౩౧. వికప్పనానిద్దేసో

వికప్పనా చేవాతి –

౨౨౧. సమ్ముఖా పరమ్ముఖాతి, దువే వుత్తా వికప్పనా;

సమ్ముఖాయ వికప్పేన్తో, బ్యత్తస్సేకస్స సన్తికే;

‘‘ఇమం చీవరం తుయ్హం, వికప్పేమీ’’తి భాసయే.

౨౨౨. ఏత్తావతా నిధేతుంవ, కప్పతీ న చ కప్పతి;

పరిభోగాదికం తేన, అప్పచ్చుద్ధటభావతో.

౨౨౩. ‘‘మయ్హం సన్తకం పరిభుఞ్జ వా విస్సజ్జేహి వా యథాపచ్చయం వా కరోహీ’’తి –

తేన పచ్చుద్ధటేయేవ, పరిభోగాది కప్పతి.

౨౨౪. అపరా సమ్ముఖావేకా, భిక్ఖుస్సేకస్స సన్తికే;

గహేత్వా నామమేకస్స, పఞ్చన్నం సహధమ్మినం.

౨౨౫. ‘‘ఇమం చీవరం తిస్సస్స భిక్ఖునో, తిస్సాయ భిక్ఖునియా, తిస్సస్స సామణేరస్స, తిస్సాయ సామణేరియా, తిస్సాయ సిక్ఖమానాయ వికప్పేమీ’’తి వత్తబ్బం.

తేన భిక్ఖునా ‘‘తిస్సస్స భిక్ఖునో, తిస్సాయ భిక్ఖునియా, తిస్సస్స సామణేరస్స, తిస్సాయ సామణేరియా, తిస్సాయ సిక్ఖమానాయ సన్తకం పరిభుఞ్జ వా విస్సజ్జేహి వా యథాపచ్చయం వా కరోహీ’’తి వత్తబ్బం.

౨౨౬. పరమ్ముఖావికప్పనే-కస్సన్తికేవమీరయే;

‘‘ఇమం చీవరం తుయ్హం వికప్పనత్థాయ దమ్మీ’’తి.

౨౨౭. తేన వత్తబ్బో ‘‘కో తే మిత్తో వా సన్దిట్ఠో వా’’తి. ఇతరేన చేవం వత్తబ్బం ‘‘తిస్సో భిక్ఖూ’’తి వా ‘‘తిస్సా భిక్ఖునీ’’తి వా ‘‘తిస్సో సామణేరో’’తి వా ‘‘తిస్సా సామణేరీ’’తి వా ‘‘తిస్సా సిక్ఖమానా’’తి వా.

పున తేన ‘‘అహం తిస్సస్స తిస్సాయ వా దమ్మీ’’తి వికప్పేత్వా తేనేవ ‘‘తిస్సస్స భిక్ఖునో, తిస్సాయ భిక్ఖునియా, తిస్సస్స సామణేరస్స, తిస్సాయ సామణేరియా, తిస్సాయ సిక్ఖమానాయ సన్తకం పరిభుఞ్జ వా విస్సజ్జేహి వా యథాపచ్చయం వా కరోహీ’’తి పచ్చుద్ధరితబ్బం.

౨౨౮. దూరసన్తికత్తేకత్తబహుభావం విజానియ;

‘‘ఏతం ఇమ’’న్తి ‘‘ఏతాని, ఇమానీ’’తేత్థ యోజయే.

౨౨౯. దసాహం మాసమేకం వా, పఞ్చ వా కథినత్థతే;

పారిపూరత్థమూనస్స, పచ్చాసా సతి మాసకం;

నుప్పాదయతి నిస్సగ్గిం, నాధిట్ఠితవికప్పితన్తి.