అధికరణభేదవణ్ణనా

౩౪౦. యస్మా అధికరణం ఉక్కోటేన్తో సమథప్పత్తమేవ ఉక్కోటేతి, తస్మా ‘‘వివాదాధికరణం ఉక్కోటేన్తో కతి సమథే ఉక్కోటేతీ’’తిఆది వుత్తం.

౩౪౧. పాళిముత్తకవినిచ్ఛయేనేవాతి వినయలక్ఖణం వినా కేవలం ధమ్మదేసనామత్తవసేనేవాతి అత్థో. యేనాపి వినిచ్ఛయేనాతి పాళిముత్తకవినిచ్ఛయమేవ సన్ధాయ వుత్తం. ఖన్ధకతో చ పరివారతో చ సుత్తేనాతి ఖన్ధకపరివారతో ఆనీతసుత్తేన. నిజ్ఝాపేన్తీతి పఞ్ఞాపేన్తి.

౩౪౨. కిచ్చం నిస్సాయ ఉప్పజ్జనకకిచ్చానన్తి పుబ్బే కతఉక్ఖేపనీయాదికిచ్చం నిస్సాయ ఉప్పజ్జనకకిచ్చానం. కీదిసానం? యావతతియసమనుభాసనాదీనం.

౩౪౩. తం హీతి తం వివాదాధికరణం.

౩౪౪. అధికరణేసు యేన అధికరణేన సమ్మన్తి, తం దస్సేతుం వుత్తన్తి యదా అధికరణేహి సమ్మన్తి, తదా కిచ్చాధికరణేనేవ సమ్మన్తి, న అఞ్ఞేహి అధికరణేహీతి దస్సనత్థం వుత్తన్తి అధిప్పాయో.

౩౫౩. ‘‘సత్తన్నం సమథానం కతమే ఛత్తింస సముట్ఠానా’’తి పుచ్ఛిత్వాపి ‘‘కమ్మస్స కిరియా కరణ’’న్తిఆదినా సమ్ముఖావినయస్స సముట్ఠానాని అవిభజిత్వావ సతివినయాదీనం ఛన్నఞ్ఞేవ ఛ సముట్ఠానాని విభత్తాని, తం కస్మాతి ఆహ ‘‘కిఞ్చాపి సత్తన్నం సమథాన’’న్తిఆది. సతివినయాదీనం వియ సఙ్ఘసమ్ముఖతాదీనం కిచ్చయతా నామ నత్థీతి ఆహ ‘‘కమ్మసఙ్గహాభావేనా’’తి.