౯. పఠమసుక్కాసుత్తవణ్ణనా

౨౪౩. రథికన్తి రచ్ఛం. గహేత్వాతి గన్త్వా. సిఙ్ఘాటకన్తి అఞ్ఞత్థ తికోణా రచ్ఛా వుచ్చతి. ఇధ పన ‘‘చతుక్క’’న్తి వుత్తం. ‘‘మధుపీకా’’తి ఏత్థ మధు-సద్దేన మధువిసేసో వుచ్చతీతి ఆహ ‘‘గన్ధమధుపానం పీతా వియా’’తి. సామఞ్ఞజోతనా హి విసేసే తిట్ఠతీతి గన్ధమధూతి చ అతివియ మధురో మదనియో ఏకో మధువిసేసో. తేనాహ ‘‘అసఞ్ఞీ హుత్వా సయతేవా’’తి.

న పటివానీయం న అపనేతబ్బన్తి అప్పటివానీయం. తేనాహ ‘‘బాహిరకఞ్హీ’’తిఆది. యం కిఞ్చి సన్తపణీతభావావహం న సేచనన్తి అసేచనకం. తతో ఏవ అనాసిత్తకం. ఓజవన్తన్తి బహుసమ్మతఓజవన్తసదిసతాయ ఓజవన్తం. తేనాహ ‘‘యథా హీ’’తిఆది. ధమ్మతాయాతి అత్తనో సభావేనేవ. మధురో ఇట్ఠో. పివన్తీ వియాతి సుక్కాయ భిక్ఖునియా ఉపనీయమానం సద్ధమ్మామతరసం అత్తనో సోతఞ్జలిం పూరేత్వా ఓదహన్తీవ. వలాహకతో ఆగతం వలాహకం.

పఠమసుక్కాసుత్తవణ్ణనా నిట్ఠితా.