౪. విముచ్చమానకథావణ్ణనా

౩౬౬. మగ్గక్ఖణే చిత్తం ఏకదేసేన విముత్తం ఏకదేసేన అవిముత్తన్తి అయం ‘‘విముత్తం విముచ్చమాన’’న్తి లద్ధియా దోసో. తథా హి వుత్తం ‘‘ఏకదేసం విముత్తం, ఏకదేసం అవిముత్త’’న్తి. అట్ఠకథాయఞ్చ ‘‘తఞ్హి తదా సముచ్ఛేదవిముత్తియా విముత్తేకదేసేన విముచ్చమానన్తిస్స లద్ధీ’’తి దస్సితోవాయమత్థో. విప్పకతనిద్దేసేతి విముచ్చనకిరియాయ అపరియోసితతానిద్దేసే. యం సన్ధాయాహ ‘‘విముత్తం విముచ్చమానన్తి విప్పకతభావేన వుత్తత్తా’’తి. తేనాతి పరవాదినా. విముచ్చ…పే… వుత్తం విముచ్చమానస్స విముత్తభావాభావతో, విముత్తభేదేన పన తథా వుత్తన్తి అధిప్పాయో. సతి చ దోసే విప్పకతనిద్దేసేతి ఆనేత్వా యోజేతబ్బం. ఏకదేసో విసేసనం హోతి నిప్పదేసవిముత్తియా అవిచ్ఛిన్నతో. ఫలచిత్తేనాతి పఠమఫలచిత్తేన ఉప్పన్నేన.

విముచ్చమానకథావణ్ణనా నిట్ఠితా.