౮. అనురుద్ధసంయుత్తం

౧. రహోగతవగ్గో

౧-౨. పఠమరహోగతసుత్తాదివణ్ణనా

౮౯౯-౯౦౦. ఛత్తింసాయ ఠానేసూతి అజ్ఝత్తం కాయే సముదయధమ్మానుపస్సీ, వయో, సముదయవయో, బహిద్ధా సముదయో, వయో, సముదయవయో, అజ్ఝత్తబహిద్ధా సముదయో, వయో, సముదయవయధమ్మానుపస్సీతి నవ అనుపస్సనా, తథా వేదనాయ చిత్తే ధమ్మేసూతి ఏవం ఛత్తింసాయ ఠానేసు. దుతియే ద్వాదససు ఠానేసూతి కాయే అజ్ఝత్తం బహిద్ధా అజ్ఝత్తబహిద్ధా, వేదనాయ చిత్తే ధమ్మేసూతి ఏవం ద్వాదససు ఠానేసు.

౩. సుతనుసుత్తవణ్ణనా

౯౦౧. ఇమాయ పాళియాతి ఇమాయ హీనత్తికపాళియా. ఇమే ధమ్మా హీనా లామకట్ఠేన. ఇమే ధమ్మా మజ్ఝిమా హీనపణీతానం మజ్ఝే భవాతి. ఉత్తమట్ఠేన అత్తప్పకట్ఠేన పధానభావం నీతాతి పణీతా.

౪-౭. పఠమకణ్డకీసుత్తాదివణ్ణనా

౯౦౨-౯౦౫. కణ్డకా ఏతిస్సా అత్థీతి కణ్డకీ, కరమన్దగచ్ఛో. ఓసధిభావాపేక్ఖాయ ఇత్థిలిఙ్గనిద్దేసో, తబ్బహులతాయ తం వనం ‘‘కణ్డకీవన’’న్తేవ పఞ్ఞాయిత్థ. సహస్సలోకన్తి సహస్సచక్కవాళలోకం. దసచక్కవాళసహస్సం ఏకావజ్జనస్స ఆపాథం ఆగచ్ఛతి తథా ఆలోకవడ్ఢనస్స కతత్తా.

౯. అమ్బపాలివనసుత్తవణ్ణనా

౯౦౭. అరహత్తభావదీపకన్తి అరహత్తస్స అత్థిభావదీపకం. ‘‘అరహత్తభావదీపిక’’న్తి వా పాఠో.

రహోగతవగ్గవణ్ణనా నిట్ఠితా.

౨. దుతియవగ్గవణ్ణనా

౯౦౯-౯౨౨. దసబలఞాణన్తి దసవిధబలఞాణం. ఏకదేసేనాతి పదేసవసేన. సావకానమ్పి అత్తనో అభినీహారానురూపం ఞాణం పవత్తతీతి తే కాలపదేసవసేన చేవ యథాపరిచయసత్తపదేసవసేన చ ఠానానీతి జానన్తి, సమ్మాసమ్బుద్ధానం పన అనన్తఞాణతాయ సబ్బత్థేవ అప్పటిహతమేవ ఞాణన్తి ఆహ – ‘‘సబ్బఞ్ఞుబుద్ధానం పనా’’తిఆది. ఏతం దసబలఞాణం అనన్తవిసయత్తా నిప్పదేసం అనూనతాయ సబ్బాకారపరిపూరం.

దుతియవగ్గవణ్ణనా నిట్ఠితా.

అనురుద్ధసంయుత్తవణ్ణనా నిట్ఠితా.