౭. సారిపుత్తసంయుత్తం

౧-౯. వివేకజసుత్తాదివణ్ణనా

౩౩౨-౩౪౦. న ఏవం హోతీతి ఏత్థ ‘‘అహం సమాపజ్జామీ’’తి వా, ‘‘అహం సమాపన్నో’’తి వా మా హోతు తదా తాదిసాభోగాభావతో. ‘‘అహం వుట్ఠితో’’తి పన కస్మా న హోతీతి? సబ్బథాపి న హోత్వేవ అహఙ్కారస్స సబ్బసో పహీనత్తా.

వివేకజసుత్తాదివణ్ణనా నిట్ఠితా.

౧౦. సూచిముఖీసుత్తవణ్ణనా

౩౪౧. తస్మిం వచనే పటిక్ఖిత్తేతి – ‘‘అధోముఖో భుఞ్జసీ’’తి పరిబ్బాజికాయ వుత్తవచనే – ‘‘న ఖ్వాహం భగినీ’’తి పటిక్ఖిత్తే. వాదన్తి దోసం. ఉబ్భముఖోతి ఉపరిముఖో. పురత్థిమాదికా చతస్సో దిసా. దక్ఖిణపురత్థిమాదికా చతస్సో విదిసా.

ఆరామఆరామవత్థుఆదీసు భూమిపరికమ్మబీజాభిసఙ్ఖరణాదిపటిసంయుత్తా విజ్జా వత్థువిజ్జా, తస్సా పన మిచ్ఛాజీవభావం దస్సేతుం ‘‘తేస’’న్తిఆది వుత్తం. తేసం తేసం అత్తనో పచ్చయదాయకానం. తత్థ తత్థ గమనన్తి తేసం సాసనహరణవసేన తం తం గామన్తరదేసన్తరం. ఏవమారోచేసీతి అత్తుక్కంసనపరవమ్భనరహితం కణ్ణసుఖం పేమనీయం హదయఙ్గమం థేరస్స ధమ్మకథం సుత్వా పసన్నమానసా ఏవం ‘‘ధమ్మికం సమణా సక్యపుత్తియా’’తిఆదినా సాసనస్స గుణసంకిత్తనవాచం కులానం ఆరోచేసి.

సూచిముఖీసుత్తవణ్ణనా నిట్ఠితా.

సారిపుత్తసంయుత్తవణ్ణనా నిట్ఠితా.