౧౦. దుతియమారకథా

౩౫. మయ్హన్తిపదస్స ‘‘అనుప్పత్తా సచ్ఛికతా’’తిపదేసు ఛట్ఠీకత్తుభావం దస్సేన్తో ఆహ ‘‘మయా ఖోతి అత్థో’’తి. ‘‘అథ వా’’తిఆదినా ‘‘మయ్హ’’న్తిపదస్స ‘‘యోనిసో మనసికారా, యోనిసో సమ్మప్పధానా’’తిపదేసు సమ్బన్ధభావం దస్సేతి. ‘‘యోనిసో మనసికారా, యోనిసో సమ్మప్పధానా’’తి ఏత్థ కారణత్థే నిస్సక్కవచనన్తి ఆహ ‘‘తేన హేతునా’’తి. ‘‘పునా’’తిఆదినా ‘‘మయ్హ’’న్తిపదం ‘‘యోనిసో మనసికారా, యోనిసో సమ్మప్పధానా’’తిపదేసు సామ్యత్థే సామిభావేన యోజేత్వా పున ‘‘అనుప్పత్తా, సచ్ఛికతా’’తి పదేసు కత్తుత్థే సామిభావేన విభత్తివిపల్లాసో కాతబ్బోతి దస్సేతి.