౩. చీవరనిద్దేసో

చీవరన్తి –

౩౦. ఖోమకోసేయ్యకప్పాస-సాణభఙ్గాని కమ్బలం;

కప్పియాని ఛళేతాని, సానులోమాని జాతితో.

౩౧. దుకూలఞ్చేవ పట్టుణ్ణ-పటం సోమారచీనజం;

ఇద్ధిజం దేవదిన్నఞ్చ, తస్స తస్సానులోమికం.

౩౨. తిచీవరం పరిక్ఖార-చోళం వస్సికసాటికం;

అధిట్ఠే న వికప్పేయ్య, ముఖపుఞ్ఛననిసీదనం.

౩౩. పచ్చత్థరణకం కణ్డు-చ్ఛాదిమేత్థ తిచీవరం;

న వసేయ్య వినేకాహం, చాతుమాసం నిసీదనం.

౩౪. ‘‘ఇమం సఙ్ఘాటింధిట్ఠామి’’, సఙ్ఘాటిమిచ్చధిట్ఠయే;

అహత్థపాసమేతన్తి, సేసేసుపి అయం నయో.

౩౫. అధిట్ఠహన్తో సఙ్ఘాటి-ప్పభుతిం పుబ్బచీవరం;

పచ్చుద్ధరిత్వాధిట్ఠేయ్య, పత్తాధిట్ఠహనే తథా.

౩౬. ఏతం ఇమం వ సఙ్ఘాటిం, సంసే పచ్చుద్ధరామితి;

ఏవం సబ్బాని నామేన, వత్వా పచ్చుద్ధరే విదూ.

౩౭. సఙ్ఘాటి పచ్ఛిమన్తేన, దీఘసో ముట్ఠిపఞ్చకో;

ఉత్తమన్తేన సుగత-చీవరూనాపి వట్టతి.

౩౮. ముట్ఠిత్తికఞ్చ తిరియం, తథా ఏకంసికస్సపి;

అన్తరవాసకో చాపి, దీఘసో ముట్ఠిపఞ్చకో;

అడ్ఢతేయ్యో ద్విహత్థో వా, తిరియన్తేన వట్టతి.

౩౯. నిసీదనస్స దీఘేన, విదత్థి ద్వే విసాలతో;

దియడ్ఢం దసా విదత్థి, సుగతస్స విదత్థియా.

౪౦. కణ్డుప్పటిచ్ఛాదికస్స, తిరియం ద్వే విదత్థియో;

దీఘన్తతో చతస్సోవ, సుగతస్స విదత్థియా.

౪౧. వస్సికసాటికాయాపి, దీఘసో ఛ విదత్థియో;

తిరియం అడ్ఢతేయ్యావ, సుగతస్స విదత్థియా.

౪౨. ఏత్థ ఛేదనపాచిత్తి, కరోన్తస్స తదుత్తరి;

పచ్చత్థరణ ముఖచోళా, ఆకఙ్ఖితప్పమాణికా.

౪౩. పరిక్ఖారచోళే గణనా, పమాణం వా న దీపితం;

తథా వత్వా అధిట్ఠేయ్య, థవికాదిం వికప్పియం.

౪౪. అహతాహతకప్పానం, సఙ్ఘాటి దిగుణా సియా;

ఏకచ్చియోత్తరాసఙ్గో, తథా అన్తరవాసకో.

౪౫. ఉతుద్ధటాన దుస్సానం, సఙ్ఘాటి చ చతుగ్గుణా;

భవేయ్యుం దిగుణా సేసా, పంసుకూలే యథారుచి.

౪౬. తీసు ద్వే వాపి ఏకం వా, ఛిన్దితబ్బం పహోతి యం;

సబ్బేసు అప్పహోన్తేసు, అన్వాధిమాదియేయ్య వా;

అచ్ఛిన్నఞ్చ అనాదిణ్ణం, న ధారేయ్య తిచీవరం.

౪౭. గామే నివేసనే ఉద్దో-సితపాసాదహమ్మియే;

నావాట్టమాళఆరామే, సత్థఖేత్తఖలే దుమే.

౪౮. అజ్ఝోకాసే విహారే వా, నిక్ఖిపిత్వా తిచీవరం;

భిక్ఖుసమ్ముతియాఞ్ఞత్ర, విప్పవత్థుం న వట్టతి.

౪౯. రోగవస్సానపరియన్తా, కణ్డుచ్ఛాదికసాటికా;

తతో పరం వికప్పేయ్య, సేసా అపరియన్తికా.

౫౦. పచ్చత్థరణ పరిక్ఖార-ముఖపుఞ్ఛనచోళకం;

దసం ప్యరత్తనాదిణ్ణకప్పం లబ్భం నిసీదనం.

౫౧. అదసం రజితంయేవ, సేసచీవరపఞ్చకం;

కప్పతాదిణ్ణకప్పంవ, సదసంవ నిసీదనం.

౫౨. అనధిట్ఠితనిస్సట్ఠం, కప్పేత్వా పరిభుఞ్జయే;

హత్థదీఘం తతోపడ్ఢ-విత్థారఞ్చ వికప్పియం.

౫౩. తిచీవరస్స భిక్ఖుస్స, సబ్బమేతం పకాసితం;

పరిక్ఖారచోళియో సబ్బం, తథా వత్వా అధిట్ఠతి.

౫౪. అచ్ఛేదవిస్సజ్జనగాహవిబ్భమా,

పచ్చుద్ధరో మారణలిఙ్గసిక్ఖా;

సబ్బేస్వధిట్ఠానవియోగకారణా,

వినివిద్ధఛిద్దఞ్చ తిచీవరస్స.

౫౫. కుసవాకఫలకాని, కమ్బలం కేసవాలజం;

థుల్లచ్చయం ధారయతోలూకపక్ఖాజినక్ఖిపే.

౫౬. కదలేరకక్కదుస్సే, పోత్థకే చాపి దుక్కటం;

సబ్బనీలకమఞ్జేట్ఠ-పీతలోహితకణ్హకే.

౫౭. మహారఙ్గమహానామ-రఙ్గరత్తే తిరీటకే;

అచ్ఛిన్నదీఘదసకే, ఫలపుప్ఫదసే తథా;

కఞ్చుకే వేఠనే సబ్బం, లభతిచ్ఛిన్నచీవరోతి.