౧౫. ఉపజ్ఝాచరియవత్తనిద్దేసో

ఉపజ్ఝాచరియవత్తానీతి –

౧౪౫. నిస్సాయుపజ్ఝాచరియే, వసమానో సుపేసలో;

దన్తకట్ఠాసనం తోయం, యాగుం కాలే దదే సదా.

౧౪౬. పత్తే వత్తం చరే గామ-ప్పవేసే గమనాగమే;

ఆసనే పాదపీఠే చ, కథలోపాహనచీవరే.

౧౪౭. పరిభోజనీయపానీయ-వచ్చప్పస్సావఠానిసు;

విహారసోధనే వత్తం, పున పఞ్ఞాపనే తథా.

౧౪౮. న పప్ఫోటేయ్య సోధేన్తో, పటివాతే చ సఙ్గణే;

విహారం భిక్ఖు పానీయ-సామన్తా సయనాసనం.

౧౪౯. న్హానే న్హాతస్స కాతబ్బే, రఙ్గపాకే చ ధోవనే;

సిబ్బనే చీవరే థేవే, రజన్తో న వజే ఠితే.

౧౫౦. ఏకచ్చస్స అనాపుచ్ఛా, పత్తం వా చీవరాని వా;

న దదేయ్య న గణ్హేయ్య, పరిక్ఖారఞ్చ కిఞ్చనం.

౧౫౧. ఏకచ్చం పచ్ఛతో కాతుం, గన్తుం వా తస్స పచ్ఛతో;

పిణ్డపాతఞ్చ నిన్నేతుం, నీహరాపేతుమత్తనో.

౧౫౨. కిచ్చయం పరికమ్మం వా, కేసచ్ఛేదఞ్చ అత్తనో;

కారాపేతుం వ కాతుం వా, అనాపుచ్ఛా న వట్టతి.

౧౫౩. గామం సుసానం నిస్సీమం, దిసం వా గన్తుమిచ్ఛతో;

అత్తనో కిచ్చయం వాపి, అనాపుచ్ఛా న వట్టతి.

౧౫౪. ఉప్పన్నం అరతిం దిట్ఠిం, కుక్కుచ్చం వా వినోదయే;

కరేయ్య వాపి ఉస్సుక్కం, సఙ్ఘాయత్తేసు కమ్మసు.

౧౫౫. గిలానేసు ఉపట్ఠేయ్య, వుట్ఠానం నేసమాగమే;

వత్తభేదేన సబ్బత్థ, అనాదరేన దుక్కటన్తి.