౧౨. పాపసమాచారపఠమసిక్ఖాపదవణ్ణనా

ద్వాదసమే సంసట్ఠాతి పబ్బజితానం అననులోమేన గిహీనం కోట్టనపచనసాసనహరణాదినా కాయికవాచసికేన మిస్సీభూతా. పాపో కాయికవాచసికో ఆచారో ఏతాసన్తి పాపాచారా. పాపో కిత్తిసద్దో ఏతాసన్తి పాపసద్దా. పాపో ఆజీవసఙ్ఖాతో సిలోకో ఏతాసన్తి పాపసిలోకా. భిక్ఖునిసఙ్ఘస్స విహేసికాతి అఞ్ఞమఞ్ఞిస్సా కమ్మే కరియమానే పటిక్కోసనేన విహేసికా. వజ్జప్పటిచ్ఛాదికాతి ఖుద్దానుఖుద్దకస్స వజ్జస్స పటిచ్ఛాదికా.

సావత్థియం సమ్బహులా భిక్ఖునియో ఆరబ్భ సంసట్ఠవిహారవత్థుస్మిం పఞ్ఞత్తం, సేసమేత్థాపి దసమే వుత్తనయేనేవ వేదితబ్బం, సమనుభాసనకమ్మకాలే పన ద్వేతిస్సో ఏకతో సమనుభాసితబ్బాతి.

పాపసమాచారపఠమసిక్ఖాపదవణ్ణనా నిట్ఠితా.