౩. నిస్సగ్గియకణ్డం (భిక్ఖునీవిభఙ్గవణ్ణనా)

౭౩౩. నిస్సగ్గియేసు పఠమం ఉత్తానమేవ.

౭౪౦. దుతియే ‘‘అయ్యాయ దమ్మీతి ఏవం పటిలద్ధన్తి నిస్సట్ఠపటిలద్ధం. తేనేవ మాతికాట్ఠకథాయమ్పి ‘‘నిస్సట్ఠం పటిలభిత్వాపి యథాదానేయేవ ఉపనేతబ్బ’’న్తి వుత్తం. యథాదానేయేవ ఉపనేతబ్బన్తి యథా దాయకేన దిన్నం, తథా ఉపనేతబ్బం, అకాలచీవరపక్ఖేయేవ ఠపేతబ్బన్తి వుత్తం హోతి. ఏత్థ చ భాజాపితాయ లద్ధచీవరమేవ నిస్సగ్గియం హోతి, తం వినయకమ్మం కత్వాపి అత్తనా న లభతి. సేసమేత్థ ఉత్తానమేవ. అకాలచీవరతా, తథాసఞ్ఞితా, కాలచీవరన్తి అధిట్ఠాయ లేసేన భాజాపనం, పటిలాభోతి ఇమాని పనేత్థ చత్తారి అఙ్గాని.

౭౪౩. తతియే మేతన్తి మే ఏతం. సకసఞ్ఞాయ గహితత్తా పాచిత్తియం దుక్కటఞ్చ వుత్తం. ఇతరథా భణ్డగ్ఘేన కారేతబ్బం. ఉపసమ్పన్నతా, పరివత్తితచీవరస్స వికప్పనుపగతా, సకసఞ్ఞాయ అచ్ఛిన్దనం వా అచ్ఛిన్దాపనం వాతి ఇమాని పనేత్థ తీణి అఙ్గాని.

౭౪౮-౭౫౨. చతుత్థే ఆహటసప్పిం దత్వాతి అత్తనో దత్వా. యమకం పచితబ్బన్తి సప్పిఞ్చ తేలఞ్చ ఏకతో కత్వా పచితబ్బం. లేసేన గహేతుకామతా, అఞ్ఞస్స విఞ్ఞాపనం, పటిలాభోతి ఇమాని పనేత్థ తీణి అఙ్గాని.

౭౫౩. పఞ్చమే సాతి థుల్లనన్దా. అయన్తి అయం సిక్ఖమానా. చేతాపేత్వాతి జానాపేత్వా ఇచ్చేవ అత్థోతి ఇధ వుత్తం, మాతికాట్ఠకథాయం (కఙ్ఖా. అట్ఠ. అఞ్ఞచేతాపనసిక్ఖాపదవణ్ణనా) పన ‘‘అఞ్ఞం చేతాపేత్వాతి అత్తనో కప్పియభణ్డేన ఇదం నామ ఆహరాతి అఞ్ఞం పరివత్తాపేత్వా’’తి వుత్తం, తస్మా ‘‘చేతాపేత్వా’’తి ఇమస్స పరివత్తాపేత్వాతిపి అత్థో దట్ఠబ్బో. అఞ్ఞం చేతాపేయ్యాతి ‘‘ఏవం మే ఇదం దత్వా అఞ్ఞమ్పి ఆహరిస్సతీ’’తి మఞ్ఞమానా ‘‘న మే ఇమినా అత్థో, ఇదం నామ మే ఆహరా’’తి తతో అఞ్ఞం చేతాపేయ్య.

౭౫౮. ఛట్ఠే ధమ్మకిచ్చన్తి పుఞ్ఞకమ్మం. పావారికస్సాతి దుస్సవాణిజకస్స. యాయ చేతాపితం, తస్సాయేవ నిస్సగ్గియం నిస్సట్ఠపటిలాభో చ, తస్మా తాయ భిక్ఖునియా నిస్సట్ఠం పటిలభిత్వా యథాదానే ఉపనేతబ్బం, న అత్తనా గహేతబ్బం. అఞ్ఞస్సత్థాయాతి చీవరాదీసు అఞ్ఞతరస్సత్థాయ. అఞ్ఞుద్దిసికేనాతి పురిమస్సేవత్థదీపనం. పరిక్ఖారేనాతి కప్పియభణ్డేన.

౭౬౪. సత్తమే సయం యాచితకేనాతి సయం యాచితకేనాపీతి అత్థో. తేనేవ పాళియం ‘‘తేన చ పరిక్ఖారేన సయమ్పి యాచిత్వా’’తి వుత్తం, తతోయేవ మాతికాట్ఠకథాయం ‘‘సఞ్ఞాచికేనాతి సయం యాచితకేనాపీ’’తి అత్థో వుత్తో.

౭౬౮-౭౭౩. అట్ఠమనవమదసమాని ఉత్తానత్థానేవ.

౭౮౪. ఏకాదసమే యస్మా పవారితట్ఠానే విఞ్ఞత్తి నామ న పటిసేధేతబ్బా, తస్మా భగవా ధమ్మనిమన్తనవసేన పవారితట్ఠానే ‘‘వదేయ్యాసి యేనత్థో’’తి వుత్తాయ ‘‘చతుక్కంసపరమం విఞ్ఞాపేతబ్బ’’న్తి పరిచ్ఛేదం దస్సేతీతి వేదితబ్బం. తేనేవ మాతికాట్ఠకథాయం (కఙ్ఖా. అట్ఠ. గరుపావురణసిక్ఖాపదవణ్ణనా) ‘‘చేతాపేతబ్బన్తి ఠపేత్వా సహధమ్మికే చ ఞాతకపవారితే చ అఞ్ఞేన కిస్మిఞ్చిదేవ గుణే పరితుట్ఠేన వదేయ్యాసి యేనత్థోతి వుత్తాయ విఞ్ఞాపేతబ్బ’’న్తి వుత్తం.

౭౮౮. ద్వాదసమం ఉత్తానత్థమేవ.

భిక్ఖునీవిభఙ్గే నిస్సగ్గియపాచిత్తియసిక్ఖాపదవణ్ణనా నిట్ఠితా.

నిస్సగ్గియకణ్డం నిట్ఠితం.