౫. లక్ఖణహారసమ్పాతవిభావనా

౬౭. యేన యేన పదట్ఠానహారసమ్పాతేన సుత్తప్పదేసత్థాని పదట్ఠానాని ఆచరియేన నిద్ధారితాని, అమ్హేహి చ ఞాతాని, సో పదట్ఠానహారసమ్పాతో పరిపుణ్ణో, ‘‘కతమో లక్ఖణహారసమ్పాతో’’తి పుచ్ఛితబ్బత్తా ‘‘తత్థ కతమో లక్ఖణో హారసమ్పాతో’’తిఆది వుత్తం. తత్థ తేసు దేసనాహారసమ్పాతాదీసు సోళససు హారసమ్పాతేసు కతమో సంవణ్ణనావిసేసో లక్ఖణహారసమ్పాతో నామాతి పుచ్ఛతి.

‘‘కతమేహి సుత్తత్థేహి సమానలక్ఖణా కతమే ధమ్మా గహితా’’తి పుచ్ఛితబ్బత్తా ‘‘తస్మా’’తిఆది వుత్తం. ‘‘తస్మా రక్ఖితచిత్తస్స, సమ్మాసఙ్కప్పగోచరో’’తి సుత్తప్పదేసేన వుత్తం ఇదం రక్ఖణం సతిన్ద్రియం గహితం, సతిన్ద్రియే గహితే సద్ధాదిపఞ్చిన్ద్రియాని గహితాని భవన్తి ఇన్ద్రియట్ఠేన సమానలక్ఖణత్తా. ‘‘సమ్మాదిట్ఠిపురేక్ఖారో’’తి సుత్తప్పదేసేన వుత్తా సమ్మాదిట్ఠి గహితా, సమ్మాదిట్ఠియా గహితాయ అరియో అట్ఠఙ్గికో మగ్గో గహితో భవతి. తం కిస్స హేతూతి కారణం పుచ్ఛతి. పుచ్ఛిత్వా కారణమాహ ‘‘సమ్మాదిట్ఠితో హీ’’తిఆదినా. సమ్మాదిట్ఠిహేతుతో సమ్మాసఙ్కప్పో హి యస్మా పభవతి, తస్మా, సమ్మాసఙ్కప్పతో సమ్మావాచా హి యస్మా పభవతి, తస్మా, సమ్మావాచాతో సమ్మాకమ్మన్తో హి యస్మా పభవతి, తస్మా, సమ్మాకమ్మన్తతో సమ్మాఆజీవో హి యస్మా పభవతి, తస్మా, సమ్మాఆజీవతో సమ్మావాయామో హి యస్మా పభవతి, తస్మా, సమ్మావాయామతో సమ్మాసతిహి యస్మా పభవతి, తస్మా, సమ్మాసతితో సమ్మాసమాధి హి యస్మా పభవతి, తస్మా, సమ్మాసమాధితో సమ్మావిముత్తి హి యస్మా పభవతి, తస్మా, సమ్మావిముత్తితో సమ్మావిముత్తిఞాణదస్సనం హి యస్మా పభవతి, తస్మా, అరియో అట్ఠఙ్గికో మగ్గో గహితో భవతీతి.

‘‘ఏత్తకోవ లక్ఖణహారసమ్పాతో పరిపుణ్ణో’’తి వత్తబ్బత్తా ‘‘నియుత్తో లక్ఖణో హారసమ్పాతో’’తి వుత్తం. యేన యేన సంవణ్ణనావిసేసభూతేన లక్ఖణహారసమ్పాతేన సుత్తప్పదేసత్థా సమానలక్ఖణేన గహితా భవన్తి, సో సో సంవణ్ణనావిసేసభూతో లక్ఖణహారసమ్పాతో నియుత్తో యథారహం నిద్ధారేత్వా యుజ్జితబ్బోతి అత్థో గహితోతి.

ఇతి లక్ఖణహారసమ్పాతే సత్తిబలానురూపా రచితా

విభావనా నిట్ఠితా.

పణ్డితేహి పన…పే… గహేతబ్బోతి.