౮. కాలికనిద్దేసో

కాలికా చాతి –

౮౪. పటిగ్గహితా చత్తారో, కాలికా యావకాలికం;

యామకాలికం సత్తాహ-కాలికం యావజీవికం.

౮౫. పిట్ఠం మూలం ఫలం ఖజ్జం, గోరసో ధఞ్ఞభోజనం;

యాగుసూపప్పభుతయో, హోన్తేతే యావకాలికా.

౮౬. మధుముద్దికసాలూక-చోచమోచమ్బజమ్బుజం;

ఫారుసం నగ్గిసన్తత్తం, పానకం యామకాలికం.

౮౭. సానులోమాని ధఞ్ఞాని, ఠపేత్వా ఫలజో రసో;

మధూకపుప్ఫమఞ్ఞత్ర, సబ్బో పుప్ఫరసోపి చ.

౮౮. సబ్బపత్తరసో చేవ, ఠపేత్వా పక్కడాకజం;

సీతోదమద్దితోదిచ్చ-పాకో వా యామకాలికో.

౮౯. సప్పినోనీతతేలాని, మధుఫాణితమేవ చ;

సత్తాహకాలికా సప్పి, యేసం మంసమవారితం.

౯౦. తేలం తిలవసేరణ్డ-మధుసాసపసమ్భవం;

ఖుద్దాభమరమధుకరి-మక్ఖికాహి కతం మధు;

రసాదిఉచ్ఛువికతి, పక్కాపక్కా చ ఫాణితం.

౯౧. సవత్థుపక్కా సామం వా, వసా కాలే అమానుసా;

అఞ్ఞేసం న పచే వత్థుం, యావకాలికవత్థునం.

౯౨. హలిద్దిం సిఙ్గివేరఞ్చ, వచత్తం లసుణం వచా;

ఉసీరం భద్దముత్తఞ్చాతివిసా కటురోహిణీ;

పఞ్చమూలాదికఞ్చాపి, మూలం తం యావజీవికం.

౯౩. బిళఙ్గం మరిచం గోట్ఠ-ఫలం పిప్ఫలి రాజికా;

తిఫలేరణ్డకాదీనం, ఫలం తం యావజీవికం.

౯౪. కప్పాసనిమ్బకుటజపటోలసులసాదినం;

సూపేయ్యపణ్ణం వజ్జేత్వా, పణ్ణం తం యావజీవికం.

౯౫. ఠపేత్వా ఉచ్ఛునియ్యాసం,

సరసం ఉచ్ఛుజం తచం;

నియ్యాసో చ తచో సబ్బో,

లోణం లోహం సిలా తథా.

౯౬. సుద్ధసిత్థఞ్చ సేవాలో, యఞ్చ కిఞ్చి సుఝాపితం;

వికటాదిప్పభేదఞ్చ, ఞాతబ్బం యావజీవికం.

౯౭. మూలం సారం తచో ఫేగ్గు, పణ్ణం పుప్ఫం ఫలం లతా;

ఆహారత్థ మసాధేన్తం, సబ్బం తం యావజీవికం.

౯౮. సబ్బకాలికసమ్భోగో, కాలే సబ్బస్స కప్పతి;

సతి పచ్చయే వికాలే, కప్పతే కాలికత్తయం.

౯౯. కాలయామమతిక్కన్తా, పాచిత్తిం జనయన్తుభో;

జనయన్తి ఉభోపేతే, అన్తోవుత్థఞ్చ సన్నిధిం.

౧౦౦. సత్తాహకాలికే సత్త, అహాని అతినామితే;

పాచిత్తి పాళినారుళ్హే, సప్పిఆదిమ్హి దుక్కటం.

౧౦౧. నిస్సట్ఠలద్ధం మక్ఖేయ్య, నఙ్గం నజ్ఝోహరేయ్య చ;

వికప్పేన్తస్స సత్తాహే, సామణేరస్సధిట్ఠతో;

మక్ఖనాదిఞ్చ నాపత్తి, అఞ్ఞస్స దదతోపి చ.

౧౦౨. యావకాలికఆదీని, సంసట్ఠాని సహత్తనా;

గాహాపయన్తి సబ్భావం, తస్మా ఏవముదీరితం.

౧౦౩. పురే పటిగ్గహితఞ్చ, సత్తాహం యావజీవికం;

సేసకాలికసమ్మిస్సం, పాచిత్తి పరిభుఞ్జతో.

౧౦౪. యావకాలికసమ్మిస్సం, ఇతరం కాలికత్తయం;

పటిగ్గహితం తదహు, తదహేవ చ భుఞ్జయే.

౧౦౫. యామకాలికసమ్మిస్సం, సేసమేవం విజానియం;

సత్తాహకాలికమిస్సఞ్చ, సత్తాహం కప్పతేతరన్తి.