౨. అకాలచీవరసిక్ఖాపదవణ్ణనా

దుతియే అకాలచీవరన్తి అత్థతే కథినే కథినమాసేహి, అనత్థతే చీవరమాసతో అఞ్ఞస్మిం కాలే ఉప్పన్నం, యం వా పన కాలేపి ఆదిస్స దిన్నం. ఆదిస్స దిన్నం నామ ‘‘సమ్పత్తా భాజేన్తూ’’తి వత్వా వా, ‘‘ఇదం గణస్స, ఇదం తుమ్హాకం దమ్మీ’’తి వత్వా వా, దాతుకామతాయ పాదమూలే ఠపేత్వా వా దిన్నం. ఇచ్చేతం అకాలచీవరం ‘‘కాలచీవర’’న్తి అధిట్ఠహిత్వా భాజాపేన్తియా పయోగే దుక్కటం, యం అత్తనా లద్ధం, తం నిస్సగ్గియం హోతి. నిస్సట్ఠం పటిలభిత్వాపి యథాదానేయేవ ఉపనేతబ్బం, అఞ్ఞస్మిమ్పి ఏవరూపే సిక్ఖాపదే ఏసేవ నయో.

సావత్థియం థుల్లనన్దం ఆరబ్భ అకాలచీవరం ‘‘కాలచీవర’’న్తి అధిట్ఠహిత్వా భాజనవత్థుస్మిం పఞ్ఞత్తం, అకాలచీవరే వేమతికాయ, కాలచీవరే అకాలచీవరసఞ్ఞాయ చేవ వేమతికాయ చ దుక్కటం. ఉభోసు కాలచీవరసఞ్ఞాయ, ఉమ్మత్తికాదీనఞ్చ అనాపత్తి. అకాలచీవరతా, తథాసఞ్ఞితా, ‘‘కాలచీవర’’న్తి అధిట్ఠాయ లేసేన భాజాపనం, పటిలాభోతి ఇమానేత్థ చత్తారి అఙ్గాని. సముట్ఠానాదీని అదిన్నాదానసదిసానీతి.

అకాలచీవరసిక్ఖాపదవణ్ణనా నిట్ఠితా.