సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతు.
నప్పటిప్పస్సమ్భేతబ్బ-తేచత్తాలీసకం
౫౩. ‘‘పఞ్చహి, భిక్ఖవే, అఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. ఉపసమ్పాదేతి, నిస్సయం దేతి, సామణేరం ఉపట్ఠాపేతి, భిక్ఖునోవాదకసమ్ముతిం సాదియతి, సమ్మతోపి భిక్ఖునియో ఓవదతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
[పరి. ౪౨౦] ‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. యాయ ఆపత్తియా సఙ్ఘేన, ఆపత్తియా అదస్సనే, ఉక్ఖేపనీయకమ్మం కతం హోతి తం ఆపత్తిం ఆపజ్జతి, అఞ్ఞం వా తాదిసికం, తతో వా పాపిట్ఠతరం; కమ్మం గరహతి, కమ్మికే గరహతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. పకతత్తస్స భిక్ఖునో అభివాదనం, పచ్చుట్ఠానం, అఞ్జలికమ్మం, సామీచికమ్మం, ఆసనాభిహారం సాదియతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. పకతత్తస్స భిక్ఖునో సేయ్యాభిహారం, పాదోదకం పాదపీఠం, పాదకథలికం, పత్తచీవరప్పటిగ్గహణం, నహానే పిట్ఠిపరికమ్మం సాదియతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. పకతత్తం భిక్ఖుం సీలవిపత్తియా అనుద్ధంసేతి, ఆచారవిపత్తియా అనుద్ధంసేతి, దిట్ఠివిపత్తియా అనుద్ధంసేతి, ఆజీవవిపత్తియా అనుద్ధంసేతి, భిక్ఖుం [భిక్ఖూ (సీ. స్యా.)] భిక్ఖూహి భేదేతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. గిహిద్ధజం ధారేతి, తిత్థియద్ధజం ధారేతి, తిత్థియే సేవతి; భిక్ఖూ న సేవతి, భిక్ఖుసిక్ఖాయ న సిక్ఖతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. పకతత్తేన భిక్ఖునా సద్ధిం ఏకచ్ఛన్నే ఆవాసే వసతి, ఏకచ్ఛన్నే అనావాసే వసతి, ఏకచ్ఛన్నే ఆవాసే వా అనావాసే వా వసతి; పకతత్తం భిక్ఖుం దిస్వా ఆసనా న వుట్ఠాతి; పకతత్తం భిక్ఖుం ఆసాదేతి అన్తో వా బహి వా – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
‘‘అట్ఠహి, భిక్ఖవే, అఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం. పకతత్తస్స భిక్ఖునో ఉపోసథం ఠపేతి, పవారణం ఠపేతి, సవచనీయం కరోతి, అనువాదం పట్ఠపేతి, ఓకాసం కారేతి, చోదేతి, సారేతి, భిక్ఖూహి సమ్పయోజేతి – ఇమేహి ఖో, భిక్ఖవే, అట్ఠహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం నప్పటిప్పస్సమ్భేతబ్బం.
ఆపత్తియా అదస్సనే ఉక్ఖేపనీయకమ్మే
నప్పటిప్పస్సమ్భేతబ్బ-తేచత్తాలీసకం నిట్ఠితం.
పటిప్పస్సమ్భేతబ్బ-తేచత్తాలీసకం
౫౪. ‘‘పఞ్చహి, భిక్ఖవే, అఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న ఉపసమ్పాదేతి, న నిస్సయం దేతి, న సామణేరం ఉపట్ఠాపేతి, న భిక్ఖునోవాదకసమ్ముతిం సాదియతి, సమ్మతోపి భిక్ఖునియో న ఓవదతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. యాయ ఆపత్తియా సఙ్ఘేన ఆపత్తియా అదస్సనే ఉక్ఖేపనీయకమ్మం కతం హోతి తం ఆపత్తిం న ఆపజ్జతి, అఞ్ఞం వా తాదిసికం, తతో వా పాపిట్ఠతరం; కమ్మం న గరహతి, కమ్మికే న గరహతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న పకతత్తస్స భిక్ఖునో అభివాదనం, పచ్చుట్ఠానం, అఞ్జలికమ్మం, సామీచికమ్మం, ఆసనాభిహారం సాదియతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న పకతత్తస్స భిక్ఖునో సేయ్యాభిహారం, పాదోదకం పాదపీఠం, పాదకథలికం, పత్తచీవరప్పటిగ్గహణం, నహానే పిట్ఠిపరికమ్మం సాదియతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న పకతత్తం భిక్ఖుం సీలవిపత్తియా అనుద్ధంసేతి, న ఆచారవిపత్తియా అనుద్ధంసేతి, న దిట్ఠివిపత్తియా అనుద్ధంసేతి, న ఆజీవవిపత్తియా అనుద్ధంసేతి, న భిక్ఖుం భిక్ఖూహి భేదేతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న గిహిద్ధజం ధారేతి, న తిత్థియద్ధజం ధారేతి, న తిత్థియే సేవతి, భిక్ఖూ సేవతి, భిక్ఖుసిక్ఖాయ సిక్ఖతి – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అపరేహిపి, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న పకతత్తేన భిక్ఖునా సద్ధిం ఏకచ్ఛన్నే ఆవాసే వసతి, న ఏకచ్ఛన్నే అనావాసే వసతి, న ఏకచ్ఛన్నే ఆవాసే వా అనావాసే వా వసతి, పకతత్తం భిక్ఖుం దిస్వా ఆసనా వుట్ఠాతి, న పకతత్తం భిక్ఖుం ఆసాదేతి అన్తో వా బహి వా – ఇమేహి ఖో, భిక్ఖవే, పఞ్చహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
‘‘అట్ఠహి, భిక్ఖవే, అఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం. న పకతత్తస్స భిక్ఖునో ఉపోసథం ఠపేతి, న పవారణం ఠపేతి, న సవచనీయం కరోతి, న అనువాదం పట్ఠపేతి, న ఓకాసం కారేతి, న చోదేతి, న సారేతి, న భిక్ఖూహి సమ్పయోజేతి – ఇమేహి ఖో, భిక్ఖవే, అట్ఠహఙ్గేహి సమన్నాగతస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతబ్బం.
ఆపత్తియా అదస్సనే ఉక్ఖేపనీయకమ్మే
పటిప్పస్సమ్భేతబ్బతేచత్తాలీసకం నిట్ఠితం.
౫౫. ‘‘ఏవఞ్చ పన, భిక్ఖవే, పటిప్పస్సమ్భేతబ్బం. తేన, భిక్ఖవే, ఛన్నేన భిక్ఖునా సఙ్ఘం ఉపసఙ్కమిత్వా ఏకంసం ఉత్తరాసఙ్గం కరిత్వా వుడ్ఢానం భిక్ఖూనం పాదే వన్దిత్వా ఉక్కుటికం నిసీదిత్వా అఞ్జలిం పగ్గహేత్వా ఏవమస్స వచనీయో – ‘అహం, భన్తే, సఙ్ఘేన, ఆపత్తియా అదస్సనే, ఉక్ఖేపనీయకమ్మకతో సమ్మా వత్తామి, లోమం పాతేమి, నేత్థారం వత్తామి, ఆపత్తియా అదస్సనే ఉక్ఖేపనీయస్స కమ్మస్స పటిప్పస్సద్ధిం యాచామీ’తి. దుతియమ్పి యాచితబ్బా. తతియమ్పి యాచితబ్బా. బ్యత్తేన భిక్ఖునా పటిబలేన సఙ్ఘో ఞాపేతబ్బో –
‘‘సుణాతు మే, భన్తే, సఙ్ఘో. అయం ఛన్నో భిక్ఖు సఙ్ఘేన, ఆపత్తియా అదస్సనే, ఉక్ఖేపనీయకమ్మకతో సమ్మా వత్తతి, లోమం పాతేతి, నేత్థారం వత్తతి, ఆపత్తియా అదస్సనే ఉక్ఖేపనీయస్స కమ్మస్స పటిప్పస్సద్ధిం యాచతి. యది సఙ్ఘస్స పత్తకల్లం, సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేయ్య. ఏసా ఞత్తి.
‘‘సుణాతు మే, భన్తే, సఙ్ఘో. అయం ఛన్నో భిక్ఖు సఙ్ఘేన, ఆపత్తియా అదస్సనే, ఉక్ఖేపనీయకమ్మకతో సమ్మా వత్తతి, లోమం పాతేతి, నేత్థారం వత్తతి, ఆపత్తియా అదస్సనే, ఉక్ఖేపనీయస్స కమ్మస్స పటిప్పస్సద్ధిం యాచతి. సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతి. యస్సాయస్మతో ఖమతి ఛన్నస్స భిక్ఖునో, ఆపత్తియా అదస్సనే, ఉక్ఖేపనీయస్స కమ్మస్స పటిప్పస్సద్ధి, సో తుణ్హస్స; యస్స నక్ఖమతి, సో భాసేయ్య.
‘‘దుతియమ్పి ఏతమత్థం వదామి…పే… తతియమ్పి ఏతమత్థం వదామి – సుణాతు మే, భన్తే, సఙ్ఘో. అయం ఛన్నో భిక్ఖు సఙ్ఘేన, ఆపత్తియా అదస్సనే, ఉక్ఖేపనీయకమ్మకతో సమ్మా వత్తతి, లోమం పాతేతి, నేత్థారం వత్తతి, ఆపత్తియా అదస్సనే, ఉక్ఖేపనీయస్స కమ్మస్స పటిప్పస్సద్ధిం యాచతి. సఙ్ఘో ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం పటిప్పస్సమ్భేతి. యస్సాయస్మతో ఖమతి ఛన్నస్స భిక్ఖునో, ఆపత్తియా అదస్సనే, ఉక్ఖేపనీయస్స కమ్మస్స పటిప్పస్సద్ధి, సో తుణ్హస్స; యస్స నక్ఖమతి, సో భాసేయ్య.
‘‘పటిప్పస్సద్ధం సఙ్ఘేన ఛన్నస్స భిక్ఖునో, ఆపత్తియా అదస్సనే, ఉక్ఖేపనీయకమ్మం. ఖమతి సఙ్ఘస్స, తస్మా తుణ్హీ, ఏవమేతం ధారయామీ’’తి.
ఆపత్తియా అదస్సనే ఉక్ఖేపనీయకమ్మం నిట్ఠితం పఞ్చమం.