కఙ్ఖావితరణీ-అట్ఠకథా

గన్థారమ్భకథా

బుద్ధం ధమ్మఞ్చ సఙ్ఘఞ్చ, విప్పసన్నేన చేతసా;

వన్దిత్వా వన్దనామాన, పూజాసక్కారభాజనం.

థేరవంసప్పదీపానం, థిరానం వినయక్కమే;

పుబ్బాచరియసీహానం, నమో కత్వా కతఞ్జలీ.

పామోక్ఖం అనవజ్జానం, ధమ్మానం యం మహేసినా;

ముఖం మోక్ఖప్పవేసాయ, పాతిమోక్ఖం పకాసితం.

సూరతేన నివాతేన, సుచిసల్లేఖవుత్తినా;

వినయాచారయుత్తేన, సోణత్థేరేన యాచితో.

తత్థ సఞ్జాతకఙ్ఖానం, భిక్ఖూనం తస్స వణ్ణనం;

కఙ్ఖావితరణత్థాయ, పరిపుణ్ణవినిచ్ఛయం.

మహావిహారవాసీనం, వాచనామగ్గనిస్సితం;

వత్తయిస్సామి నామేన, కఙ్ఖావితరణిం సుభన్తి.