౬౩. ఉపసమ్పదావిధికథా

౧౨౬. తం ఉపజ్ఝన్తి తం ఉపజ్ఝాయం. ‘‘ఉపజ్ఝా’’తి చ ‘‘ఉపజ్ఝాయో’’తి చ హి అత్థతో ఏకం, బ్యఞ్జనమేవ నానం యథా ‘‘సభా సభాయ’’న్తి. ఏత్థ ఉపజ్ఝాసద్దో రాజాదిగణో (రుపసిద్ధి ౫౯౯ సుత్తే; సద్దనీతి ౧౧౪౦ సుత్తే), ఉపజ్ఝాయసద్దో పురిసాదిగణో. సభాసద్దో ఇత్థిలిఙ్గో, సభాయసద్దో పుల్లిఙ్గో వా నపుంసకలిఙ్గో వా. ‘‘విత్థాయన్తీ’’తి సద్దో నామధాతూతి ఆహ ‘‘విత్థద్ధగత్తా హోన్తీ’’తి. విత్థసద్దో హి దబ్బవాచకత్తా నామసద్దో, వికారేన థద్ధో గత్తో ఏతేసన్తి విత్థా, ద్ధకారస్స లోపం కత్వా, తతో ఆయపచ్చయో హోతి. యన్తి యం అన్తరాయజాతం. తవ సరీరేతి తుయ్హం కాయే. ‘‘నిబ్బత్త’’న్తి ఇమినా ‘‘జాత’’న్తి ఏత్థ జనధాతుయా జననత్థం దస్సేతి, ‘‘విజ్జమాన’’న్తి ఇమినా జనీధాతుయా పాతుభావత్థం దస్సేతి. సన్తన్తి సంవిజ్జమానం. ఇతిఆది కథేతబ్బన్తి యోజనా.