౯. అపరియాపన్నకథావణ్ణనా

౭౦౯-౭౧౦. తస్మా దిట్ఠి లోకియపరియాపన్నా న హోతీతి అత్థం వదన్తి, ఏవం సతి అతిప్పసఙ్గో హోతి వీతదోసాదివోహారభావతోతి. తతో అఞ్ఞథా అత్థం వదన్తో ‘‘రూపదిట్ఠియా’’తిఆదిమాహ. తత్థ ఆది-సద్దేన అరూపదిట్ఠిఆదిం సఙ్గణ్హాతి. పరవాదిఅధిప్పాయవసేన అయమత్థవిభావనాతి ఆహ ‘‘యది చ పరియాపన్నా సియా’’తి. తథా చ సతీతి దిట్ఠియా కామధాతుపరియాపన్నత్తే సతీతి అత్థో. తస్మాతి ‘‘వీతదిట్ఠికో’’తి ఏవం వోహారాభావతో. న హి సా తస్స అవిగతా దిట్ఠి, యతో సో వీతదిట్ఠికోతి న వుచ్చతి. యేనాతి కామదిట్ఠిభావేన.

అపరియాపన్నకథావణ్ణనా నిట్ఠితా.

చుద్దసమవగ్గవణ్ణనా నిట్ఠితా.