భిక్ఖునీవిభఙ్గో

౧౭౦. భిక్ఖూనం పాటవత్థాయ, వినయస్స వినిచ్ఛయే;

భిక్ఖునీనం విభఙ్గోపి, కిఞ్చిమత్తం భణామహం.

౧౭౧. అవస్సుతస్స పోసస్స, భిక్ఖునీపి అవస్సుతా;

నన్దన్తీ కాయసంసగ్గం, కతి ఆపత్తియో ఫుసే;

౧౭౨. తిస్సో ఆపత్తియో ఉబ్భ-జాణుస్సాధక్ఖకస్స చ;

హోతి పారాజికం తస్సా, గహణం సాదియన్తియా.

౧౭౩. ఉబ్భక్ఖకం అధోజాణు-గహణం సాదియన్తియా;

థుల్లచ్చయం సియా, కాయ-పటిబద్ధే తు దుక్కటం.

౧౭౪. ఛాదేన్తీ భిక్ఖునీ వజ్జం, తిస్సో ఆపత్తియో ఫుసే;

జానం పారాజికం ధమ్మం, ఛాదేన్తీ సా పరాజికా.

౧౭౫. థుల్లచ్చయం వేమతికా, పటిచ్ఛాదేతి చే పన;

అథాచారవిపత్తిం చే, పటిచ్ఛాదేతి దుక్కటం.

౧౭౬. నిస్సజ్జన్తీ న తం లద్ధిం, ఉక్ఖిత్తస్సానువత్తికా;

సమనుభాసనాయేవ, తిస్సో ఆపత్తియో ఫుసే.

౧౭౭. ఞత్తియా దుక్కటం, ద్వీహి, కమ్మవాచాహి థుల్లతా;

కమ్మవాచాయ ఓసానే, పారాజికముదీరితం.

౧౭౮. పూరేన్తీ అట్ఠమం వత్థుం, తిస్సో ఆపత్తియో ఫుసే;

పురిసేనిధాగచ్ఛాతి, వుత్తాగచ్ఛతి దుక్కటం.

౧౭౯. థుల్లచ్చయం తు పోసస్స, హత్థపాసప్పవేసనే;

పూరేన్తీ అట్ఠమం వత్థుం, సమణీ సా పరాజితా.

పారాజికకథా.

౧౮౦. ఉస్సయవాదికా అట్టం, కరోన్తీ తివిధం ఫుసే;

ఏకస్సారోచనే తస్సా, హోతి ఆపత్తి దుక్కటం.

౧౮౧. దుతియారోచనే తస్సా, థుల్లచ్చయముదీరితం;

అట్టస్స పరియోసానే, హోతి సఙ్ఘాదిసేసతా.

౧౮౨. చోరివుట్ఠాపికా వాపి, ఞత్తియా దుక్కటం ఫుసే;

ద్వీహి థుల్లచ్చయం కమ్మ-వాచోసానే గరుం సియా.

౧౮౩. ఏకా గామన్తరం గచ్ఛే, గమనే దుక్కటం సియా;

పరిక్ఖేపే అతిక్కన్తే, పాదేన పఠమేన తు.

౧౮౪. హోతి థుల్లచ్చయాపత్తి, తస్సా సమణియా పన;

దుతియేన అతిక్కన్తే, గరుకే పన తిట్ఠతి.

౧౮౫. చతుత్థే దుతియే వుత్త-సదిసోవ వినిచ్ఛయో;

ఆపత్తీనం పభేదే తు, కాచి నత్థి విసేసతా.

౧౮౬. అవస్సుతా సయం హుత్వా, తాదిసస్సేవ హత్థతో;

గహేత్వా పన భుఞ్జన్తీ, భోజనాదీసు కిఞ్చిపి.

౧౮౭. ఫుసే ఆపత్తియో తిస్సో, భోజనాదీసు కిఞ్చిపి;

పటిగ్గణ్హన్తియా తస్సా, హోతి థుల్లచ్చయం పన.

౧౮౮. అజ్ఝోహారేసు సబ్బేసు, హోతి సఙ్ఘాదిసేసతా;

ఉదకం దన్తపోనం వా, పటిగ్గణ్హాతి దుక్కటం.

౧౮౯. ‘‘సహత్థేన గహేత్వా త్వం, ఖాద వా భుఞ్జ వా’’తిపి;

ఉయ్యోజేన్తీ పనేవం తు, తిస్సో ఆపత్తియో ఫుసే.

౧౯౦. దుక్కటం వచనే తస్సా, ‘‘భుఞ్జిస్సామీ’’తి గణ్హతి;

అజ్ఝోహారేసు సబ్బేసు, తస్సా థుల్లచ్చయం సియా.

౧౯౧. భోజనస్స పనోసానే, హోతి సఙ్ఘాదిసేసతా;

ఉయ్యోజేతి చ యా తస్సా, ఇమా తిస్సోతి దీపయే.

౧౯౨. సత్తమే అట్ఠమే చాపి, నవమే దసమేపి చ;

చోరివుట్ఠాపనేనేవ, సమానోవ వినిచ్ఛయో.

సఙ్ఘాదిసేసకథా.

౧౯౩. పత్తసన్నిచయం యిహ, కరోన్తీ భిక్ఖునీ పన;

ఏకం నిస్సగ్గియంయేవ, ఫుసే పాచిత్తియం తు సా.

౧౯౪. అకాలచీవరం కాల-చీవరం భాజాపేన్తియా;

పయోగే దుక్కటం వుత్తం, లాభే నిస్సగ్గియం సియా.

౧౯౫. చీవరం పరివత్తేత్వా, అచ్ఛిన్దతి సచే పన;

పయోగే దుక్కటం, ఛిన్నే, తస్సా నిస్సగ్గియం సియా.

౧౯౬. విఞ్ఞాపేత్వావ అఞ్ఞం చే, విఞ్ఞాపేతి తతో పరం;

పయోగే దుక్కటం, విఞ్ఞా-పితే నిస్సగ్గియం సియా.

౧౯౭. చేతాపేత్వా హి అఞ్ఞం చే, చేతాపేతి తతో పరం;

పయోగే దుక్కటం, చేతా-పితే నిస్సగ్గియం సియా.

౧౯౮. ఏవమేవ చ సేసేసు, ఛట్ఠాదీసు చ సత్తసు;

అనన్తరసమానోవ, ఆపత్తీనం వినిచ్ఛయో.

నిస్సగ్గియకథా.

౧౯౯. లసుణం ఖాదతి ద్వే చే, దుక్కటం గహణే సియా;

అజ్ఝోహారపయోగేసు, పాచిత్తి పరియాపుతా.

౨౦౦. సంహరాపేన్తియా లోమం, సమ్బాధే ద్వేవ హోన్తి హి;

పయోగే దుక్కటం వుత్తం, హోతి పాచిత్తి సంహటే.

౨౦౧. కరోన్తీ తలఘాతం తు, ద్వే పనాపత్తియో ఫుసే;

పయోగే దుక్కటం హోతి, కతే పాచిత్తియం సియా.

౨౦౨. జతునా మట్ఠకం కిఞ్చి, సాదియన్తీ దువే ఫుసే;

పయోగే దుక్కటాదిన్నే, తస్సా పాచిత్తియం సియా.

౨౦౩. పఞ్చమం తు చతుత్థేన, సమానమితి దీపయే;

ఆపత్తీనం విభాగస్మిం, విసేసో నత్థి కోచిపి.

౨౦౪. భిక్ఖుస్స భుఞ్జమానస్స, పానీయేనుపతిట్ఠతి;

హత్థపాసే తు పాచిత్తి, హిత్వా తిట్ఠతి దుక్కటం.

౨౦౫. విఞ్ఞాపేత్వామకం ధఞ్ఞం, ‘‘భుఞ్జిస్సామీ’’తి గణ్హతి;

దుక్కటం హోతి పాచిత్తి, అజ్ఝోహారేసు దీపయే.

౨౦౬. ఉచ్చారాదిం తిరోకుట్టే, ఛడ్డేన్తీ ద్వే ఫుసే హవే;

పయోగే దుక్కటం వుత్తం, పాచిత్తి ఛడ్డితే సియా.

౨౦౭. ఉచ్చారాదిచతుక్కం తు, ఛడ్డేతి హరితే సచే;

పయోగే దుక్కటం తస్సా, పాచిత్తి ఛడ్డితే సియా.

౨౦౮. నచ్చాదిం దస్సనత్థాయ, సచే గచ్ఛతి దుక్కటం;

పస్సన్తియాపి పాచిత్తి, తథేవ చ సుణన్తియా.

లసుణవగ్గో పఠమో.

౨౦౯. పఠమే దుతియే చేవ, తతియే చ చతుత్థకే;

తుల్యో లసుణవగ్గస్స, ఛట్ఠేనిధ వినిచ్ఛయో.

౨౧౦. కులాని ఉపసఙ్కమ్మ, నిసీదిత్వా పనాసనే;

సామికే తు అనాపుచ్ఛా, పక్కమన్తీ దువే ఫుసే.

౨౧౧. పఠమేన చ పాదేన, అనోవస్సమతిక్కమే;

దుక్కటం హోతి, పాచిత్తి, దుతియాతిక్కమే సియా.

౨౧౨. సామికే తు అనాపుచ్ఛా, ఆసనే చే నిసీదతి;

పయోగే దుక్కటం హోతి, పాచిత్తి చ నిసీదితే.

౨౧౩. ఛట్ఠేన సత్తమం సబ్బం, సమానం అట్ఠమే పన;

పయోగే దుక్కటం, ఉజ్ఝా-పితే పాచిత్తియం సియా.

౨౧౪. అత్తానం చాభిసప్పేన్తీ, ద్వే ఫుసే నిరయాదినా;

పయోగే దుక్కటం వుత్తం, పాచిత్తి అభిసప్పితే.

౨౧౫. వధిత్వా పన అత్తానం, రోదన్తీ తు దువే ఫుసే;

వధతి రోదతి పాచిత్తి, కరోతేకం తు దుక్కటం.

రత్తన్ధకారవగ్గో దుతియో.

౨౧౬. నగ్గా న్హాయతి ద్వే చేవ, పయోగే దుక్కటం సియా;

న్హానస్స పరియోసానే, తస్సా పాచిత్తియం సియా.

౨౧౭. కారాపేతి పమాణాతి-క్కన్తం ఉదకసాటికం;

పయోగే దుక్కటం, కారా-పితే పాచిత్తియం సియా.

౨౧౮. చీవరం తు విసిబ్బేత్వా, విసిబ్బాపేత్వ వా పన;

నేవ సిబ్బన్తియా వుత్త-మేకం పాచిత్తియం పన.

౨౧౯. పఞ్చాహికం తు సఙ్ఘాటి-చారం పన అతిక్కమే;

ఏకావస్సా పనాపత్తి, పాచిత్తి పరిదీపితా.

౨౨౦. సచే సఙ్కమనీయం తు, ధారేతి పన చీవరం;

పయోగే దుక్కటం వుత్తం, పాచిత్తి పన ధారితే.

౨౨౧. గణచీవరలాభస్స, అన్తరాయం కరోతి చే;

పయోగే దుక్కటం హోతి, కతే పాచిత్తియం సియా.

౨౨౨. విభఙ్గం పటిబాహన్తీ, చీవరానం తు ధమ్మికం;

పయోగే దుక్కటం వుత్తం, పాచిత్తి పటిబాహితే.

౨౨౩. అగారికాదినో దేతి, సచే సమణచీవరం;

పయోగే దుక్కటం, దిన్నే, పాచిత్తి పరియాపుతా.

౨౨౪. చీవరే దుబ్బలాసాయ, కాలం చే సమతిక్కమే;

పయోగే దుక్కటం వుత్తం, పాచిత్తి సమతిక్కమే.

౨౨౫. ధమ్మికం కథినుద్ధారం, పటిబాహన్తియా దువే;

పయోగే దుక్కటం హోతి, పాచిత్తి పటిబాహితే.

న్హానవగ్గో తతియో.

౨౨౬. దువే భిక్ఖునియో ఏక-మఞ్చస్మిం చే తువట్టేయ్యుం;

పయోగే దుక్కటం తాసం, నిపన్నే ఇతరం సియా.

౨౨౭. దుతియం పఠమేనేవ, సదిసం తతియే పన;

పయోగే దుక్కటం హోతి, కతే పాచిత్తియం సియా.

౨౨౮. నుపట్ఠాపేన్తియా వాపి, దుక్ఖితం సహజీవినిం;

ఏకాయేవ పనాపత్తి, పాచిత్తి పరిదీపితా.

౨౨౯. సచే ఉపస్సయం దత్వా, నిక్కడ్ఢతి చ భిక్ఖునిం;

పయోగే దుక్కటం తస్సా, హోతి పాచిత్తి కడ్ఢితే.

౨౩౦. ఛట్ఠే పన చ సంసట్ఠా, ఞత్తియా దుక్కటం ఫుసే;

కమ్మవాచాయ ఓసానే, పాచిత్తి పరిదీపితా.

౨౩౧. అన్తోరట్ఠే తు సాసఙ్కే, చారికం తు చరన్తియా;

పయోగే దుక్కటం వుత్తం, పటిపన్నాయ సేసకం.

౨౩౨. అట్ఠమం నవమఞ్చేవ, సత్తమేన సమం మతం;

దసమే పన ఏకావ, పాచిత్తి పరిదీపితా.

తువట్టవగ్గో చతుత్థో.

౨౩౩. రాజాగారాదికం సబ్బం, దస్సనత్థాయ గచ్ఛతి;

పయోగే దుక్కటం తస్సా, పాచిత్తి యది పస్సతి.

౨౩౪. ఆసన్దిం వాపి పల్లఙ్కం, పరిభుఞ్జన్తియా దువే;

పయోగే దుక్కటం వుత్తం, భుత్తే పాచిత్తియం సియా.

౨౩౫. సుత్తం కన్తన్తియా ద్వేవ, పయోగే దుక్కటం మతం;

ఉజ్జవుజ్జవనే తస్సా, పాచిత్తి సముదాహరే.

౨౩౬. వేయ్యావచ్చం గిహీనం తు, ద్వేవ హోన్తి కరోన్తియా;

పయోగే దుక్కటం వుత్తం, కతే పాచిత్తియం సియా.

౨౩౭. పఞ్చమే పన ఏకావ, పాచిత్తి పరిదీపితా;

పయోగే దుక్కటం ఛట్ఠే, దిన్నే పాచిత్తియం సియా.

౨౩౮. సత్తమం దుతియేనేవ, సమాపత్తిపభేదతో;

అట్ఠమం దుతియే వగ్గే, పఞ్చమేన సమం మతం.

౨౩౯. తిరచ్ఛానగతం విజ్జం, ద్వేవ హోన్తి పఠన్తియా;

పయోగే దుక్కటం హోతి, పాచిత్తి హి పదే పదే.

౨౪౦. దసమం నవమేనేవ, సమానం సబ్బథా పన;

‘‘పరియాపుణాతి, వాచేతి’’, పదమత్తం విసేసకం.