భిక్ఖునీవిభఙ్గో
౧౯౬౪. భిక్ఖునీనం హితత్థాయ, విభఙ్గం యం జినోబ్రవి;
తస్మిం అపి సమాసేన, కిఞ్చిమత్తం భణామహం.
పారాజికకథా
౧౯౬౫. ఛన్దసో మేథునం ధమ్మం, పటిసేవేయ్య యా పన;
హోతి పారాజికా నామ, సమణీ సా పవుచ్చతి.
౧౯౬౬. మనుస్సపురిసాదీనం, నవన్నం యస్స కస్సచి;
సజీవస్సాప్యజీవస్స, సన్థతం వా అసన్థతం.
౧౯౬౭. అత్తనో తివిధే మగ్గే, యేభుయ్యక్ఖాయితాదికం;
అఙ్గజాతం పవేసేన్తీ, అల్లోకాసే పరాజితా.
౧౯౬౮. ఇతో పరమవత్వావ, సాధారణవినిచ్ఛయం;
అసాధారణమేవాహం, భణిస్సామి సమాసతో.
౧౯౬౯. అధక్ఖకం సరీరకం, యదుబ్భజాణుమణ్డలం;
సరీరకేన చే తేన, ఫుసేయ్య భిక్ఖునీ పన.
౧౯౭౦. అవస్సుతస్సావస్సుతా, మనుస్సపుగ్గలస్స యా;
సరీరమస్స తేన వా, ఫుట్ఠా పారాజికా సియా.
౧౯౭౧. కప్పరస్స పనుద్ధమ్పి, గహితం ఉబ్భజాణునా;
యథావుత్తప్పకారేన, కాయేనానేన అత్తనో.
౧౯౭౨. పురిసస్స తథా కాయ- పటిబద్ధం ఫుసన్తియా;
తథా యథాపరిచ్ఛిన్న- కాయబద్ధేన అత్తనో.
౧౯౭౩. అవసేసేన వా తస్స, కాయం కాయేన అత్తనో;
హోతి థుల్లచ్చయం తస్సా, పయోగే పురిసస్స చ.
౧౯౭౪. యక్ఖపేతతిరచ్ఛాన- పణ్డకానం అధక్ఖకం;
ఉబ్భజాణుం తథేవస్సా, ఉభతోవస్సవే సతి.
౧౯౭౫. ఏకతోవస్సవే చాపి, థుల్లచ్చయముదీరితం;
అవసేసే చ సబ్బత్థ, హోతి ఆపత్తి దుక్కటం.
౧౯౭౬. ఉబ్భక్ఖకమధోజాణు-మణ్డలం పన యం ఇధ;
కప్పరస్స చ హేట్ఠాపి, గతం ఏత్థేవ సఙ్గహం.
౧౯౭౭. కేలాయతి సచే భిక్ఖు, సద్ధిం భిక్ఖునియా పన;
ఉభిన్నం కాయసంసగ్గ-రాగే సతి హి భిక్ఖునో.
౧౯౭౮. హోతి సఙ్ఘాదిసేసోవ, నాసో భిక్ఖునియా సియా;
కాయసంసగ్గరాగో చ, సచే భిక్ఖునియా సియా.
౧౯౭౯. భిక్ఖునో మేథునో రాగో, గేహపేమమ్పి వా భవే;
తస్సా థుల్లచ్చయం వుత్తం, భిక్ఖునో హోతి దుక్కటం.
౧౯౮౦. ఉభిన్నం మేథునే రాగే, గేహపేమేపి వా సతి;
అవిసేసేన నిద్దిట్ఠం, ఉభిన్నం దుక్కటం పన.
౧౯౮౧. యస్స యత్థ మనోసుద్ధం, తస్స తత్థ న దోసతా;
ఉభిన్నమ్పి అనాపత్తి, ఉభిన్నం చిత్తసుద్ధియా.
౧౯౮౨. కాయసంసగ్గరాగేన, భిన్దిత్వా పఠమం పన;
పచ్ఛా దూసేతి చే నేవ, హోతి భిక్ఖునిదూసకో.
౧౯౮౩. అథ భిక్ఖునియా ఫుట్ఠో, సాదియన్తోవ చేతసా;
నిచ్చలో హోతి చే భిక్ఖు, న హోతాపత్తి భిక్ఖునో.
౧౯౮౪. భిక్ఖునీ భిక్ఖునా ఫుట్ఠా, సచే హోతిపి నిచ్చలా;
అధివాసేతి సమ్ఫస్సం, తస్సా పారాజికం సియా.
౧౯౮౫. తథా థుల్లచ్చయం ఖేత్తే, దుక్కటఞ్చ వినిద్దిసే;
వుత్తత్తా ‘‘కాయసంసగ్గం, సాదియేయ్యా’’తి సత్థునా.
౧౯౮౬. తస్సా క్రియసముట్ఠానం, ఏవం సతి న దిస్సతి;
ఇదం తబ్బహులేనేవ, నయేన పరిదీపితం.
౧౯౮౭. అనాపత్తి అసఞ్చిచ్చ, అజానిత్వామసన్తియా;
సతి ఆమసనే తస్సా, ఫస్సం వాసాదియన్తియా.
౧౯౮౮. వేదనట్టాయ వా ఖిత్త-చిత్తాయుమ్మత్తికాయ వా;
సముట్ఠానాదయో తుల్యా, పఠమన్తిమవత్థునా.
ఉబ్భజాణుమణ్డలకథా.
౧౯౮౯. పారాజికత్తం జానన్తి, సలిఙ్గే తు ఠితాయ హి;
‘‘న కస్సచి పరస్సాహం, ఆరోచేస్సామి దాని’’తి.
౧౯౯౦. ధురే నిక్ఖిత్తమత్తస్మిం, సా చ పారాజికా సియా;
అయం వజ్జపటిచ్ఛాది- నామికా పన నామతో.
౧౯౯౧. సేసం సప్పాణవగ్గస్మిం, దుట్ఠుల్లేన సమం నయే;
విసేసో తత్ర పాచిత్తి, ఇధ పారాజికం సియా.
వజ్జపటిచ్ఛాదికథా.
౧౯౯౨. సఙ్ఘేనుక్ఖిత్తకో భిక్ఖు, ఠితో ఉక్ఖేపనే పన;
యందిట్ఠికో చ సో తస్సా, దిట్ఠియా గహణేన తం.
౧౯౯౩. అనువత్తేయ్య యా భిక్ఖుం, భిక్ఖునీ సా విసుమ్పి చ;
సఙ్ఘమజ్ఝేపి అఞ్ఞాహి, వుచ్చమానా తథేవ చ.
౧౯౯౪. అచజన్తీవ తం వత్థుం, గహేత్వా యది తిట్ఠతి;
తస్స కమ్మస్స ఓసానే, ఉక్ఖిత్తస్సానువత్తికా.
౧౯౯౫. హోతి పారాజికాపన్నా, హోతాసాకియధీతరా;
పున అప్పటిసన్ధేయా, ద్విధా భిన్నా సిలా వియ.
౧౯౯౬. అధమ్మే పన కమ్మస్మిం, నిద్దిట్ఠం తికదుక్కటం;
సముట్ఠానాదయో సబ్బే, వుత్తా సమనుభాసనే.
ఉక్ఖిత్తానువత్తికకథా.
౧౯౯౭. అపారాజికఖేత్తస్స, గహణం యస్స కస్సచి;
అఙ్గస్స పన తం హత్థ-గ్గహణన్తి పవుచ్చతి.
౧౯౯౮. పారుతస్స నివత్థస్స, గహణం యస్స కస్సచి;
ఏతం సఙ్ఘాటియా కణ్ణ-గ్గహణన్తి పవుచ్చతి.
౧౯౯౯. కాయసంసగ్గసఙ్ఖాత-అసద్ధమ్మస్స కారణా;
భిక్ఖునీ హత్థపాసస్మిం, తిట్ఠేయ్య పురిసస్స వా.
౨౦౦౦. సల్లపేయ్య తథా తత్థ, ఠత్వా తు పురిసేన వా;
సఙ్కేతం వాపి గచ్ఛేయ్య, ఇచ్ఛేయ్యా గమనస్స వా.
౨౦౦౧. తదత్థాయ పటిచ్ఛన్న-ట్ఠానఞ్చ పవిసేయ్య వా;
ఉపసంహరేయ్య కాయం వా, హత్థపాసే ఠితా పన.
౨౦౦౨. అయమస్సమణీ హోతి, వినట్ఠా అట్ఠవత్థుకా;
అభబ్బా పునరుళ్హాయ, ఛిన్నో తాలోవ మత్థకే.
౨౦౦౩. అనులోమేన వా వత్థుం, పటిలోమేన వా చుతా;
అట్ఠమం పరిపూరేన్తీ, తథేకన్తరికాయ వా.
౨౦౦౪. అథాదితో పనేకం వా, ద్వే వా తీణిపి సత్త వా;
సతక్ఖత్తుమ్పి పూరేన్తీ, నేవ పారాజికా సియా.
౨౦౦౫. ఆపత్తియో పనాపన్నా, దేసేత్వా తాహి ముచ్చతి;
ధురనిక్ఖేపనం కత్వా, దేసితా గణనూపికా.
౨౦౦౬. న హోతాపత్తియా అఙ్గం, సఉస్సాహాయ దేసితా;
దేసనాగణనం నేతి, దేసితాపి అదేసితా.
౨౦౦౭. అనాపత్తి అసఞ్చిచ్చ, అజానిత్వా కరోన్తియా;
సముట్ఠానాదయో సబ్బే, అనన్తరసమా మతా.
౨౦౦౮. ‘‘అసద్ధమ్మో’’తి నామేత్థ, కాయసంసగ్గనామకో;
అయముద్దిసితో అత్థో, సబ్బఅట్ఠకథాసుపి.
౨౦౦౯. విఞ్ఞూ పటిబలో కాయ-సంసగ్గం పటిపజ్జితుం;
కాయసంసగ్గభావే తు, సాధకం వచనం ఇదం.
అట్ఠవత్థుకకథా.
౨౦౧౦. అవస్సుతా పటిచ్ఛాదీ, ఉక్ఖిత్తా అట్ఠవత్థుకా;
అసాధారణపఞ్ఞత్తా, చతస్సోవ మహేసినా.
పారాజికకథా నిట్ఠితా.
సఙ్ఘాదిసేసకథా
౨౦౧౧. యా పన భిక్ఖునీ ఉస్సయవాదా;
అట్టకరీ ముఖరీ విహరేయ్య;
యేన కేనచి నరేనిధ సద్ధిం;
సా గరుకం కిర దోసముపేతి.
౨౦౧౨. సక్ఖిం వాపి సహాయం వా, పరియేసతి దుక్కటం;
పదే పదే తథా అట్టం, కాతుం గచ్ఛన్తియాపి చ.
౨౦౧౩. ఆరోచేతి సచే పుబ్బం, భిక్ఖునీ అత్తనో కథం;
దిస్వా వోహారికం తస్సా, హోతి ఆపత్తి దుక్కటం.
౨౦౧౪. ఆరోచేతి సచే పచ్ఛా, ఇతరో అత్తనో కథం;
హోతి భిక్ఖునియా తస్సా, థుల్లచ్చయమనన్తరం.
౨౦౧౫. ఆరోచేతితరో పుబ్బం, సచే సో అత్తనో కథం;
పచ్ఛా భిక్ఖునీ చే పుబ్బ-సదిసోవ వినిచ్ఛయో.
౨౦౧౬. ‘‘ఆరోచేహీ’’తి వుత్తా చే, ‘‘కథం తవ మమాపి చ’’;
ఆరోచేతు యథాకామం, పఠమే దుక్కటం సియా.
౨౦౧౭. దుతియారోచనే తస్సా, థుల్లచ్చయముదీరితం;
ఉపాసకేన వుత్తేపి, అయమేవ వినిచ్ఛయో.
౨౦౧౮. ఆరోచితకథం సుత్వా, ఉభిన్నమ్పి యథా తథా;
వినిచ్ఛయే కతే తేహి, అట్టే పన చ నిట్ఠితే.
౨౦౧౯. అట్టస్స పరియోసానే, జయే భిక్ఖునియా పన;
పరాజయేపి వా తస్సా, హోతి సఙ్ఘాదిసేసతా.
౨౦౨౦. దూతం వాపి పహిణిత్వా, ఆగన్త్వాన సయమ్పి వా;
పచ్చత్థికమనుస్సేహి, ఆకడ్ఢీయతి యా పన.
౨౦౨౧. ఆరామే పన అఞ్ఞేహి, అనాచారం కతం సచే;
అనోదిస్స పరం కిఞ్చి, రక్ఖం యాచతి తత్థ యా.
౨౦౨౨. యాయ కిఞ్చి అవుత్తావ, ధమ్మట్ఠా సయమేవ తు;
సుత్వా తం అఞ్ఞతో అట్టం, నిట్ఠాపేన్తి సచే పన.
౨౦౨౩. తస్సా, ఉమ్మత్తికాదీన-మనాపత్తి పకాసితా;
కథినేన సముట్ఠానం, తుల్యం సకిరియం ఇదం.
అట్టకారికథా.
౨౦౨౪. జానన్తీ భిక్ఖునీ చోరిం, వజ్ఝం విదితమేవ యా;
సఙ్ఘం అనపలోకేత్వా, రాజానం గణమేవ వా.
౨౦౨౫. వుట్ఠాపేయ్య వినా కప్పం, చోరివుట్ఠాపనం పన;
సఙ్ఘాదిసేసమాపత్తి-మాపన్నా నామ హోతి సా.
౨౦౨౬. పఞ్చమాసగ్ఘనం యాయ, హరితం పరసన్తకం;
అతిరేకగ్ఘనం వాపి, అయం ‘‘చోరీ’’తి వుచ్చతి.
౨౦౨౭. భిక్ఖునీసు పనఞ్ఞాసు, తిత్థియేసుపి వా తథా;
యా పబ్బజితపుబ్బా సా, అయం ‘‘కప్పా’’తి వుచ్చతి.
౨౦౨౮. వుట్ఠాపేతి చ యా చోరిం, ఠపేత్వా కప్పమేవిదం;
సచే ఆచరినిం పత్తం, చీవరం పరియేసతి.
౨౦౨౯. సమ్మన్నతి చ సీమం వా, తస్సా ఆపత్తి దుక్కటం;
ఞత్తియా దుక్కటం ద్వీహి, కమ్మవాచాహి చ ద్వయం.
౨౦౩౦. థుల్లచ్చయస్స, కమ్మన్తే, గరుకం నిద్దిసే బుధో;
గణో ఆచరినీ చేవ, న చ ముచ్చతి దుక్కటం.
౨౦౩౧. అనాపత్తి అజానన్తీ, వుట్ఠాపేతి, తథేవ చ;
కప్పం వా అపలోకేత్వా, తస్సా ఉమ్మత్తికాయ వా.
౨౦౩౨. చోరివుట్ఠాపనం నామ, జాయతే వాచచిత్తతో;
కాయవాచాదితో చేవ, సచిత్తఞ్చ క్రియాక్రియం.
చోరివుట్ఠాపనకథా.