౨౭. రాజభటవత్థుకథా

౯౦. ఉచ్చినథాతి ఏత్థ చిధాతుయా వడ్ఢనత్థం దస్సేన్తో ఆహ ‘‘వడ్ఢేథా’’తి. సోతాపన్నత్తాతి బిమ్బిసారరఞ్ఞో =౦౮ సోతాపన్నభావతో. ఘాతేథాతి జీవితా వోరోపేథ. హనథాతి పహరథ. తతోతి ఉపజ్ఝాయతో. ఆచరియో సేట్ఠోతి సమ్బన్ధో. తతోతి ఆచరియతో. ఇదన్తి వచనం, ఆగతన్తి సమ్బన్ధో. ఆహంసు వోహారికా మహామత్తా ముసావాదేనాతి యోజనా. అమచ్చోతి సబ్బరాజకిచ్చేసు అమా సహ రఞ్ఞా భవతీతి అమచ్చో. అమాసద్దో సహత్థే నిపాతో. ‘‘అమా’’తి నిపాతతో భవత్థే అచ్చపచ్చయో (మోగ్గల్లానే ౪.౨౩ సుత్తే). మహామత్తోతి మహన్తో మత్తా ఇస్సరియా ఏతస్సాతి మహామత్తో. మత్తాసద్దో హేత్థ ఇస్సరియవాచకో. సేవకోతి రాజానం సేవతి భజతీతి సేవకో. భత్తవేతనభటోతి భత్తవేతనానమత్థాయ భటో. తస్సాతి రాజభటస్స. పుత్తనత్తభాతుకాదయోతిఆదిసద్దేన భాగినేయ్యాదయో సఙ్గణ్హాతి. యో పనాతి రాజభటో పన. నియ్యాతేతీతి అప్పేతి. తం ఠానన్తి తం రాజభటట్ఠానం. యేన వాతి కమ్మకారేన వా. యంకమ్మకారణాతి యస్స కమ్మస్స కారణా. యో వాతి రాజభటో వా. పబ్బజస్సూతి పబ్బాజేహి.