౧౧. సఙ్గారవసుత్తవణ్ణనా

౨౦౭. పచ్చేతీతి పత్తియాయతి సద్దహతి. తథాభూతో చ తమత్థం నికామేన్తో నామ హోతీతి వుత్తం ‘‘ఇచ్ఛతి పత్థేతీ’’తి. సాధు, భన్తేతి ఏత్థ సాధు-సద్దో ఆయాచనత్థో, న అభినన్దనత్థోతి ‘‘ఆయాచమానో ఆహా’’తి వత్వా ఆయాచనే కారణం దస్సేన్తో ‘‘థేరస్స కిరా’’తిఆదిమాహ. ఉదకసుద్ధికో న ఏకంసేన అపాయూపగో, లద్ధియా పన సావజ్జకిలేసభూతభావతో ఆయాచతి. అఞ్ఞం కారణం అపదిసన్తో ‘‘అపిచా’’తిఆదిమాహ. ఫలభూతో అత్థో ఏతస్సాతి అత్థవసం, కారణన్తి ఆహ ‘‘అత్థానిసంసం అత్థకారణ’’న్తి. పపఞ్చసూదనియం పన ఫలేనేవ అరణీయతో అత్థో, కారణన్తి కత్వా ‘‘అత్థో ఏవ అత్థవసో, తస్మా ద్వే అత్థవసేతి ద్వే అత్థే ద్వే కారణానీ’’తి వుత్తం.

సఙ్గారవసుత్తవణ్ణనా నిట్ఠితా.