భిక్ఖునీపాతిమోక్ఖపాళి
పుబ్బకరణం-౪
సమ్మజ్జనీ పదీపో చ, ఉదకం ఆసనేన చ;
ఉపోసథస్స ఏతాని, ‘‘పుబ్బకరణ’’న్తి వుచ్చతి.
పుబ్బకిచ్చం-౫
ఛన్ద, పారిసుద్ధి, ఉతుక్ఖానం, భిక్ఖునిగణనా చ ఓవాదో;
ఉపోసథస్స ఏతాని, ‘‘పుబ్బకిచ్చ’’న్తి వుచ్చతి.
పత్తకల్లఅఙ్గా-౪
ఉపోసథో, యావతికా చ భిక్ఖునీ కమ్మప్పత్తా;
సభాగాపత్తియో చ న విజ్జన్తి;
వజ్జనీయా చ పుగ్గలా తస్మిం న హోన్తి, ‘‘పత్తకల్ల’’న్తి వుచ్చతి.
పుబ్బకరణపుబ్బకిచ్చాని సమాపేత్వా దేసితాపత్తికస్స సమగ్గస్స భిక్ఖునిసఙ్ఘస్స అనుమతియా పాతిమోక్ఖం ఉద్దిసితుం ఆరాధనం కరోమ.
నిదానుద్దేసో
సుణాతు మే అయ్యే సఙ్ఘో, అజ్జుపోసథో పన్నరసో, యది సఙ్ఘస్స పత్తకల్లం, సఙ్ఘో ఉపోసథం కరేయ్య, పాతిమోక్ఖం ఉద్దిసేయ్య.
కిం సఙ్ఘస్స పుబ్బకిచ్చం? పారిసుద్ధిం అయ్యాయో ఆరోచేథ, పాతిమోక్ఖం ఉద్దిసిస్సామి, తం సబ్బావ సన్తా సాధుకం సుణోమ మనసి కరోమ. యస్సా సియా ఆపత్తి, సా ఆవికరేయ్య, అసన్తియా ఆపత్తియా తుణ్హీ భవితబ్బం, తుణ్హీభావేన ఖో పనాయ్యాయో, ‘‘పరిసుద్ధా’’తి వేదిస్సామి. యథా ఖో పన పచ్చేకపుట్ఠస్సా వేయ్యాకరణం హోతి, ఏవమేవం ఏవరూపాయ పరిసాయ యావతతియం అనుసావితం హోతి. యా పన భిక్ఖునీ యావతతియం అనుసావియమానే సరమానా సన్తిం ఆపత్తిం నావికరేయ్య, సమ్పజానముసావాదస్సా హోతి. సమ్పజానముసావాదో ఖో పనాయ్యాయో, అన్తరాయికో ధమ్మో వుత్తో భగవతా, తస్మా సరమానాయ భిక్ఖునియా ఆపన్నాయ విసుద్ధాపేక్ఖాయ సన్తీ ఆపత్తి ఆవికాతబ్బా, ఆవికతా హిస్సా ఫాసు హోతి.
ఉద్దిట్ఠం ఖో, అయ్యాయో, నిదానం. తత్థాయ్యాయో పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.
నిదానం నిట్ఠితం.
పారాజికుద్దేసో
తత్రిమే అట్ఠ పారాజికా ధమ్మా ఉద్దేసం ఆగచ్ఛన్తి.
మేథునధమ్మసిక్ఖాపదం
౧. యా పన భిక్ఖునీ ఛన్దసో మేథునం ధమ్మం పటిసేవేయ్య, అన్తమసో తిరచ్ఛానగతేనపి, పారాజికా హోతి అసంవాసా.
అదిన్నాదానసిక్ఖాపదం
౨. యా పన భిక్ఖునీ గామా వా అరఞ్ఞా వా అదిన్నం థేయ్యసఙ్ఖాతం ఆదియేయ్య, యథారూపే అదిన్నాదానే రాజానో చోరం గహేత్వా హనేయ్యుం వా బన్ధేయ్యుం వా పబ్బాజేయ్యుం వా చోరాసి బాలాసి మూళ్హాసి థేనాసీతి, తథారూపం భిక్ఖునీ అదిన్నం ఆదియమానా అయమ్పి పారాజికా హోతి అసంవాసా.
మనుస్సవిగ్గహసిక్ఖాపదం
౩. యా పన భిక్ఖునీ సఞ్చిచ్చ మనుస్సవిగ్గహం జీవితా వోరోపేయ్య, సత్థహారకం వాస్స పరియేసేయ్య, మరణవణ్ణం వా సంవణ్ణేయ్య, మరణాయ వా సమాదపేయ్య ‘‘అమ్భో పురిస, కిం తుయ్హిమినా పాపకేన దుజ్జీవితేన, మతం తే జీవితా సేయ్యో’’తి, ఇతి చిత్తమనా చిత్తసఙ్కప్పా అనేకపరియాయేన మరణవణ్ణం వా సంవణ్ణేయ్య, మరణాయ వా సమాదపేయ్య, అయమ్పి పారాజికా హోతి అసంవాసా.
ఉత్తరిమనుస్సధమ్మసిక్ఖాపదం
౪. యా పన భిక్ఖునీ అనభిజానం ఉత్తరిమనుస్సధమ్మం అత్తుపనాయికం అలమరియఞాణదస్సనం సముదాచరేయ్య ‘‘ఇతి జానామి, ఇతి పస్సామీ’’తి, తతో అపరేన సమయేన సమనుగ్గాహీయమానా వా అసమనుగ్గాహీయమానా వా ఆపన్నా విసుద్ధాపేక్ఖా ఏవం వదేయ్య ‘‘అజానమేవం, అయ్యే, అవచం జానామి, అపస్సం పస్సామి, తుచ్ఛం ముసా విలపి’’న్తి, అఞ్ఞత్ర అధిమానా, అయమ్పి పారాజికా హోతి అసంవాసా.
ఉబ్భజాణుమణ్డలికాసిక్ఖాపదం
౫. యా పన భిక్ఖునీ అవస్సుతా అవస్సుతస్స పురిసపుగ్గలస్స, అధక్ఖకం ఉబ్భజాణుమణ్డలం ఆమసనం వా పరామసనం వా గహణం వా ఛుపనం వా పటిపీళనం వా సాదియేయ్య, అయమ్పి పారాజికా హోతి అసంవాసా ఉబ్భజాణుమణ్డలికా.
వజ్జప్పటిచ్ఛాదికాసిక్ఖాపదం
౬. యా పన భిక్ఖునీ జానం పారాజికం ధమ్మం అజ్ఝాపన్నం భిక్ఖునిం నేవత్తనా పటిచోదేయ్య, న గణస్స ఆరోచేయ్య, యదా చ సా ఠితా వా అస్స చుతా వా నాసితా వా అవస్సటా వా, సా పచ్ఛా ఏవం వదేయ్య ‘‘పుబ్బేవాహం, అయ్యే, అఞ్ఞాసిం ఏతం భిక్ఖునిం ‘ఏవరూపా చ ఏవరూపా చ సా భగినీ’తి, నో చ ఖో అత్తనా పటిచోదేస్సం, న గణస్స ఆరోచేస్స’’న్తి, అయమ్పి పారాజికా హోతి అసంవాసా వజ్జప్పటిచ్ఛాదికా.
ఉక్ఖిత్తానువత్తికాసిక్ఖాపదం
౭. యా పన భిక్ఖునీ సమగ్గేన సఙ్ఘేన ఉక్ఖిత్తం భిక్ఖుం ధమ్మేన వినయేన సత్థుసాసనేన అనాదరం అప్పటికారం అకతసహాయం తమనువత్తేయ్య, సా భిక్ఖునీ భిక్ఖునీహి ఏవమస్స వచనీయా ‘‘ఏసో ఖో, అయ్యే, భిక్ఖు సమగ్గేన సఙ్ఘేన ఉక్ఖిత్తో, ధమ్మేన వినయేన సత్థుసాసనేన అనాదరో అప్పటికారో అకతసహాయో, మాయ్యే, ఏతం భిక్ఖుం అనువత్తీ’’తి, ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియం చే సమనుభాసియమానా తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, అయమ్పి పారాజికా హోతి అసంవాసా ఉక్ఖిత్తానువత్తికా.
అట్ఠవత్థుకాసిక్ఖాపదం
౮. యా పన భిక్ఖునీ అవస్సుతా అవస్సుతస్స పురిసపుగ్గలస్స హత్థగ్గహణం వా సాదియేయ్య, సఙ్ఘాటికణ్ణగ్గహణం వా సాదియేయ్య, సన్తిట్ఠేయ్య వా, సల్లపేయ్య వా, సఙ్కేతం వా గచ్ఛేయ్య, పురిసస్స వా అబ్భాగమనం సాదియేయ్య, ఛన్నం వా అనుపవిసేయ్య, కాయం వా తదత్థాయ ఉపసంహరేయ్య ఏతస్స అసద్ధమ్మస్స పటిసేవనత్థాయ, అయమ్పి పారాజికా హోతి అసంవాసా అట్ఠవత్థుకా.
ఉద్దిట్ఠా ఖో, అయ్యాయో, అట్ఠ పారాజికా ధమ్మా. యేసం భిక్ఖునీ అఞ్ఞతరం వా అఞ్ఞతరం వా ఆపజ్జిత్వా న లభతి భిక్ఖునీహి సద్ధిం సంవాసం యథా పురే, తథా పచ్ఛా, పారాజికా హోతి అసంవాసా. తత్థాయ్యాయో, పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.
పారాజికం నిట్ఠితం.
సఙ్ఘాదిసేసుద్దేసో
ఇమే ఖో పనాయ్యాయో సత్తరస సఙ్ఘాదిసేసా
ధమ్మా ఉద్దేసం ఆగచ్ఛన్తి.
ఉస్సయవాదికాసిక్ఖాపదం
౧. యా పన భిక్ఖునీ ఉస్సయవాదికా విహరేయ్య గహపతినా వా గహపతిపుత్తేన వా దాసేన వా కమ్మకారేన వా అన్తమసో సమణపరిబ్బాజకేనాపి, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
చోరీవుట్ఠాపికాసిక్ఖాపదం
౨. యా పన భిక్ఖునీ జానం చోరిం వజ్ఝం విదితం అనపలోకేత్వా రాజానం వా సఙ్ఘం వా గణం వా పూగం వా సేణిం వా, అఞ్ఞత్ర కప్పా వుట్ఠాపేయ్య, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
ఏకగామన్తరగమనసిక్ఖాపదం
౩. యా పన భిక్ఖునీ ఏకా వా గామన్తరం గచ్ఛేయ్య, ఏకా వా నదీపారం గచ్ఛేయ్య, ఏకా వా రత్తిం విప్పవసేయ్య, ఏకా వా గణమ్హా ఓహియేయ్య, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
ఉక్ఖిత్తకఓసారణసిక్ఖాపదం
౪. యా పన భిక్ఖునీ సమగ్గేన సఙ్ఘేన ఉక్ఖిత్తం భిక్ఖునిం ధమ్మేన వినయేన సత్థుసాసనేన అనపలోకేత్వా కారకసఙ్ఘం, అనఞ్ఞాయ గణస్స ఛన్దం ఓసారేయ్య, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
భోజనపటిగ్గహణపఠమసిక్ఖాపదం
౫. యా పన భిక్ఖునీ అవస్సుతా అవస్సుతస్స పురిసపుగ్గలస్స హత్థతో ఖాదనీయం వా, భోజనీయం వా సహత్థా పటిగ్గహేత్వా ఖాదేయ్య వా భుఞ్జేయ్య వా, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
భోజనపటిగ్గహణదుతియసిక్ఖాపదం
౬. యా పన భిక్ఖునీ ఏవం వదేయ్య ‘‘కిం తే, అయ్యే, ఏసో పురిసపుగ్గలో కరిస్సతి అవస్సుతో వా అనవస్సుతో వా, యతో త్వం అనవస్సుతా, ఇఙ్ఘ, అయ్యే, యం తే ఏసో పురిసపుగ్గలో దేతి ఖాదనీయం వా భోజనీయం వా, తం త్వం సహత్థా పటిగ్గహేత్వా ఖాద వా భుఞ్జ వా’’తి, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
సఞ్చరిత్తసిక్ఖాపదం
౭. యా పన భిక్ఖునీ సఞ్చరిత్తం సమాపజ్జేయ్య ఇత్థియా వా పురిసమతిం, పురిసస్స వా ఇత్థిమతిం, జాయత్తనే వా జారత్తనే వా అన్తమసో తఙ్ఖణికాయపి, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
దుట్ఠదోససిక్ఖాపదం
౮. యా పన భిక్ఖునీ భిక్ఖునిం దుట్ఠా దోసా అప్పతీతా అమూలకేన పారాజికేన ధమ్మేన అనుద్ధంసేయ్య ‘‘అప్పేవ నామ నం ఇమమ్హా బ్రహ్మచరియా చావేయ్య’’న్తి, తతో అపరేన సమయేన సమనుగ్గాహీయమానా వా అస మనుగ్గాహీయమానా వా అమూలకఞ్చేవ తం అధికరణం హోతి, భిక్ఖునీ చ దోసం పతిట్ఠాతి, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
అఞ్ఞభాగియసిక్ఖాపదం
౯. యా పన భిక్ఖునీ భిక్ఖునిం దుట్ఠా దోసా అప్పతీతా అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేయ్య ‘‘అప్పేవ నామ నం ఇమమ్హా బ్రహ్మచరియా చావేయ్య’’న్తి, తతో అపరేన సమయేన సమనుగ్గాహీయమానా వా అసమనుగ్గాహీయమానా వా అఞ్ఞభాగియఞ్చేవ తం అధికరణం హోతి. కోచిదేసో లేసమత్తో ఉపాదిన్నో, భిక్ఖునీ చ దోసం పతిట్ఠాతి, అయమ్పి భిక్ఖునీ పఠమాపత్తికం ధమ్మం ఆపన్నా నిస్సారణీయం సఙ్ఘాదిసేసం.
సిక్ఖంపచ్చాచిక్ఖణసిక్ఖాపదం
౧౦. యా పన భిక్ఖునీ కుపితా అనత్తమనా ఏవం వదేయ్య ‘‘బుద్ధం పచ్చాచిక్ఖామి ధమ్మం పచ్చాచిక్ఖామి, సఙ్ఘం పచ్చాచిక్ఖామి, సిక్ఖం పచ్చాచిక్ఖామి, కిన్నుమావ సమణియో యా సమణియో సక్యధీతరో, సన్తఞ్ఞాపి సమణియో లజ్జినియో కుక్కుచ్చికా సిక్ఖాకామా, తాసాహం సన్తికే బ్రహ్మచరియం చరిస్సామీ’’తి. సా భిక్ఖునీ భిక్ఖునీహి ఏవమస్స వచనీయా ‘‘మాయ్యే కుపితా అనత్తమనా ఏవం అవచ ‘బుద్ధం పచ్చాచిక్ఖామి, ధమ్మం పచ్చాచిక్ఖామి, సఙ్ఘం పచ్చాచిక్ఖామి, సిక్ఖం పచ్చాచిక్ఖామి, కిన్నుమావ సమణియో యా సమణియో సక్యధీతరో, సన్తఞ్ఞాపి సమణియో లజ్జినియో కుక్కుచ్చికా సిక్ఖాకామా, తాసాహం సన్తికే బ్రహ్మచరియం చరిస్సామీ’తి, అభిరమాయ్యే, స్వాక్ఖాతో ధమ్మో, చర బ్రహ్మచరియం సమ్మా దుక్ఖస్స అన్తకిరియాయా’’తి, ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
అధికరణకుపితసిక్ఖాపదం
౧౧. యా పన భిక్ఖునీ కిస్మిఞ్చిదేవ అధికరణే పచ్చాకతా కుపితా అనత్తమనా ఏవం వదేయ్య ‘‘ఛన్దగామినియో చ భిక్ఖునియో, దోసగామినియో చ భిక్ఖునియో, మోహగామినియో చ భిక్ఖునియో, భయగామినియో చ భిక్ఖునియో’’తి, సా భిక్ఖునీ భిక్ఖునీహి ఏవమస్స వచనీయా ‘‘మాయ్యే, కిస్మిఞ్చిదేవ అధికరణే పచ్చాకతా కుపితా అనత్తమనా ఏవం అవచ ‘ఛన్దగామినియో చ భిక్ఖునియో, దోసగామినియో చ భిక్ఖునియో, మోహగామినియో చ భిక్ఖునియో, భయగామినియో చ భిక్ఖునియో’తి, అయ్యా ఖో ఛన్దాపి గచ్ఛేయ్య, దోసాపి గచ్ఛేయ్య, మోహాపి గచ్ఛేయ్య, భయాపి గచ్ఛేయ్యా’’తి. ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
పాపసమాచారపఠమసిక్ఖాపదం
౧౨. భిక్ఖునియో పనేవ సంసట్ఠా విహరన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, తా భిక్ఖునియో భిక్ఖునీహి ఏవమస్సు వచనీయా ‘‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, వివిచ్చథాయ్యే, వివేకఞ్ఞేవ భగినీనం సఙ్ఘో వణ్ణేతీ’’తి, ఏవఞ్చ తా భిక్ఖునియో భిక్ఖునీహి వుచ్చమానా తథేవ పగ్గణ్హేయ్యుం, తా భిక్ఖునియో భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్యుం, ఇచ్చేతం కుసలం, నో చే పటినిస్సజ్జేయ్యుం, ఇమాపి భిక్ఖునియో యావతతియకం ధమ్మం ఆపన్నా నిస్సారణీయం సఙ్ఘాదిసేసం.
పాపసమాచారదుతియసిక్ఖాపదం
౧౩. యా పన భిక్ఖునీ ఏవం వదేయ్య ‘‘సంసట్ఠావ, అయ్యే, తుమ్హే విహరథ, మా తుమ్హే నానా విహరిత్థ, సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, తా సఙ్ఘో న కిఞ్చి ఆహ తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – ‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, వివిచ్చథాయ్యే, వివేకఞ్ఞేవ భగినీనం సఙ్ఘో వణ్ణేతీ’’’తి, సా భిక్ఖునీ భిక్ఖునీహి ఏవమస్స వచనీయా ‘‘మాయ్యే, ఏవం అవచ, సంసట్ఠావ అయ్యే తుమ్హే విహరథ, మా తుమ్హే నానా విహరిత్థ, సన్తి సఙ్ఘే అఞ్ఞాపి భిక్ఖునియో ఏవాచారా ఏవంసద్దా ఏవంసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, తా సఙ్ఘో న కిఞ్చి ఆహ, తుమ్హఞ్ఞేవ సఙ్ఘో ఉఞ్ఞాయ పరిభవేన అక్ఖన్తియా వేభస్సియా దుబ్బల్యా ఏవమాహ – ‘భగినియో ఖో సంసట్ఠా విహరన్తి పాపాచారా పాపసద్దా పాపసిలోకా భిక్ఖునిసఙ్ఘస్స విహేసికా అఞ్ఞమఞ్ఞిస్సా వజ్జప్పటిచ్ఛాదికా, వివిచ్చథాయ్యే, వివేకఞ్ఞేవ భగినీనం సఙ్ఘో వణ్ణేతీ’’’తి, ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
సఙ్ఘభేదకసిక్ఖాపదం
౧౪. యా పన భిక్ఖునీ సమగ్గస్స సఙ్ఘస్స భేదాయ పరక్కమేయ్య, భేదనసంవత్తనికం వా అధికరణం సమాదాయ పగ్గయ్హ తిట్ఠేయ్య, సా భిక్ఖునీ భిక్ఖునీహి ఏవమస్స వచనీయా ‘‘మాయ్యా, సమగ్గస్స సఙ్ఘస్స భేదాయ పరక్కమి, భేదనసంవత్తనికం వా అధికరణం సమాదాయ పగ్గయ్హ అట్ఠాసి, సమేతాయ్యా, సఙ్ఘేన, సమగ్గో హి సఙ్ఘో సమ్మోదమానో అవివదమానో ఏకుద్దేసో ఫాసు విహరతీ’’తి. ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం. నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
భేదానువత్తకసిక్ఖాపదం
౧౫. తస్సాయేవ ఖో పన భిక్ఖునియా భిక్ఖునియో హోన్తి అనువత్తికా వగ్గవాదికా ఏకా వా ద్వే వా తిస్సో వా, తా ఏవం వదేయ్యుం ‘‘మాయ్యాయో, ఏతం భిక్ఖునిం కిఞ్చి అవచుత్థ ధమ్మవాదినీ చేసా భిక్ఖునీ, వినయవాదినీ చేసా భిక్ఖునీ, అమ్హాకఞ్చేసా భిక్ఖునీ ఛన్దఞ్చ రుచిఞ్చ ఆదాయ వోహరతి, జానాతి, నో భాసతి, అమ్హాకమ్పేతం ఖమతీ’’తి, తా భిక్ఖునియో భిక్ఖునీహి ఏవమస్సు వచనీయా ‘‘మాయ్యాయో, ఏవం అవచుత్థ, న చేసా భిక్ఖునీ ధమ్మవాదినీ, న చేసా భిక్ఖునీ వినయవాదినీ, మాయ్యానమ్పి సఙ్ఘభేదో రుచ్చిత్థ, సమేతాయ్యానం సఙ్ఘేన, సమగ్గో హి సఙ్ఘో సమ్మోదమానో అవివదమానో ఏకుద్దేసో ఫాసు విహరతీ’’తి, ఏవఞ్చ తా భిక్ఖునియో భిక్ఖునీహి వుచ్చమానా తథేవ పగ్గణ్హేయ్యుం, తా భిక్ఖునియో భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్యుం. ఇచ్చేతం కుసలం. నో చే పటినిస్సజ్జేయ్యుం, ఇమాపి భిక్ఖునియో యావతతియకం ధమ్మం ఆపన్నా నిస్సారణీయం సఙ్ఘాదిసేసం.
దుబ్బచసిక్ఖాపదం
౧౬. భిక్ఖునీ పనేవ దుబ్బచజాతికా హోతి ఉద్దేసపరియాపన్నేసు సిక్ఖాపదేసు భిక్ఖునీహి సహధమ్మికం వుచ్చమానా అత్తానం అవచనీయం కరోతి ‘‘మా మం అయ్యాయో కిఞ్చి అవచుత్థ కల్యాణం వా పాపకం వా, అహమ్పాయ్యాయో, న కిఞ్చి వక్ఖామి కల్యాణం వా పాపకం వా, విరమథాయ్యాయో, మమ వచనాయా’’తి, సా భిక్ఖునీ భిక్ఖునీహి ఏవమస్స వచనీయా ‘‘మాయ్యా, అత్తానం అవచనీయం అకాసి, వచనీయమేవ, అయ్యా, అత్తానం కరోతు, అయ్యాపి భిక్ఖునియో వదతు సహధమ్మేన, భిక్ఖునియోపి అయ్యం వక్ఖన్తి సహధమ్మేన, ఏవం సంవద్ధా హి తస్స భగవతో పరిసా యదిదం అఞ్ఞమఞ్ఞవచనేన అఞ్ఞమఞ్ఞవుట్ఠాపనేనా’’తి. ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం. నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
కులదూసకసిక్ఖాపదం
౧౭. భిక్ఖునీ పనేవ అఞ్ఞతరం గామం వా నిగమం వా ఉపనిస్సాయ విహరతి కులదూసికా పాపసమాచారా, తస్సా ఖో పాపకా సమాచారా దిస్సన్తి చేవ సుయ్యన్తి చ, కులాని చ తాయ దుట్ఠాని దిస్సన్తి చేవ సుయ్యన్తి చ, సా భిక్ఖునీ భిక్ఖునీహి ఏవమస్స వచనీయా ‘‘అయ్యా, ఖో కులదూసికా పాపసమాచారా, అయ్యాయ ఖో పాపకా సమాచారా దిస్సన్తి చేవ సుయ్యన్తి చ, కులాని చాయ్యాయ, దుట్ఠాని దిస్సన్తి చేవ సుయ్యన్తి చ, పక్కమతాయ్యా ఇమమ్హా ఆవాసా, అలం తే ఇధ వాసేనా’’తి. ఏవఞ్చ సా భిక్ఖునీ భిక్ఖునీహి వుచ్చమానా తా భిక్ఖునియో ఏవం వదేయ్య ‘‘ఛన్దగామినియో చ భిక్ఖునియో, దోసగామినియో చ భిక్ఖునియో, మోహగామినియో చ భిక్ఖునియో, భయగామినియో చ భిక్ఖునియో, తాదిసికాయ ఆపత్తియా ఏకచ్చం పబ్బాజేన్తి ఏకచ్చం న పబ్బాజేన్తీ’’తి, సా భిక్ఖునీ భిక్ఖునీహి ఏవమస్స వచనీయా ‘‘మాయ్యా, ఏవం అవచ, న చ భిక్ఖునియో ఛన్దగామినియో, న చ భిక్ఖునియో దోసగామినియో, న చ భిక్ఖునియో మోహగామినియో, న చ భిక్ఖునియో భయగామినియో, అయ్యా ఖో కులదూసికా పాపసమాచారా, అయ్యాయ ఖో పాపకా సమాచారా దిస్సన్తి చేవ సుయ్యన్తి చ, కులాని చాయ్యాయ దుట్ఠాని దిస్సన్తి చేవ సుయ్యన్తి చ, పక్కమతాయ్యా, ఇమమ్హా ఆవాసా అలం తే ఇధ వాసేనా’’తి. ఏవఞ్చ సా భిక్ఖునీ భిక్ఖునీహి వుచ్చమానా తథేవ పగ్గణ్హేయ్య, సా భిక్ఖునీ భిక్ఖునీహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్య, ఇచ్చేతం కుసలం. నో చే పటినిస్సజ్జేయ్య, అయమ్పి భిక్ఖునీ యావతతియకం ధమ్మం ఆపన్నా నిస్సారణీయం సఙ్ఘాదిసేసం.
ఉద్దిట్ఠా ఖో అయ్యాయో సత్తరస సఙ్ఘాదిసేసా ధమ్మా నవ పఠమాపత్తికా, అట్ఠ యావతతియకా,
యేసం భిక్ఖునీ అఞ్ఞతరం వా అఞ్ఞతరం వా ఆపజ్జతి, తాయ భిక్ఖునియా ఉభతోసఙ్ఘే పక్ఖమానత్తం చరితబ్బం. చిణ్ణమానత్తా భిక్ఖునీ యత్థ సియా వీసతిగణో భిక్ఖునిసఙ్ఘో, తత్థ సా భిక్ఖునీ అబ్భేతబ్బా. ఏకాయపి చే ఊనో వీసతిగణో భిక్ఖునిసఙ్ఘో తం భిక్ఖునిం అబ్భేయ్య, సా చ భిక్ఖునీ అనబ్భితా, తా చ భిక్ఖునియో గారయ్హా, అయం తత్థ సామీచి. తత్థాయ్యాయో పుచ్ఛామి, కచ్చిత్థ పరిసుద్ధా, దుతియమ్పి, పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.
సఙ్ఘాదిసేసో నిట్ఠితో.
నిస్సగ్గియ పాచిత్తియా
ఇమే ఖో పనాయ్యాయో తింస నిస్సగ్గియా పాచిత్తియా
ధమ్మా ఉద్దేసం ఆగచ్ఛన్తి.
పత్తసన్నిచయసిక్ఖాపదం
౧. యా పన భిక్ఖునీ పత్తసన్నిచయం కరేయ్య, నిస్సగ్గియం పాచిత్తియం.
అకాలచీవరభాజనసిక్ఖాపదం
౨. యా పన భిక్ఖునీ అకాలచీవరం ‘‘కాలచీవర’’న్తి అధిట్ఠహిత్వా భాజాపేయ్య, నిస్సగ్గియం పాచిత్తియం.
చీవరపరివత్తనసిక్ఖాపదం
౩. యా పన భిక్ఖునీ భిక్ఖునియా సద్ధిం చీవరం పరివత్తేత్వా సా పచ్ఛా ఏవం వదేయ్య ‘‘హన్దాయ్యే, తుయ్హం చీవరం, ఆహర మేతం చీవరం, యం తుయ్హం తుయ్హమేవేతం, యం మయ్హం మయ్హమేవేతం, ఆహర మేతం చీవరం, సకం పచ్చాహరా’’తి అచ్ఛిన్దేయ్య వా అచ్ఛిన్దాపేయ్య వా, నిస్సగ్గియం పాచిత్తియం.
అఞ్ఞవిఞ్ఞాపనసిక్ఖాపదం
౪. యా పన భిక్ఖునీ అఞ్ఞం విఞ్ఞాపేత్వా అఞ్ఞం విఞ్ఞాపేయ్య, నిస్సగ్గియం పాచిత్తియం.
అఞ్ఞచేతాపన సిక్ఖాపదం
౫. యా పన భిక్ఖునీ అఞ్ఞం చేతాపేత్వా అఞ్ఞం చేతాపేయ్య, నిస్సగ్గియం పాచిత్తియం.
పఠమసఙ్ఘికచేతాపనసిక్ఖాపదం
౬. యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన అఞ్ఞం చేతాపేయ్య, నిస్సగ్గియం పాచిత్తియం.
దుతియసఙ్ఘికచేతాపనసిక్ఖాపదం
౭. యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన సఙ్ఘికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియం.
పఠమగణికచేతాపనసిక్ఖాపదం
౮. యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన అఞ్ఞం చేతాపేయ్య, నిస్సగ్గియం పాచిత్తియం.
దుతియగణికచేతాపనసిక్ఖాపదం
౯. యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన మహాజనికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియం.
పుగ్గలికచేతాపనసిక్ఖాపదం
౧౦. యా పన భిక్ఖునీ అఞ్ఞదత్థికేన పరిక్ఖారేన అఞ్ఞుద్దిసికేన పుగ్గలికేన సఞ్ఞాచికేన అఞ్ఞం చేతాపేయ్య, నిస్సగ్గియం పాచిత్తియం.
పత్తవగ్గో పఠమో.
గరుపావురణసిక్ఖాపదం
౧౧. గరుపావురణం పన భిక్ఖునియా చేతాపేన్తియా చతుక్కంసపరమం చేతాపేతబ్బం. తతో చే ఉత్తరి చేతాపేయ్య, నిస్సగ్గియం పాచిత్తియం.
లహుపావురణసిక్ఖాపదం
౧౨. లహుపావురణం పన భిక్ఖునియా చేతాపేన్తియా అడ్ఢతేయ్యకంసపరమం చేతాపేతబ్బం. తతో చే ఉత్తరి చేతాపేయ్య, నిస్సగ్గియం పాచిత్తియం.
కథినసిక్ఖాపదం
౧౩. నిట్ఠితచీవరస్మిం భిక్ఖునియా ఉబ్భతస్మిం కథినే దసాహపరమం అతిరేకచీవరం ధారేతబ్బం. తం అతిక్కామేన్తియా, నిస్సగ్గియం పాచిత్తియం.
ఉదోసితసిక్ఖాపదం
౧౪. నిట్ఠితచీవరస్మిం భిక్ఖునియా ఉబ్భతస్మిం కథినే ఏకరత్తమ్పి చే భిక్ఖునీ తిచీవరేన విప్పవసేయ్య, అఞ్ఞత్ర భిక్ఖునిసమ్ముతియా నిస్సగ్గియం పాచిత్తియం.
అకాలచీవరసిక్ఖాపదం
౧౫. నిట్ఠితచీవరస్మిం భిక్ఖునియా ఉబ్భతస్మిం కథినే భిక్ఖునియా పనేవ అకాలచీవరం ఉప్పజ్జేయ్య, ఆకఙ్ఖమానాయ భిక్ఖునియా పటిగ్గహేతబ్బం, పటిగ్గహేత్వా ఖిప్పమేవ కారేతబ్బం, నో చస్స పారిపూరి, మాసపరమం తాయ భిక్ఖునియా తం చీవరం నిక్ఖిపితబ్బం ఊనస్స పారిపూరియా సతియా పచ్చాసాయ. తతో చే ఉత్తరి నిక్ఖిపేయ్య సతియాపి పచ్చాసాయ, నిస్సగ్గియం పాచిత్తియం.
అఞ్ఞాతకవిఞ్ఞత్తిసిక్ఖాపదం
౧౬. యా పన భిక్ఖునీ అఞ్ఞాతకం గహపతిం వా గహపతానిం వా చీవరం విఞ్ఞాపేయ్య అఞ్ఞత్ర సమయా, నిస్సగ్గియం పాచిత్తియం. తత్థాయం సమయో అచ్ఛిన్నచీవరా వా హోతి భిక్ఖునీ, నట్ఠచీవరా వా, అయం తత్థ సమయో.
తతుత్తరిసిక్ఖాపదం
౧౭. తఞ్చే అఞ్ఞాతకో గహపతి వా గహపతానీ వా బహూహి చీవరేహి అభిహట్ఠుం పవారేయ్య, సన్తరుత్తరపరమం తాయ భిక్ఖునియా తతో చీవరం సాదితబ్బం. తతో చే ఉత్తరి సాదియేయ్య, నిస్సగ్గియం పాచిత్తియం.
పఠమఉపక్ఖటసిక్ఖాపదం
౧౮. భిక్ఖునిం పనేవ ఉద్దిస్స అఞ్ఞాతకస్స గహపతిస్స వా గహపతానియా వా చీవరచేతాపన్నం ఉపక్ఖటం హోతి ‘‘ఇమినా చీవరచేతాపన్నేన చీవరం చేతాపేత్వా ఇత్థన్నామం భిక్ఖునిం చీవరేన అచ్ఛాదేస్సామీ’’తి. తత్ర చేసా భిక్ఖునీ పుబ్బే అప్పవారితా ఉపసఙ్కమిత్వా చీవరే వికప్పం ఆపజ్జేయ్య ‘‘సాధు వత, మం ఆయస్మా ఇమినా చీవరచేతాపన్నేన ఏవరూపం వా ఏవరూపం వా చీవరం చేతాపేత్వా అచ్ఛాదేహీ’’తి కల్యాణకమ్యతం ఉపాదాయ, నిస్సగ్గియం పాచిత్తియం.
దుతియఉపక్ఖటసిక్ఖాపదం
౧౯. భిక్ఖునిం పనేవ ఉద్దిస్స ఉభిన్నం అఞ్ఞాతకానం గహపతీనం వా గహపతానీనం వా పచ్చేకచీవరచేతాపన్నాని ఉపక్ఖటాని హోన్తి ‘‘ఇమేహి మయం పచ్చేకచీవరచేతాపన్నేహి పచ్చేకచీవరాని చేతాపేత్వా ఇత్థన్నామం భిక్ఖునిం చీవరేహి అచ్ఛాదేస్సామా’’తి. తత్ర చేసా భిక్ఖూనీ పుబ్బే అప్పవారితా ఉపసఙ్కమిత్వా చీవరే వికప్పం ఆపజ్జేయ్య ‘‘సాధు వత మం ఆయస్మన్తో ఇమేహి పచ్చేకచీవరచేతాపన్నేహి ఏవరూపం వా ఏవరూపం వా చీవరం చేతాపేత్వా అచ్ఛాదేథ ఉభోవ సన్తా ఏకేనా’’తి కల్యాణకమ్యతం ఉపాదాయ, నిస్సగ్గియం పాచిత్తియం.
రాజసిక్ఖాపదం
౨౦. భిక్ఖునిం పనేవ ఉద్దిస్స రాజా వా రాజభోగ్గో వా బ్రాహ్మణో వా గహపతికో వా దూతేన చీవరచేతాపన్నం పహిణేయ్య ‘‘ఇమినా చీవరచేతాపన్నేన చీవరం చేతాపేత్వా ఇత్థన్నామం భిక్ఖునిం చీవరేన అచ్ఛాదేహీ’’తి. సో చే దూతో తం భిక్ఖునిం ఉపసఙ్కమిత్వా ఏవం వదేయ్య ‘‘ఇదం ఖో, అయ్యే, అయ్యం ఉద్దిస్స చీవరచేతాపన్నం ఆభతం, పటిగ్గణ్హాతాయ్యా చీవరచేతాపన్న’’న్తి. తాయ భిక్ఖునియా సో దూతో ఏవమస్స వచనీయో ‘‘న ఖో మయం, ఆవుసో, చీవరచేతాపన్నం పటిగ్గణ్హామ, చీవరఞ్చ ఖో మయం పటిగ్గణ్హామ కాలేన కప్పియ’’న్తి. సో చే దూతో తం భిక్ఖునిం ఏవం వదేయ్య ‘‘అత్థి పనాయ్యాయ, కోచి వేయ్యావచ్చకరో’’తి, చీవరత్థికాయ, భిక్ఖవే, భిక్ఖునియా వేయ్యావచ్చకరో నిద్దిసితబ్బో ఆరామికో వా ఉపాసకో వా ‘‘ఏసో ఖో, ఆవుసో, భిక్ఖునీనం వేయ్యావచ్చకరో’’తి. సో చే దూతో తం వేయ్యావచ్చకరం సఞ్ఞాపేత్వా తం భిక్ఖునిం ఉపసఙ్కమిత్వా ఏవం వదేయ్య ‘‘యం ఖో, అయ్యే, అయ్యా వేయ్యావచ్చకరం నిద్దిసి, సఞ్ఞత్తో సో మయా, ఉపసఙ్కమతాయ్యా కాలేన, చీవరేన తం అచ్ఛాదేస్సతీ’’తి. చీవరత్థికాయ, భిక్ఖవే, భిక్ఖునియా వేయ్యావచ్చకరో ఉపసఙ్కమిత్వా ద్వత్తిక్ఖత్తుం చోదేతబ్బో సారేతబ్బో ‘‘అత్థో మే, ఆవుసో, చీవరేనా’’తి, ద్వత్తిక్ఖత్తుం చోదయమానా సారయమానా తం చీవరం అభినిప్ఫాదేయ్య, ఇచ్చేతం కుసలం, నో చే అభినిప్ఫాదేయ్య, చతుక్ఖత్తుం పఞ్చక్ఖత్తుం ఛక్ఖత్తుపరమం తుణ్హీభూతాయ ఉద్దిస్స ఠాతబ్బం, చతుక్ఖత్తుం పఞ్చక్ఖత్తుం ఛక్ఖత్తుపరమం తుణ్హీభూతా ఉద్దిస్స తిట్ఠమానా తం చీవరం అభినిప్ఫాదేయ్య, ఇచ్చేతం కుసలం. తతో చే ఉత్తరి వాయమమానా తం చీవరం అభినిప్ఫాదేయ్య, నిస్సగ్గియం పాచిత్తియం. నో చే అభినిప్ఫాదేయ్య, యతస్సా చీవరచేతాపన్నం ఆభతం, తత్థ సామం వా గన్తబ్బం, దూతో వా పాహేతబ్బో ‘‘యం ఖో తుమ్హే ఆయస్మన్తో భిక్ఖునిం ఉద్దిస్స చీవరచేతాపన్నం పహిణిత్థ, న తం తస్సా భిక్ఖునియా కిఞ్చి అత్థం అనుభోతి, యుఞ్జన్తాయస్మన్తో సకం, మా వో సకం వినస్సా’’తి, అయం తత్థ సామీచి.
చీవరవగ్గో దుతియో.
రూపియసిక్ఖాపదం
౨౧. యా పన భిక్ఖునీ జాతరూపరజతం ఉగ్గణ్హేయ్య వా ఉగ్గణ్హాపేయ్య వా ఉపనిక్ఖిత్తం వా సాదియేయ్య, నిస్సగ్గియం పాచిత్తియం.
రూపియసంవోహారసిక్ఖాపదం
౨౨. యా పన భిక్ఖునీ నానప్పకారకం రూపియసంవోహారం సమాపజ్జేయ్య, నిస్సగ్గియం పాచిత్తియం.
కయవిక్కయసిక్ఖాపదం
౨౩. యా పన భిక్ఖునీ నానప్పకారకం కయవిక్కయం సమాపజ్జేయ్య, నిస్సగ్గియం పాచిత్తియం.
ఊనపఞ్చబన్ధనసిక్ఖాపదం
౨౪. యా పన భిక్ఖునీ ఊనపఞ్చబన్ధనేన పత్తేన అఞ్ఞం నవం పత్తం చేతాపేయ్య, నిస్సగ్గియం పాచిత్తియం. తాయ భిక్ఖునియా సో పత్తో భిక్ఖునిపరిసాయ నిస్సజ్జితబ్బో, యో చ తస్సా భిక్ఖునిపరిసాయ పత్తపరియన్తో, సో తస్సా భిక్ఖునియా పదాతబ్బో ‘‘అయం తే భిక్ఖుని పత్తో యావభేదనాయ ధారేతబ్బో’’తి, అయం తత్థ సామీచి.
భేసజ్జసిక్ఖాపదం
౨౫. యాని ఖో పన తాని గిలానానం భిక్ఖునీనం పటిసాయనీయాని భేసజ్జాని, సేయ్యథిదం – సప్పి నవనీతం తేలం మధు ఫాణితం, తాని పటిగ్గహేత్వా సత్తాహపరమం సన్నిధికారకం పరిభుఞ్జితబ్బాని. తం అతిక్కామేన్తియా, నిస్సగ్గియం పాచిత్తియం.
చీవరఅచ్ఛిన్దనసిక్ఖాపదం
౨౬. యా పన భిక్ఖునీ భిక్ఖునియా సామం చీవరం దత్వా కుపితా అనత్తమనా అచ్ఛిన్దేయ్య వా అచ్ఛిన్దాపేయ్య వా, నిస్సగ్గియం పాచిత్తియం.
సుత్తవిఞ్ఞత్తిసిక్ఖాపదం
౨౭. యా పన భిక్ఖునీ సామం సుత్తం విఞ్ఞాపేత్వా తన్తవాయేహి చీవరం వాయాపేయ్య, నిస్సగ్గియం పాచిత్తియం.
మహాపేసకారసిక్ఖాపదం
౨౮. భిక్ఖునిం పనేవ ఉద్దిస్స అఞ్ఞాతకో గహపతి వా గహపతానీ వా తన్తవాయేహి చీవరం వాయాపేయ్య, తత్ర చేసా భిక్ఖునీ పుబ్బే అప్పవారితా తన్తవాయే ఉపసఙ్కమిత్వా చీవరే వికప్పం ఆపజ్జేయ్య ‘‘ఇదం ఖో ఆవుసో చీవరం మం ఉద్దిస్స వియ్యతి, ఆయతఞ్చ కరోథ, విత్థతఞ్చ అప్పితఞ్చ సువీతఞ్చ సుప్పవాయితఞ్చ సువిలేఖితఞ్చ సువితచ్ఛితఞ్చ కరోథ, అప్పేవ నామ మయమ్పి ఆయస్మన్తానం కిఞ్చిమత్తం అనుపదజ్జేయ్యామా’’తి, ఏవఞ్చ సా భిక్ఖునీ వత్వా కిఞ్చిమత్తం అనుపదజ్జేయ్య అన్తమసో పిణ్డపాతమత్తమ్పి, నిస్సగ్గియం పాచిత్తియం.
అచ్చేకచీవరసిక్ఖాపదం
౨౯. దసాహానాగతం కత్తికతేమాసికపుణ్ణమం భిక్ఖునియా పనేవ అచ్చేకచీవరం ఉప్పజ్జేయ్య, అచ్చేకం మఞ్ఞమానాయ భిక్ఖునియా పటిగ్గహేతబ్బం, పటిగ్గహేత్వా యావ చీవరకాలసమయం నిక్ఖిపితబ్బం. తతో చే ఉత్తరి నిక్ఖిపేయ్య, నిస్సగ్గియం పాచిత్తియం.
పరిణతసిక్ఖాపదం
౩౦. యా పన భిక్ఖునీ జానం సఙ్ఘికం లాభం పరిణతం అత్తనో పరిణామేయ్య, నిస్సగ్గియం పాచిత్తియం.
పత్తవగ్గో తతియో.
ఉద్దిట్ఠా ఖో, అయ్యాయో, తింస నిస్సగ్గియా పాచిత్తియా ధమ్మా. తత్థాయ్యాయో, పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయ్యాయో, తస్మా తుణ్హీ, ఏవమేతం ధారయామీతి.
నిస్సగ్గియపాచిత్తియా నిట్ఠితా.
సుద్ధపాచిత్తియా
ఇమే ఖో పనాయ్యాయో, ఛసట్ఠిసతా పాచిత్తియా
ధమ్మా ఉద్దేసం ఆగచ్ఛన్తి.
లసుణసిక్ఖాపదం
౧. యా పన భిక్ఖునీ లసుణం ఖాదేయ్య పాచిత్తియం.