౪. నియతస్సనియామకథావణ్ణనా

౬౬౩-౬౬౪. అప్పత్తనియామానన్తి యే అనుప్పన్నమిచ్ఛత్తసమ్మత్తనియతధమ్మా పుగ్గలా, తేసం ధమ్మే. కే పన తే? యథావుత్తపుగ్గలసన్తానపరియాపన్నా ధమ్మా. తే హి భూమిత్తయపరియాపన్నతాయ ‘‘తేభూమకా’’తి వుత్తా. యే పన పత్తనియామానం సన్తానే పవత్తా అనియతధమ్మా, న తేసమేత్థ సఙ్గహో కతో. న హి తేహి సమన్నాగమేన అనియతతా అత్థి. తేనేవాహ ‘‘తేహి సమన్నాగతోపి అనియతోయేవా’’తి. ఇమం వోహారమత్తన్తి ఇమినా నియామో నామ కోచి ధమ్మో నత్థి, ఉపచితసమ్భారతాయ అభిసమ్బుజ్ఝితుం భబ్బతావ తథా వుచ్చతీతి దస్సేతి. నియతోతి వచనస్స కారణభావేన వుత్తోతి యోజనా. ఉభయస్సపీతి నియతో నియామం ఓక్కమతీతి వచనద్వయస్స.

నియతస్సనియామకథావణ్ణనా నిట్ఠితా.