౧-౪. పఠమపుబ్బేసమ్బోధసుత్తాదివణ్ణనా

౧౩-౧౬. ద్వీసుపి సుత్తేసు ఆయతనానం వసేన దేసనా ఏకరసావాతి ‘‘పఠమదుతియేసూ’’తి ఏకజ్ఝం పదుద్ధారో కతో. ఆహితో అహంమానో ఏత్థాతి అత్తా, అత్తభావో. అత్తానమధి అజ్ఝత్తం, తప్పరియాపన్నత్తా తత్థ భవాని అజ్ఝత్తికాని, తేసం అజ్ఝత్తికానం. అజ్ఝత్తఞ్చ నామ అజ్ఝత్తజ్ఝత్తం, నియకజ్ఝత్తం, గోచరజ్ఝత్తం, విసయజ్ఝత్తన్తి చతుబ్బిధం. తత్థ అజ్ఝత్తజ్ఝత్తం అజ్ఝత్తే భవన్తి అజ్ఝత్తికన్తి ఆహ ‘‘అజ్ఝత్తజ్ఝత్తవసేన అజ్ఝత్తికాన’’న్తి. తేసం చక్ఖాదీనం అజ్ఝత్తేసుపి అజ్ఝత్తికభావో అధికసినేహవత్థుతాయాతి ఆహ ‘‘ఛన్దరాగస్స అధిమత్తబలవతాయా’’తి. ఇదాని తత్థ తమత్థం పటియోగినా సద్ధిం ఉదాహరణవసేన దస్సేన్తో ‘‘మనుస్సానం హీ’’తిఆదిమాహ. తం ఉత్తానమేవ. బాహిరానీతి అజ్ఝత్తికతో బహి భవాని.

పఠమపుబ్బేసమ్బోధసుత్తాదివణ్ణనా నిట్ఠితా.