౮. నాగసంయుత్తం

౧. సుద్ధికసుత్తవణ్ణనా

౩౪౨. అణ్డజాతి అణ్డే జాతా. వత్థికోసేతి వత్థికోససఞ్ఞితే జరాయుపుటే జాతా. సంసేదేతి సంసిన్నే కిలిన్నట్ఠానే ఉప్పన్నా. ఉపపతిత్వా వియాతి కుతోచిపి అవపతిత్వా వియ నిబ్బత్తా. పుగ్గలానన్తి తథా వినేతబ్బపుగ్గలానం.

సుద్ధికసుత్తవణ్ణనా నిట్ఠితా.

౨-౫౦. పణీతతరసుత్తాదివణ్ణనా

౩౪౩-౩౯౧. విస్సట్ఠకాయాతి ‘‘యే చమ్మేన వా రుధిరేన వా అట్ఠినా వా అత్థికా, తే సబ్బం గణ్హన్తూ’’తి తత్థ నిరపేక్ఖచిత్తతాయ అధిట్ఠితసీలతాయ పరిచ్చత్తసరీరా. దువిధకారినోతి ‘‘కాలేన కుసలం, కాలేన అకుసల’’న్తి ఏవం కుసలాకుసలకారినో. సహ బ్యయతి పవత్తతీతి సహబ్యో, సహచారో. తస్స భావో సహబ్యతా, తం సహబ్యతం. అదనీయతో అన్నం. ఖాదనీయతో ఖజ్జం. పాతబ్బతో పానం. నివసనీయతో వత్థం. నివసితబ్బం నివాసనం. పరివరితబ్బం పావురణం. యాన్తి తేనాతి యానం, ఉపాహనాదియానాని. ఆదిసద్దేన వయ్హసివికాదీనం సఙ్గహో. ఛత్తమ్పి పరిస్సయాతపదుక్ఖపరిరక్ఖణేన మగ్గగమనసాధనన్తి కత్వా ‘‘ఛత్తుపాహన’’న్తిఆది వుత్తం. తేన వుత్తం ‘‘యం కిఞ్చి గమనపచ్చయ’’న్తి. పత్థనం కత్వా…పే… తత్థ నిబ్బత్తన్తి చమ్పేయ్యనాగరాజా వియాతి దట్ఠబ్బం.

పణీతతరసుత్తాదివణ్ణనా నిట్ఠితా.

నాగసంయుత్తవణ్ణనా నిట్ఠితా.