౨. నత్థిఅరహతోఅకాలమచ్చూతికథావణ్ణనా

౭౮౦. అలద్ధవిపాకవారానన్తి విపాకదానం పతి అలద్ధోకాసానం. బ్యన్తీభావన్తి విగతన్తతం, విగమం అవిపాకన్తి అత్థో.

౭౮౧. తతో పరన్తి బ్యతిరేకేన అత్థసిద్ధి, న కేవలేన అన్వయేనాతి ఆహ ‘‘తావ న కమతి, తతో పరం కమతీతి లద్ధియా పటిక్ఖిపతీ’’తి. తత్థ తతో పరన్తి పుబ్బే కతస్స కమ్మస్స పరిక్ఖయగమనతో పరం. నత్థి పాణాతిపాతో పాణాతిపాతలక్ఖణాభావతోతి అధిప్పాయో. తమేవ లక్ఖణాభావం దస్సేతుం ‘‘పాణోపాణసఞ్ఞితా’’తిఆది వుత్తం. తత్థ న తేనాతి యో పరేన ఉపక్కమో కతో, తేన ఉపక్కమేన న మతో, ధమ్మతామరణేనేవ మతోతి దుబ్బిఞ్ఞేయ్యం అవిసేసవిదూహి, దుబ్బిఞ్ఞేయ్యం వా హోతు సువిఞ్ఞేయ్యం వా, అఙ్గపారిపూరియావ పాణాతిపాతో.

నత్థిఅరహతోఅకాలమచ్చూతికథావణ్ణనా నిట్ఠితా.