౧౭. మఞ్చపీఠాదిసఙ్ఘికసేనాసనేసుపటిపజ్జితబ్బవినిచ్ఛయకథా

౮౨. ఏవం సహసేయ్యవినిచ్ఛయం కథేత్వా ఇదాని సఙ్ఘికే విహారే సేయ్యాసు కత్తబ్బవినిచ్ఛయం కథేతుం ‘‘విహారే సఙ్ఘికే సేయ్య’’న్త్యాదిమాహ. తత్థ సమగ్గం కమ్మం సముపగచ్ఛతీతి సఙ్ఘో, అయమేవ వచనత్థో సబ్బసఙ్ఘసాధారణో. సఙ్ఘస్స దిన్నో సఙ్ఘికో, విహరతి ఏత్థాతి విహారో, తస్మిం. సయన్తి ఏత్థాతి సేయ్యా, తం. అసన్థరీతి సన్థరిత్వాన. పక్కమనం పక్కమో, గమనన్తి అత్థో. ‘‘విహారే సఙ్ఘికే సేయ్యం, సన్థరిత్వాన పక్కమో’’తి ఇమస్స ఉద్దేసపాఠస్స సఙ్ఘికే విహారే…పే… పక్కమనన్తి అత్థో దట్ఠబ్బోతి యోజనా. తత్రాతి తస్మిం పక్కమనే అయం ఈదిసో మయా వుచ్చమానో వినిచ్ఛయో వేదితబ్బోతి అత్థో. కతమో సో వినిచ్ఛయోతి ఆహ ‘‘సఙ్ఘికే…పే… పాచిత్తియ’’న్తి. అపరిక్ఖిత్తస్స ఉపచారో నామ సేనాసనతో ద్వే లేడ్డుపాతా. పాచిత్తియన్తి పఠమం పాదం అతిక్కామేన్తస్స దుక్కటం, దుతియాతిక్కమే పాచిత్తియం. కథం విఞ్ఞాయతిచ్చాహ ‘‘యో పన భిక్ఖు…పే… వచనతో’’తి.

తత్థ సఙ్ఘికో విహారో పాకటో, సేయ్యా అపాకటా, సా కతివిధాఇచ్చాహ ‘‘సేయ్యా నామ…పే… దసవిధా’’తి. తత్థాపి కతమా భిసి, కతమా చిమిలికాదయోతి ఆహ ‘‘తత్థ భిసీతి…పే… ఏస నయో పణ్ణసన్థారే’’తి. తత్థ మఞ్చే అత్థరితబ్బాతి మఞ్చకభిసి, ఏవం ఇతరత్ర, వణ్ణానురక్ఖణత్థం కతాతి పటఖణ్డాదీహి సిబ్బిత్వా కతా. భూమియం అత్థరితబ్బాతి చిమిలికాయ సతి తస్సా ఉపరి, అసతి సుద్ధభూమియం అత్థరితబ్బా. సీహధమ్మాదీనం పరిహరణే ఏవ పటిక్ఖేపోతి ఇమినా మఞ్చపీఠాదీసు అత్థరిత్వా పున సంహరిత్వా ఠపనాదివసేన అత్తనో అత్థాయ పరిహరణమేవ న వట్టతి, భూమత్థరణాదివసేన పరిభోగో పన అత్తనో పరిహరణం న హోతీతి దస్సేతి. ఖన్ధకే హి ‘‘అన్తోపి మఞ్చే పఞ్ఞత్తాని హోన్తి, బహిపి మఞ్చే పఞ్ఞత్తాని హోన్తీ’’తి ఏవం అత్తనో అత్థాయ మఞ్చాదీసు పఞ్ఞపేత్వా పరిహరణవత్థుస్మిం ‘‘న, భిక్ఖవే, మహాచమ్మాని ధారేతబ్బాని సీహచమ్మం బ్యగ్ఘచమ్మం దీపిచమ్మం, యో ధారేయ్య, ఆపత్తి దుక్కటస్సా’’తి (మహావ. ౨౫౫) పటిక్ఖేపో కతో, తస్మా వుత్తనయేనేవేత్థ అధిప్పాయో దట్ఠబ్బో. సారత్థదీపనియం (సారత్థ. టీ. పాచిత్తియ ౩.౧౧౨) పన ‘‘యది ఏవం ‘పరిహరణేయేవ పటిక్ఖేపో’తి ఇదం కస్మా వుత్తన్తి చోదనం కత్వా ‘అనుజానామి, భిక్ఖవే, సబ్బం పాసాదపరిభోగ’న్తి (చూళవ. ౩౨౦) వచనతో పుగ్గలికేపి సేనాసనే సేనాసనపరిభోగవసేన నియమితం సువణ్ణఘటాదికం పరిభుఞ్జితుం వట్టమానమ్పి కేవలం అత్తనో సన్తకం కత్వా పరిభుఞ్జితుం న వట్టతి. ఏవమిదం భూమత్థరణవసేన పరిభుఞ్జితుం వట్టమానమ్పి అత్తనో సన్తకం కత్వా తం తం విహారం హరిత్వా పరిభుఞ్జితుం న వట్టతీతి దస్సనత్థం పరిహరణేయేవ పటిక్ఖేపో వేదితబ్బో’’తి వుత్తం.

పావారో కోజవోతి పచ్చత్థరణత్థాయేవ ఠపితా ఉగ్గతలోమా అత్థరణవిసేసా. ఏత్తకమేవ వుత్తన్తి అట్ఠకథాసు (పాచి. అట్ఠ. ౧౧౬) వుత్తం. ‘‘ఇదం అట్ఠకథాసు తథావుత్తభావదస్సనత్థం వుత్తం, అఞ్ఞమ్పి తాదిసం మఞ్చపీఠేసు అత్థరితబ్బం అత్థరణమేవా’’తి తీసుపి గణ్ఠిపదేసు వుత్తం. మాతికాట్ఠకథాయం (కఙ్ఖా. అట్ఠ. దుతియసేనాసనసిక్ఖాపదవణ్ణనా) పన ‘‘పచ్చత్థరణం నామ పావారో కోజవో’’తి నియమేత్వా వుత్తం, తస్మా గణ్ఠిపదేసు వుత్తం ఇమినా న సమేతి, ‘‘వీమంసిత్వా గహేతబ్బ’’న్తి సారత్థదీపనియం (సారత్థ. టీ. పాచిత్తియ ౩.౧౧౬) వుత్తం. వీమంసితే పన ఏవమధిప్పాయో పఞ్ఞాయతి – మాతికాట్ఠకథాపి అట్ఠకథాయేవ, తస్మా మహాఅట్ఠకథాదీసు వుత్తనయేన ‘‘పావారో కోజవో’’తి నియమేత్వా వుత్తం, ఏవం నియమనే సతిపి యథా ‘‘లద్ధాతపత్తో రాజకుమారో’’తి ఆతపత్తస్స లద్ధభావేయేవ నియమేత్వా వుత్తేపి నిదస్సననయవసేన రాజకకుధభణ్డసామఞ్ఞేన సమానా వాలబీజనాదయోపి వుత్తాయేవ హోన్తి, ఏవం ‘‘పావారో కోజవో’’తి నియమేత్వా వుత్తేపి నిదస్సననయవసేన తేహి మఞ్చపీఠేసు అత్థరితబ్బభావసామఞ్ఞేన సమానా అఞ్ఞే అత్థరణాపి వుత్తాయేవ హోన్తి, తస్మా గణ్ఠిపదేసు వుత్తవచనం అట్ఠకథావచనస్స పటిలోమం న హోతి, అనులోమమేవాతి దట్ఠబ్బం.

ఇమస్మిం పన ఠానే ‘‘యేన విహారో కారితో, సో విహారస్సామికో’’తి పాఠం నిస్సాయ ఏకచ్చే వినయధరా ‘‘సఙ్ఘికవిహారస్స వా పుగ్గలికవిహారస్స వా విహారదాయకోయేవ సామికో, సోయేవ ఇస్సరో, తస్స రుచియా ఏవ వసితుం లభతి, న సఙ్ఘగణపుగ్గలానం రుచియా’’తి వినిచ్ఛయం కరోన్తి, సో వీమంసితబ్బో, కథం అయం పాఠో కిమత్థం సాధేతి ఇస్సరత్థం వా ఆపుచ్ఛితబ్బత్థం వాతి? ఏవం వీమంసితే ‘‘భిక్ఖుమ్హి సతి భిక్ఖు ఆపుచ్ఛితబ్బో’’తిఆదివచనతో ఆపుచ్ఛితబ్బత్థమేవ సాధేతి, న ఇస్సరత్థన్తి విఞ్ఞాయతి.

అథ సియా ‘‘ఆపుచ్ఛితబ్బత్థే సిద్ధే ఇస్సరత్థో సిద్ధోయేవ హోతి. ఇస్సరభావతోయేవ హి సో ఆపుచ్ఛితబ్బో’’తి. తత్థేవం వత్తబ్బం – ‘‘ఆపుచ్ఛన్తేన చ భిక్ఖుమ్హి సతి భిక్ఖు ఆపుచ్ఛితబ్బో, తస్మిం అసతి సామణేరో, తస్మిం అసతి ఆరామికో’’తిఆదివచనతో ఆయస్మన్తానం మతేన భిక్ఖుపి సామణేరోపి ఆరామికోపి విహారకారకోపి తస్స కులే యో కోచి పుగ్గలోపి ఇస్సరోతి ఆపజ్జేయ్య, ఏవం విఞ్ఞాయమానేపి భిక్ఖుమ్హి వా సామణేరే వా ఆరామికే వా సతి తేయేవ ఇస్సరా, న విహారకారకో. తేసు ఏకస్మిమ్పి అసతియేవ విహారకారకో ఇస్సరో సియాతి. ఇమస్మిం పన అధికారే సఙ్ఘికం సేనాసనం రక్ఖణత్థాయ ఆపుచ్ఛితబ్బంయేవ వదతి, న ఇస్సరభావతో ఆపుచ్ఛితబ్బం. వుత్తఞ్హి అట్ఠకథాయం (పాచి. అట్ఠ. ౧౧౬) ‘‘అనాపుచ్ఛం వా గచ్ఛేయ్యాతి ఏత్థ భిక్ఖుమ్హి సతి భిక్ఖు ఆపుచ్ఛితబ్బో’’తిఆది.

అథాపి ఏవం వదేయ్య ‘‘న సకలస్స వాక్యపాఠస్స అధిప్పాయత్థం సన్ధాయ అమ్హేహి వుత్తం, అథ ఖో ‘విహారస్సామికో’తి ఏతస్స పదత్థంయేవ సన్ధాయ వుత్తం. కథం? సం ఏతస్స అత్థీతి సామికో, విహారస్స సామికో విహారస్సామికో. ‘కో విహారస్సామికో నామా’తి వుత్తే ‘యేన విహారో కారితో, సో విహారస్సామికో నామా’తి వత్తబ్బో, తస్మా విహారకారకో దాయకో విహారస్సామికో నామాతి విఞ్ఞాయతి, ఏవం విఞ్ఞాయమానే సతి సామికో నామ సస్స ధనస్స ఇస్సరో, తస్స రుచియా ఏవ అఞ్ఞే లభన్తి, తస్మా విహారస్సామికభూతస్స దాయకస్స రుచియా ఏవ భిక్ఖూ వసితుం లభన్తి, న సఙ్ఘగణపుగ్గలానం రుచియాతి ఇమమత్థం సన్ధాయ వుత్త’’న్తి. తే ఏవం వత్తబ్బా – మా ఆయస్మన్తో ఏవం అవచుత్థ, యథా నామ ‘‘ఘటికారో బ్రహ్మా’’తి వుత్తో సో బ్రహ్మా ఇదాని ఘటం న కరోతి, పురిమత్తభావే పన కరోతి, తస్మా ‘‘ఘటం కరోతీ’’తి వచనత్థేన ‘‘ఘటికారో’’తి నామం లభతి. ఇతి పుబ్బే లద్ధనామత్తా పుబ్బవోహారవసేన బ్రహ్మభూతోపి ‘‘ఘటికారో’’ఇచ్చేవ వుచ్చతి, ఏవం సో విహారకారకో భిక్ఖూనం పరిచ్చత్తకాలతో పట్ఠాయ విహారస్సామికో న హోతి వత్థుపరిచ్చాగలక్ఖణత్తా దానస్స, పుబ్బే పన అపరిచ్చత్తకాలే విహారస్స కారకత్తా విహారస్సామికో నామ హోతి, సో ఏవం పుబ్బే లద్ధనామత్తా పుబ్బవోహారవసేన ‘‘విహారస్సామికో’’తి వుచ్చతి, న, పరిచ్చత్తస్స విహారస్స ఇస్సరభావతో. తేనేవ సమ్మాసమ్బుద్ధేన ‘‘విహారదాయకానం రుచియా భిక్ఖూ వసన్తూ’’తి అవత్వా సేనాసనపఞ్ఞాపకో అనుఞ్ఞాతోతి దట్ఠబ్బో. తథా హి వుత్తం విమతివినోదనియం (వి. వి. టీ. మహావగ్గ ౨.౨౯౫) ‘‘తేసం గేహానీతి ఏత్థ భిక్ఖూనం వాసత్థాయ కతమ్పి యావ న దేన్తి, తావ తేసం సన్తకంయేవ భవిస్సతీతి దట్ఠబ్బ’’న్తి, తేన దిన్నకాలతో పట్ఠాయ తేసం సన్తకాని న హోన్తీతి దస్సేతి. అయం పన కథా పాఠస్స సమ్ముఖీభూతత్తా ఇమస్మిం ఠానే కథితా. విహారవినిచ్ఛయో పన చతుపచ్చయభాజనవినిచ్ఛయే (వి. సఙ్గ. అట్ఠ. ౧౯౪ ఆదయో) ఆవి భవిస్సతి. యో కోచీతి ఞాతకో వా అఞ్ఞాతకో వా యో కోచి. యేన మఞ్చం పీఠం వా వినన్తి, తం మఞ్చపీఠకవానం.

౮౩. సిలుచ్చయలేణన్తి సిలుచ్చయే లేణం, పబ్బతగుహాతి అత్థో. ‘‘సేనాసనం ఉపచికాహి ఖాయిత’’న్తి ఇమస్మిం వత్థుస్మిం పఞ్ఞత్తత్తా వత్థుఅనురూపవసేన అట్ఠకథాయం ఉపచికాసఙ్కాయ అభావేన అనాపత్తి వుత్తా. వత్తక్ఖన్ధకే (చూళవ. ౩౬౦ ఆదయో) గమికవత్తం పఞ్ఞాపేన్తేన ‘‘సేనాసనం ఆపుచ్ఛితబ్బ’’న్తి వుత్తత్తా కేవలం ఇతికత్తబ్బతామత్తదస్సనత్థం ‘‘ఆపుచ్ఛనం పన వత్త’’న్తి వుత్తం, న పన వత్తభేదే దుక్కటన్తి దస్సనత్థం, తేనేవ అన్ధకట్ఠకథాయం ‘‘సేనాసనం ఆపుచ్ఛితబ్బ’’న్తి ఏత్థ ‘‘యం పాసాణపిట్ఠియం వా పాసాణత్థమ్భేసు వా కతసేనాసనం యత్థ ఉపచికా నారోహన్తి, తం అనాపుచ్ఛన్తస్సపి అనాపత్తీ’’తి వుత్తం. తస్మా యం వుత్తం గణ్ఠిపదే ‘‘తాదిసే సేనాసనే అనాపుచ్ఛా గచ్ఛన్తస్స పాచిత్తియం నత్థి, గమికవత్తే సేనాసనం అనాపుచ్ఛా గచ్ఛన్తో వత్తభేదో హోతి, తస్మా దుక్కటం ఆపజ్జతీ’’తి, తం న గహేతబ్బం.

పచ్ఛిమస్స ఆభోగేన ముత్తి నత్థీతి తస్స పచ్ఛతో గచ్ఛన్తస్స అఞ్ఞస్స అభావతో వుత్తం. ఏకం వా పేసేత్వా ఆపుచ్ఛితబ్బన్తి ఏత్థ గమనచిత్తస్స ఉప్పన్నట్ఠానతో అనాపుచ్ఛిత్వా గచ్ఛన్తే దుతియపాదుద్ధారే పాచిత్తియం. మణ్డపే వాతి సాఖామణ్డపే వా పదరమణ్డపే వా. రుక్ఖమూలేతి యస్స కస్సచి రుక్ఖస్స హేట్ఠా. పలుజ్జతీతి వినస్సతి.

౮౪. మజ్ఝే సంఖిత్తం పణవసణ్ఠానం కత్వా బద్ధన్తి ఏరకపత్తాదీహి వేణిం కత్వా తాయ వేణియా ఉభోసు పస్సేసు విత్థతట్ఠానే బహుం వేఠేత్వా తతో పట్ఠాయ యావ మజ్ఝట్ఠానం, తావ అన్తోఆకడ్ఢనవసేన వేఠేత్వా మజ్ఝే సంఖిపిత్వా తత్థ తత్థ బన్ధిత్వా కతం. యత్థ కాకా వా కులలా వా న ఊహదన్తీతి యత్థ ధువనివాసేన కులావకే కత్వా వసమానా ఏతే కాకకులలా, అఞ్ఞే వా సకుణా తం సేనాసనం న ఊహదన్తి, తాదిసే రుక్ఖమూలే నిక్ఖిపితుం అనుజానామీతి అత్థో.

౮౫. నవవాయిమోతి అధునా సుత్తేన వీతకచ్ఛేన పలివేఠితమఞ్చో. ఓనద్ధోతి కప్పియచమ్మేన ఓనద్ధో, సోవ ఓనద్ధకో సకత్థే క-పచ్చయవసేన. తేన హి వస్సేన సీఘం న నస్సతి. ఉక్కట్ఠఅబ్భోకాసికోతి ఇదం తస్స సుఖపటిపత్తిదస్సనమత్తం, ఉక్కట్ఠస్సాపి పన చీవరకుటి వట్టతేవ. కాయానుగతికత్తాతి భిక్ఖునో తత్థేవ నిసిన్నభావం దీపేతి, తేన చ వస్సభయేన సయం అఞ్ఞత్థ గచ్ఛన్తస్స ఆపత్తిం దస్సేతి. అబ్భోకాసికానం అతేమనత్థాయ నియమేత్వా దాయకేహి దిన్నమ్పి అత్తానం రక్ఖన్తేన రక్ఖితబ్బమేవ. ‘‘యస్మా పన దాయకేహి దానకాలేయేవ సతసహస్సగ్ఘనకమ్పి కమ్బలం ‘పాదపుఞ్ఛనిం కత్వా పరిభుఞ్జథా’తి దిన్నం తథేవ పరిభుఞ్జితుం వట్టతి, తస్మా ఇదమ్పి మఞ్చపీఠాదిసేనాసనం ‘అజ్ఝోకాసేపి యథాసుఖం పరిభుఞ్జథా’తి దాయకేహి దిన్నం చే, సబ్బస్మిమ్పి కాలే అజ్ఝోకాసే నిక్ఖిపితుం వట్టతీతి వదన్తీ’’తి సారత్థదీపనియం (సారత్థ. టీ. పాచిత్తియ ౩.౧౦౮-౧౧౦) వుత్తం. పేసేత్వా గన్తబ్బన్తి ఏత్థ ‘‘యో భిక్ఖు ఇమం ఠానం ఆగన్త్వా వసతి, తస్స దేథా’’తి వత్వా పేసేతబ్బం.

వలాహకానం అనుట్ఠితభావం సల్లక్ఖేత్వాతి ఇమినా గిమ్హానేపి మేఘే ఉట్ఠితే అబ్భోకాసే నిక్ఖిపితుం న వట్టతీతి దీపేతి. తత్ర తత్రాతి చేతియఙ్గణాదికే తస్మిం తస్మిం అబ్భోకాసే నియమేత్వా నిక్ఖిత్తా. మజ్ఝతో పట్ఠాయ పాదట్ఠానాభిముఖాతి యత్థ సమన్తతో సమ్మజ్జిత్వా అఙ్గణమజ్ఝే సబ్బదా కచవరస్స సఙ్కడ్ఢనేన మజ్ఝే వాలికా సఞ్చితా హోతి, తత్థ కత్తబ్బవిధిదస్సనత్థం వుత్తం, ఉచ్చవత్థుపాదట్ఠానాభిముఖం, భిత్తిపాదట్ఠానాభిముఖం వా వాలికా హరితబ్బాతి అత్థో. ‘‘యత్థ వా పన కోణేసు వాలికా సఞ్చితా, తత్థ తతో పట్ఠాయ అపరదిసాభిముఖా హరితబ్బా’’తి కేచి అత్థం వదన్తి. కేచి పన ‘‘సమ్మట్ఠట్ఠానస్స పదవలఞ్జేన అవికోపనత్థాయ సయం అసమ్మట్ఠట్ఠానే ఠత్వా అత్తనో పాదాభిముఖం వాలికా హరితబ్బాతి వుత్త’’న్తి వదన్తి. తత్థ ‘‘మజ్ఝతో పట్ఠాయా’’తి వచనస్స పయోజనం న దిస్సతి. సారత్థదీపనియం పన ‘‘పాదట్ఠానాభిముఖాతి నిసీదన్తానం పాదట్ఠానాభిముఖన్తి కేచి, సమ్మజ్జన్తస్స పాదట్ఠానాభిముఖన్తి అపరే, బహివాలికాయ అగమననిమిత్తం పాదట్ఠానాభిముఖా హరితబ్బాతి వుత్తన్తి ఏకే’’తి వుత్తం. కచవరం హత్థేహి గహేత్వా బహి ఛడ్డేతబ్బన్తి ఇమినా ‘‘కచవరం ఛడ్డేస్సామీ’’తి వాలికా న ఛడ్డేతబ్బాతి దీపేతి.

౮౬. కప్పం లభిత్వాతి ‘‘గచ్ఛా’’తి వుత్తవచనేన కప్పం లభిత్వా. థేరస్స హి ఆణత్తియా గచ్ఛన్తస్స అనాపత్తి. పురిమనయేనేవాతి ‘‘నిసీదిత్వా సయం గచ్ఛన్తో’’తిఆదినా పుబ్బే వుత్తనయేనేవ.

అఞ్ఞత్థ గచ్ఛతీతి తం మగ్గం అతిక్కమిత్వా అఞ్ఞత్థ గచ్ఛతి. లేడ్డుపాతుపచారతో బహి ఠితత్తా ‘‘పాదుద్ధారేన కారేతబ్బో’’తి వుత్తం, అఞ్ఞత్థ గచ్ఛన్తస్స పఠమపాదుద్ధారే దుక్కటం, దుతియపాదుద్ధారే పాచిత్తియన్తి అత్థో. పాకతికం అకత్వాతి అపటిసామేత్వా. అన్తరసన్నిపాతేతి అన్తరన్తరా సన్నిపాతే.

౮౭. ఆవాసికానంయేవ పలిబోధోతి ఏత్థ ఆగన్తుకేసు ఆగన్త్వా కిఞ్చి అవత్వా తత్థ నిసిన్నేసుపి నిసీదిత్వా ‘‘ఆవాసికాయేవ ఉద్ధరిస్సన్తీ’’తి గతేసుపి ఆవాసికానమేవ పలిబోధో. మహాపచ్చరివాదే పన ‘‘ఇదం అమ్హాక’’న్తి వత్వాపి అవత్వాపి నిసిన్నానమేవాతి అధిప్పాయో. మహాఅట్ఠకథావాదే ‘‘ఆపత్తీ’’తి పాచిత్తియమేవ వుత్తం. మహాపచ్చరియం పన సన్థరాపనే పాచిత్తియేన భవితబ్బన్తి అనాణత్తియా పఞ్ఞత్తత్తా దుక్కటం వుత్తం. ఉస్సారకోతి సరభాణకో. సో హి ఉద్ధంఉద్ధం పాళిపాఠం సారేతి పవత్తేతీతి ‘‘ఉస్సారకో’’తి వుచ్చతి. ‘‘ఇదం ఉస్సారకస్స, ఇదం ధమ్మకథికస్సా’’తి విసుం పఞ్ఞత్తత్తా అనాణత్తియా పఞ్ఞత్తేపి పాచిత్తియేనేవ భవితబ్బన్తి అధిప్పాయేన ‘‘తస్మిం ఆగన్త్వా నిసిన్నే తస్స పలిబోధో’’తి వుత్తం. కేచి పన వదన్తి ‘‘అనాణత్తియా పఞ్ఞత్తేపి ధమ్మకథికస్స అనుట్ఠాపనీయత్తా పాచిత్తియేన భవితబ్బం, ఆగన్తుకస్స పన పచ్ఛా ఆగతేహి వుడ్ఢతరేహి ఉట్ఠాపనీయత్తా దుక్కటం వుత్త’’న్తి.

౮౮. పాదపుఞ్ఛనీ నామ రజ్జుకేహి వా పిలోతికాయ వా పాదపుఞ్ఛనత్థం కతా. ఫలకపీఠం నామ ఫలకమయం పీఠం. అథ వా ఫలకఞ్చేవ దారుమయపీఠఞ్చ. దారుమయపీఠన్తి చ ఫలకమయమేవ పీఠం వేదితబ్బం. పాదకఠలికన్తి అధోతపాదట్ఠాపనకం. అజ్ఝోకాసే రజనం పచిత్వా …పే… పటిసామేతబ్బన్తి ఏత్థ థేవే అసతి రజనకమ్మే నిట్ఠితే పటిసామేతబ్బం. ‘‘భిక్ఖు వా సామణేరో వా ఆరామికో వా లజ్జీ హోతీతి వుత్తత్తా అలజ్జిం ఆపుచ్ఛిత్వా గన్తుం న వట్టతీ’’తి వదన్తి. ఓతాపేన్తో…పే… గచ్ఛతీతి ఏత్థ ‘‘కిఞ్చాపి ‘ఏత్తకం దూరం గన్తబ్బ’న్తి పరిచ్ఛేదో నత్థి, తథాపి లేడ్డుపాతం అతిక్కమ్మ నాతిదూరం గన్తబ్బ’’న్తి వదన్తి.

ఇతి వినయసఙ్గహసంవణ్ణనాభూతే వినయాలఙ్కారే

మఞ్చపీఠాదిసఙ్ఘికసేనాసనేసుపటిపజ్జితబ్బ-

వినిచ్ఛయకథాలఙ్కారో నామ

సత్తరసమో పరిచ్ఛేదో.