౧. అనులోమపచ్చనీకవణ్ణనా

౧౨. మజ్ఝిమజాతికాలేతి పచ్చుప్పన్నత్తభావకాలే. అత్తభావో హి ఇధ ‘‘జాతీ’’తి అధిప్పేతో. తతో అతీతో పురిమజాతికాలో, అనాగతో పచ్ఛిమజాతికాలో. ఇమేసు తీసూతి సబ్బత్థ, సబ్బదా, సబ్బేసూతి ఇమేసు తీసు నయేసు. పాఠస్స సంఖిత్తతా సువిఞ్ఞేయ్యాతి తం ఠపేత్వా అత్థస్స సదిసతం విభావేన్తో ‘‘ఇధాపి హి…పే… యోజేతబ్బ’’న్తి ఆహ. ఏత్థాపి ‘‘న కేనచి సభావేన పుగ్గలో ఉపలబ్భతీ’’తి అయమత్థో వుత్తో హోతి. న హి కేనచి సభావేన ఉపలబ్భమానస్స సకలేకదేసవినిముత్తో పవత్తికాలో నామ అత్థీతి.