౧. సప్పివిఞ్ఞాపనసిక్ఖాపదవణ్ణనా

పాటిదేసనీయేసు పఠమే సప్పిన్తి పుబ్బే వుత్తవినిచ్ఛయం పాళిఆగతం (పాచి. ౧౨౩౦) గోసప్పిఆదిమేవ. విఞ్ఞాపేత్వా భుఞ్జేయ్యాతి ఏత్థ ‘‘విఞ్ఞత్తియా పటిలద్ధం భుఞ్జిస్సామీ’’తి గహణే దుక్కటం, గహితస్స అజ్ఝోహారే అజ్ఝోహారే పాటిదేసనీయం.

సావత్థియం ఛబ్బగ్గియా భిక్ఖునియో ఆరబ్భ సప్పిం విఞ్ఞాపేత్వా భుఞ్జనవత్థుస్మిం పఞ్ఞత్తం, ‘‘అగిలానా’’తి అయమేత్థ అనుపఞ్ఞత్తి, తికపాటిదేసనీయం, గిలానాయ ద్వికదుక్కటం. యా పన గిలానా గిలానసఞ్ఞా, గిలానకాలే వా విఞ్ఞాపేత్వా పచ్ఛా అగిలానా హుత్వా భుఞ్జతి, గిలానాయ వా సేసకం, ఞాతకప్పవారితట్ఠానతో వా విఞ్ఞత్తం, అఞ్ఞస్స వా అత్థాయ, అత్తనో వా ధనేన గహితం భుఞ్జతి, తస్సా, ఉమ్మత్తికాదీనఞ్చ అనాపత్తి. వుత్తలక్ఖణసప్పితా, అనుఞ్ఞాతకారణాభావో, విఞ్ఞత్తి, అజ్ఝోహారోతి ఇమానేత్థ చత్తారి అఙ్గాని. సముట్ఠానాదీని అద్ధానసదిసానీతి.

సప్పివిఞ్ఞాపనసిక్ఖాపదవణ్ణనా నిట్ఠితా.