౧౦. దసమనయో విప్పయుత్తేనవిప్పయుత్తపదవణ్ణనా

౩౫౩. యే విప్పయుత్తేన విప్పయుత్తభావేన పాళియం అగ్గహితా, తేసు కేచి విప్పయుత్తస్స ధమ్మన్తరస్స అభావతో కేచి ఖన్ధాదీహి విప్పయోగస్సేవ అసమ్భవతోతి ఇమమత్థం దస్సేన్తో ‘‘ధమ్మాయతనాదిధమ్మా’’తిఆదిమాహ. తత్థ సబ్బచిత్తుప్పాదగతధమ్మభావతోతి ఇమినా భిన్నకాలతాదివిసేసవతో అరూపక్ఖన్ధస్స విప్పయుత్తస్స ధమ్మన్తరస్స అభావమాహ, అనారమ్మణమిస్సకభావతోతి ఇమినా పన సబ్బస్సపి. కామభవో ఉపపత్తిభవో సఞ్ఞీభవో పఞ్చవోకారభవోతి ఇమే చత్తారో మహాభవా. విప్పయోగాభావతోతి విప్పయోగాసమ్భవతో. న హి యే దుక్ఖసచ్చాదీహి విప్పయుత్తా, తేహి విప్పయుత్తానం తేసంయేవ దుక్ఖసచ్చాదీనం ఖన్ధాదీసు కేనచి విప్పయోగో సమ్భవతి.

దసమనయవిప్పయుత్తేనవిప్పయుత్తపదవణ్ణనా నిట్ఠితా.