౩౯. వస్సూపనాయికనిద్దేసో

వస్సూపనాయికా చేవాతి –

౩౦౯. పురిమికా పచ్ఛిమికా, దువే వస్సూపనాయికా;

తత్థాలయపరిగ్గాహో, వచీభేదో చ ఏదిసో.

౩౧౦. ‘‘ఇమస్మిం విహారే ఇమం, తేమాసం వస్సం ఉపేమి;

ఇధ వస్సం ఉపేమీ’’తి, చిత్తుప్పాదేత్థ ఆలయో.

౩౧౧. నోపేతుకామో ఆవాసం, తదహూతిక్కమేయ్య వా;

భవేయ్య దుక్కటాపత్తి, జానం వానుపగచ్ఛతో.

౩౧౨. దుతియం ఉపగచ్ఛేయ్య, ఛిన్నవస్సోనుపాగతో;

న పక్కమేయ్య తేమాసం, అవసిత్వాన చారికం.

౩౧౩. మాతాపితూనమత్థాయ, పఞ్చన్నం సహధమ్మినం;

గిలానతదుపట్ఠాక-భత్తమేసిస్సమోసధం.

౩౧౪. పుచ్ఛిస్సామి ఉపట్ఠిస్సం, గన్త్వానభిరతం అహం;

వూపకాసిస్సం కుక్కుచ్చం, దిట్ఠిం గరుకమాదికం.

౩౧౫. కరిస్సం వాపి కారేస్సం, వినోదనం వివేచనం;

వుట్ఠానం వాపి ఉస్సుక్కం, గన్తుమిచ్చేవమాదినా;

లబ్భం సత్తాహకిచ్చేన, పహితాపహితేపి వా.

౩౧౬. సఙ్ఘకమ్మే వజే ధమ్మ-స్సవనత్థం నిమన్తితో;

గరూహి పహితో వాపి, గరూనం వాపి పస్సితుం.

౩౧౭. న భణ్డధోవనుద్దేస-ఞాతుపట్ఠాకదస్సనే;

లబ్భం న పాపుణేయ్యజ్జే-వాగమిస్సన్తుదూరగో.

౩౧౮. సేసఞాతీహి పహితే, భిక్ఖునిస్సితకేన చ;

ఉపాసకోపాసికాహి, నిద్దిసిత్వావ పేసితే.

౩౧౯. వస్సచ్ఛేదే అనాపత్తి, అన్తరాయే సతత్తనో;

సఙ్ఘసామగ్గియా వా నో, ఛిన్నవస్సో పవారయే.

౩౨౦. అజ్ఝోకాసే చ రుక్ఖస్స, సుసిరే విటపేపి వా;

ఛవకుటిఛత్తచాటీ-సూపగన్తుం న వట్టతి.

౩౨౧. అసేనాసనికేనాపి, ఉపగన్తుం న లబ్భతి;

పవారేతుఞ్చ లబ్భతి, నావాసత్థవజూపగోతి.