భిక్ఖుపాతిమోక్ఖపాళి
పుబ్బకరణం-౪
సమ్మజ్జనీ పదీపో చ, ఉదకం ఆసనేన చ;
ఉపోసథస్స ఏతాని, ‘‘పుబ్బకరణ’’న్తి వుచ్చతి.
పుబ్బకిచ్చం-౫
ఛన్ద, పారిసుద్ధి, ఉతుక్ఖానం, భిక్ఖుగణనా చ ఓవాదో;
ఉపోసథస్స ఏతాని, ‘‘పుబ్బకిచ్చ’’న్తి వుచ్చతి.
పత్తకల్లఅఙ్గా-౪
ఉపోసథో, యావతికా చ భిక్ఖూ కమ్మప్పత్తా;
సభాగాపత్తియో చ న విజ్జన్తి;
వజ్జనీయా చ పుగ్గలా తస్మిం న హోన్తి, ‘‘పత్తకల్ల’’న్తి వుచ్చతి.
పుబ్బకరణపుబ్బకిచ్చాని సమాపేత్వా దేసితాపత్తికస్స సమగ్గస్స భిక్ఖుసఙ్ఘస్స అనుమతియా పాతిమోక్ఖం ఉద్దిసితుం ఆరాధనం కరోమ.
నిదానుద్దేసో
సుణాతు మే భన్తే సఙ్ఘో? అజ్జుపోసథో పన్నరసో, యది సఙ్ఘస్స పత్తకల్లం, సఙ్ఘో ఉపోసథం కరేయ్య, పాతిమోక్ఖం ఉద్దిసేయ్య.
కిం సఙ్ఘస్స పుబ్బకిచ్చం? పారిసుద్ధిం ఆయస్మన్తో ఆరోచేథ, పాతిమోక్ఖం ఉద్దిసిస్సామి, తం సబ్బేవ సన్తా సాధుకం సుణోమ మనసి కరోమ. యస్స సియా ఆపత్తి, సో ఆవికరేయ్య, అసన్తియా ఆపత్తియా తుణ్హీ భవితబ్బం, తుణ్హీభావేన ఖో పనాయస్మన్తే ‘‘పరిసుద్ధా’’తి వేదిస్సామి. యథా ఖో పన పచ్చేకపుట్ఠస్స వేయ్యాకరణం హోతి, ఏవమేవం ఏవరూపాయ పరిసాయ యావతతియం అనుసావితం హోతి. యో పన భిక్ఖు యావతతియం అనుసావియమానే సరమానో సన్తిం ఆపత్తిం నావికరేయ్య, సమ్పజానముసావాదస్స హోతి. సమ్పజానముసావాదో ఖో పనాయస్మన్తో అన్తరాయికో ధమ్మో వుత్తో భగవతా, తస్మా సరమానేన భిక్ఖునా ఆపన్నేన విసుద్ధాపేక్ఖేన సన్తీ ఆపత్తి ఆవికాతబ్బా, ఆవికతా హిస్స ఫాసు హోతి.
ఉద్దిట్ఠం ఖో ఆయస్మన్తో నిదానం. తత్థాయస్మన్తే పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయస్మన్తో, తస్మా తుణ్హీ, ఏవమేతం ధారయామీతి.
నిదానం నిట్ఠితం.
పారాజికుద్దేసో
తత్రిమే చత్తారో పారాజికా ధమ్మా ఉద్దేసం ఆగచ్ఛన్తి.
మేథునధమ్మ సిక్ఖాపదం
౧. యో పన భిక్ఖు భిక్ఖూనం సిక్ఖాసాజీవసమాపన్నో సిక్ఖం అప్పచ్చక్ఖాయ దుబ్బల్యం అనావికత్వా మేథునం ధమ్మం పటిసేవేయ్య, అన్తమసో తిరచ్ఛానగతాయపి, పారాజికో హోతి అసంవాసో.
అదిన్నాదానసిక్ఖాపదం
౨. యో పన భిక్ఖు గామా వా అరఞ్ఞా వా అదిన్నం థేయ్యసఙ్ఖాతం ఆదియేయ్య, యథారూపే అదిన్నాదానే రాజానో చోరం గహేత్వా హనేయ్యుం వా బన్ధేయ్యుం వా పబ్బాజేయ్యుం వా చోరోసి బాలోసి మూళ్హోసి థేనోసీతి, తథారూపం భిక్ఖు అదిన్నం ఆదియమానో అయమ్పి పారాజికో హోతి అసంవాసో.
మనుస్సవిగ్గహసిక్ఖాపదం
౩. యో పన భిక్ఖు సఞ్చిచ్చ మనుస్సవిగ్గహం జీవితా వోరోపేయ్య, సత్థహారకం వాస్స పరియేసేయ్య, మరణవణ్ణం వా సంవణ్ణేయ్య, మరణాయ వా సమాదపేయ్య ‘‘అమ్భో పురిస కిం తుయ్హిమినా పాపకేన దుజ్జీవితేన, మతం తే జీవితా సేయ్యో’’తి, ఇతి చిత్తమనో చిత్తసఙ్కప్పో అనేకపరియాయేన మరణవణ్ణం వా సంవణ్ణేయ్య, మరణాయ వా సమాదపేయ్య, అయమ్పి పారాజికో హోతి అసంవాసో.
ఉత్తరిమనుస్సధమ్మసిక్ఖాపదం
౪. యో పన భిక్ఖు అనభిజానం ఉత్తరిమనుస్సధమ్మం అత్తుపనాయికం అలమరియఞాణదస్సనం సముదాచరేయ్య ‘‘ఇతి జానామి, ఇతి పస్సామీ’’తి, తతో అపరేన సమయేన సమనుగ్గాహీయమానో వా అసమనుగ్గాహీయమానో వా ఆపన్నో విసుద్ధాపేక్ఖో ఏవం వదేయ్య ‘‘అజానమేవం ఆవుసో అవచం జానామి, అపస్సం పస్సామి, తుచ్ఛం ముసా విలపి’’న్తి, అఞ్ఞత్ర అధిమానా, అయమ్పి పారాజికో హోతి అసంవాసో.
ఉద్దిట్ఠా ఖో ఆయస్మన్తో చత్తారో పారాజికా ధమ్మా. యేసం భిక్ఖు అఞ్ఞతరం వా అఞ్ఞతరం వా ఆపజ్జిత్వా న లభతి భిక్ఖూహి సద్ధిం సంవాసం యథా పురే, తథా పచ్ఛా, పారాజికో హోతి అసంవాసో. తత్థాయస్మన్తే పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయస్మన్తో, తస్మా తుణ్హీ, ఏవమేతం ధారయామీతి.
పారాజికం నిట్ఠితం.
సఙ్ఘాదిసేసుద్దేసో
ఇమే ఖో పనాయస్మన్తో తేరస సఙ్ఘాదిసేసా
ధమ్మా ఉద్దేసం ఆగచ్ఛన్తి.
సుక్కవిస్సట్ఠిసిక్ఖాపదం
౧. సఞ్చేతనికా సుక్కవిస్సట్ఠి అఞ్ఞత్ర సుపినన్తా సఙ్ఘాదిసేసో.
కాయసంసగ్గసిక్ఖాపదం
౨. యో పన భిక్ఖు ఓతిణ్ణో విపరిణతేన చిత్తేన మాతుగామేన సద్ధిం కాయసంసగ్గం సమాపజ్జేయ్య హత్థగ్గాహం వా వేణిగ్గాహం వా అఞ్ఞతరస్స వా అఞ్ఞతరస్స వా అఙ్గస్స పరామసనం, సఙ్ఘాదిసేసో.
దుట్ఠుల్లవాచాసిక్ఖాపదం
౩. యో పన భిక్ఖు ఓతిణ్ణో విపరిణతేన చిత్తేన మాతుగామం దుట్ఠుల్లాహి వాచాహి ఓభాసేయ్య యథా తం యువా యువతిం మేథునుపసంహితాహి, సఙ్ఘాదిసేసో.
అత్తకామపారిచరియసిక్ఖాపదం
౪. యో పన భిక్ఖు ఓతిణ్ణో విపరిణతేన చిత్తేన మాతుగామస్స సన్తికే అత్తకామపారిచరియాయ వణ్ణం భాసేయ్య ‘‘ఏతదగ్గం భగిని పారిచరియానం యా మాదిసం సీలవన్తం కల్యాణధమ్మం బ్రహ్మచారిం ఏతేన ధమ్మేన పరిచరేయ్యా’’తి మేథునుపసంహితేన, సఙ్ఘాదిసేసో.
సఞ్చరిత్తసిక్ఖాపదం
౫. యో పన భిక్ఖు సఞ్చరిత్తం సమాపజ్జేయ్య ఇత్థియా వా పురిసమతిం పురిసస్స వా ఇత్థిమతిం, జాయత్తనే వా జారత్తనే వా, అన్తమసో తఙ్ఖణికాయపి, సఙ్ఘాదిసేసో.
కుటికారసిక్ఖాపదం
౬. సఞ్ఞాచికాయ పన భిక్ఖునా కుటిం కారయమానేన అస్సామికం అత్తుద్దేసం పమాణికా కారేతబ్బా, తత్రిదం పమాణం, దీఘసో ద్వాదస విదత్థియో సుగతవిదత్థియా, తిరియం సత్తన్తరా, భిక్ఖూ అభినేతబ్బా వత్థుదేసనాయ, తేహి భిక్ఖూహి వత్థు దేసేతబ్బం అనారమ్భం సపరిక్కమనం. సారమ్భే చే భిక్ఖు వత్థుస్మిం అపరిక్కమనే సఞ్ఞాచికాయ కుటిం కారేయ్య, భిక్ఖూ వా అనభినేయ్య వత్థుదేసనాయ, పమాణం వా అతిక్కామేయ్య, సఙ్ఘాదిసేసో.
విహారకారసిక్ఖాపదం
౭. మహల్లకం పన భిక్ఖునా విహారం కారయమానేన సస్సామికం అత్తుద్దేసం భిక్ఖూ అభినేతబ్బా వత్థుదేసనాయ, తేహి భిక్ఖూహి వత్థు దేసేతబ్బం అనారమ్భం సపరిక్కమనం. సారమ్భే చే భిక్ఖు వత్థుస్మిం అపరిక్కమనే మహల్లకం విహారం కారేయ్య, భిక్ఖూ వా అనభినేయ్య వత్థుదేసనాయ, సఙ్ఘాదిసేసో.
దుట్ఠదోససిక్ఖాపదం
౮. యో పన భిక్ఖు భిక్ఖుం దుట్ఠో దోసో అప్పతీతో అమూలకేన పారాజికేన ధమ్మేన అనుద్ధంసేయ్య ‘‘అప్పేవ నామ నం ఇమమ్హా బ్రహ్మచరియా చావేయ్య’’న్తి, తతో అపరేన సమయేన సమనుగ్గాహీయమానో వా అసమనుగ్గాహీయమానో వా అమూలకఞ్చేవ తం అధికరణం హోతి, భిక్ఖు చ దోసం పతిట్ఠాతి, సఙ్ఘాదిసేసో.
అఞ్ఞభాగియసిక్ఖాపదం
౯. యో పన భిక్ఖు భిక్ఖుం దుట్ఠో దోసో అప్పతీతో అఞ్ఞభాగియస్స అధికరణస్స కిఞ్చిదేసం లేసమత్తం ఉపాదాయ పారాజికేన ధమ్మేన అనుద్ధంసేయ్య ‘‘అప్పేవ నామ నం ఇమమ్హా బ్రహ్మచరియా చావేయ్య’’న్తి, తతో అపరేన సమయేన సమనుగ్గాహీయమానో వా అసమనుగ్గాహీయమానో వా అఞ్ఞభాగియఞ్చేవ తం అధికరణం హోతి కోచిదేసో లేసమత్తో ఉపాదిన్నో, భిక్ఖు చ దోసం పతిట్ఠాతి, సఙ్ఘాదిసేసో.
సఙ్ఘభేదసిక్ఖాపదం
౧౦. యో పన భిక్ఖు సమగ్గస్స సఙ్ఘస్స భేదాయ పరక్కమేయ్య, భేదనసంవత్తనికం వా అధికరణం సమాదాయ పగ్గయ్హ తిట్ఠేయ్య, సో భిక్ఖు భిక్ఖూహి ఏవమస్స వచనీయో ‘‘మాయస్మా సమగ్గస్స సఙ్ఘస్స భేదాయ పరక్కమి, భేదనసంవత్తనికం వా అధికరణం సమాదాయ పగ్గయ్హ అట్ఠాసి, సమేతాయస్మా సఙ్ఘేన, సమగ్గో హి సఙ్ఘో సమ్మోదమానో అవివదమానో ఏకుద్దేసో ఫాసు విహరతీ’’తి, ఏవఞ్చ సో భిక్ఖు భిక్ఖూహి వుచ్చమానో తథేవ పగ్గణ్హేయ్య, సో భిక్ఖు భిక్ఖూహి యావతతియం సమనుభాసితబ్బో తస్స పటినిస్సగ్గాయ, యావతతియఞ్చే సమనుభాసియమానో తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, సఙ్ఘాదిసేసో.
భేదానువత్తకసిక్ఖాపదం
౧౧. తస్సేవ ఖో పన భిక్ఖుస్స భిక్ఖూ హోన్తి అనువత్తకా వగ్గవాదకా ఏకో వా ద్వే వా తయో వా, తే ఏవం వదేయ్యుం ‘‘మాయస్మన్తో ఏతం భిక్ఖుం కిఞ్చి అవచుత్థ, ధమ్మవాదీ చేసో భిక్ఖు, వినయవాదీ చేసో భిక్ఖు, అమ్హాకఞ్చేసో భిక్ఖు ఛన్దఞ్చ రుచిఞ్చ ఆదాయ వోహరతి, జానాతి, నో భాసతి, అమ్హాకమ్పేతం ఖమతీ’’తి, తే భిక్ఖూ భిక్ఖూహి ఏవమస్సు వచనీయా ‘‘మాయస్మన్తో ఏవం అవచుత్థ, న చేసో భిక్ఖు ధమ్మవాదీ, న చేసో భిక్ఖు వినయవాదీ, మాయస్మన్తానమ్పి సఙ్ఘభేదో రుచ్చిత్థ, సమేతాయస్మన్తానం సఙ్ఘేన, సమగ్గో హి సఙ్ఘో సమ్మోదమానో అవివదమానో ఏకుద్దేసో ఫాసు విహరతీ’’తి, ఏవఞ్చ తే భిక్ఖూ భిక్ఖూహి వుచ్చమానా తథేవ పగ్గణ్హేయ్యుం, తే భిక్ఖూ భిక్ఖూహి యావతతియం సమనుభాసితబ్బా తస్స పటినిస్సగ్గాయ, యావతతియఞ్చే సమనుభాసియమానా తం పటినిస్సజ్జేయ్యుం, ఇచ్చేతం కుసలం, నో చే పటినిస్సజ్జేయ్యుం, సఙ్ఘాదిసేసో.
దుబ్బచసిక్ఖాపదం
౧౨. భిక్ఖు పనేవ దుబ్బచజాతికో హోతి ఉద్దేసపరియాపన్నేసు సిక్ఖాపదేసు భిక్ఖూహి సహధమ్మికం వుచ్చమానో అత్తానం అవచనీయం కరోతి ‘‘మా మం ఆయస్మన్తో కిఞ్చి అవచుత్థ కల్యాణం వా పాపకం వా, అహమ్పాయస్మన్తే న కిఞ్చి వక్ఖామి కల్యాణం వా పాపకం వా, విరమథాయస్మన్తో మమ వచనాయా’’తి, సో భిక్ఖు భిక్ఖూహి ఏవమస్స వచనీయో ‘‘మాయస్మా అత్తానం అవచనీయం అకాసి, వచనీయమేవాయస్మా అత్తానం కరోతు, ఆయస్మాపి భిక్ఖూ వదతు సహధమ్మేన, భిక్ఖూపి ఆయస్మన్తం వక్ఖన్తి సహధమ్మేన, ఏవం సంవద్ధా హి తస్స భగవతో పరిసా యదిదం అఞ్ఞమఞ్ఞవచనేన అఞ్ఞమఞ్ఞవుట్ఠాపనేనా’’తి, ఏవఞ్చ సో భిక్ఖు భిక్ఖూహి వుచ్చమానో తథేవ పగ్గణ్హేయ్య, సో భిక్ఖు భిక్ఖూహి యావతతియం సమనుభాసితబ్బో తస్స పటినిస్సగ్గాయ, యావతతియఞ్చే సమనుభాసియమానో తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, సఙ్ఘాదిసేసో.
కులదూసకసిక్ఖాపదం
౧౩. భిక్ఖు పనేవ అఞ్ఞతరం గామం వా నిగమం వా ఉపనిస్సాయ విహరతి కులదూసకో పాపసమాచారో, తస్స ఖో పాపకా సమాచారా దిస్సన్తి చేవ సుయ్యన్తి చ, కులాని చ తేన దుట్ఠాని దిస్సన్తి చేవ సుయ్యన్తి చ, సో భిక్ఖు భిక్ఖూహి ఏవమస్స వచనీయో ‘‘ఆయస్మా ఖో కులదూసకో పాపసమాచారో, ఆయస్మతో ఖో పాపకా సమాచారా దిస్సన్తి చేవ సుయ్యన్తి చ, కులాని చాయస్మతా దుట్ఠాని దిస్సన్తి చేవ సుయ్యన్తి చ, పక్కమతాయస్మా ఇమమ్హా ఆవాసా, అలం తే ఇధ వాసేనా’’తి, ఏవఞ్చ సో భిక్ఖు భిక్ఖూహి వుచ్చమానో తే భిక్ఖూ ఏవం వదేయ్య ‘‘ఛన్దగామినో చ భిక్ఖూ, దోసగామినో చ భిక్ఖూ, మోహగామినో చ భిక్ఖూ, భయగామినో చ భిక్ఖూ తాదిసికాయ ఆపత్తియా ఏకచ్చం పబ్బాజేన్తి, ఏకచ్చం న పబ్బాజేన్తీ’’తి, సో భిక్ఖు భిక్ఖూహి ఏవమస్స వచనీయో ‘‘మాయస్మా ఏవం అవచ, న చ భిక్ఖూ ఛన్దగామినో, న చ భిక్ఖూ దోసగామినో, న చ భిక్ఖూ మోహగామినో, న చ భిక్ఖూ భయగామినో, ఆయస్మా ఖో కులదూసకో పాపసమాచారో, ఆయస్మతో ఖో పాపకా సమాచారా దిస్సన్తి చేవ సుయ్యన్తి చ, కులాని చాయస్మతా దుట్ఠాని దిస్సన్తి చేవ సుయ్యన్తి చ, పక్కమతాయస్మా ఇమమ్హా ఆవాసా, అలం తే ఇధ వాసేనా’’తి, ఏవఞ్చ సో భిక్ఖు భిక్ఖూహి వుచ్చమానో తథేవ పగ్గణ్హేయ్య, సో భిక్ఖు భిక్ఖూహి యావతతియం సమనుభాసితబ్బో తస్స పటినిస్సగ్గాయ, యావతతియఞ్చే సమనుభాసియమానో తం పటినిస్సజ్జేయ్య, ఇచ్చేతం కుసలం, నో చే పటినిస్సజ్జేయ్య, సఙ్ఘాదిసేసో.
ఉద్దిట్ఠా ఖో ఆయస్మన్తో తేరస సఙ్ఘాదిసేసా ధమ్మా నవ పఠమాపత్తికా, చత్తారో యావతతియకా. యేసం భిక్ఖు అఞ్ఞతరం వా అఞ్ఞతరం వా ఆపజ్జిత్వా యావతీహం జానం పటిచ్ఛాదేతి, తావతీహం తేన భిక్ఖునా అకామా పరివత్థబ్బం. పరివుత్థపరివాసేన భిక్ఖునా ఉత్తరి ఛారత్తం భిక్ఖుమానత్తాయ పటిపజ్జితబ్బం, చిణ్ణమానత్తో భిక్ఖు యత్థ సియా వీసతిగణో భిక్ఖుసఙ్ఘో, తత్థ సో భిక్ఖు అబ్భేతబ్బో. ఏకేనపి చే ఊనో వీసతిగణో భిక్ఖుసఙ్ఘో తం భిక్ఖుం అబ్భేయ్య, సో చ భిక్ఖు అనబ్భితో, తే చ భిక్ఖూ గారయ్హా, అయం తత్థ సామీచి. తత్థాయస్మన్తే పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయస్మన్తో, తస్మా తుణ్హీ, ఏవమేతం ధారయామీతి.
సఙ్ఘాదిసేసో నిట్ఠితో.
అనియతుద్దేసో
ఇమే ఖో పనాయస్మన్తో ద్వే అనియతా ధమ్మా
ఉద్దేసం ఆగచ్ఛన్తి.
పఠమఅనియతసిక్ఖాపదం
౧. యో పన భిక్ఖు మాతుగామేన సద్ధిం ఏకో ఏకాయ రహో పటిచ్ఛన్నే ఆసనే అలంకమ్మనియే నిసజ్జం కప్పేయ్య, తమేనం సద్ధేయ్యవచసా ఉపాసికా దిస్వా తిణ్ణం ధమ్మానం అఞ్ఞతరేన వదేయ్య పారాజికేన వా సఙ్ఘాదిసేసేన వా పాచిత్తియేన వా, నిసజ్జం భిక్ఖు పటిజానమానో తిణ్ణం ధమ్మానం అఞ్ఞతరేన కారేతబ్బో పారాజికేన వా సఙ్ఘాదిసేసేన వా పాచిత్తియేన వా, యేన వా సా సద్ధేయ్యవచసా ఉపాసికా వదేయ్య, తేన సో భిక్ఖు కారేతబ్బో, అయం ధమ్మో అనియతో.
దుతియఅనియతసిక్ఖాపదం
౨. న హేవ ఖో పన పటిచ్ఛన్నం ఆసనం హోతి నాలంకమ్మనియం, అలఞ్చ ఖో హోతి మాతుగామం దుట్ఠుల్లాహి వాచాహి ఓభాసితుం, యో పన భిక్ఖు తథారూపే ఆసనే మాతుగామేన సద్ధిం ఏకో ఏకాయ రహో నిసజ్జం కప్పేయ్య, తమేనం సద్ధేయ్యవచసా ఉపాసికా దిస్వా ద్విన్నం ధమ్మానం అఞ్ఞతరేన వదేయ్య సఙ్ఘాదిసేసేన వా పాచిత్తియేన వా, నిసజ్జం భిక్ఖు పటిజానమానో ద్విన్నం ధమ్మానం అఞ్ఞతరేన కారేతబ్బో సఙ్ఘాదిసేసేన వా పాచిత్తియేన వా, యేన వా సా సద్ధేయ్యవచసా ఉపాసికా వదేయ్య, తేన సో భిక్ఖు కారేతబ్బో, అయమ్పి ధమ్మో అనియతో.
ఉద్దిట్ఠా ఖో ఆయస్మన్తో ద్వే అనియతా ధమ్మా. తత్థాయస్మన్తే పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయస్మన్తో, తస్మా తుణ్హీ, ఏవమేతం ధారయామీతి.
అనియతో నిట్ఠితో.
నిస్సగ్గియపాచిత్తియా
ఇమే ఖో పనాయస్మన్తో తింస నిస్సగ్గియా పాచిత్తియా
ధమ్మా ఉద్దేసం ఆగచ్ఛన్తి.
కథినసిక్ఖాపదం
౧. నిట్ఠితచీవరస్మిం భిక్ఖునా ఉబ్భతస్మిం కథినే దసాహపరమం అతిరేకచీవరం ధారేతబ్బం, తం అతిక్కామయతో నిస్సగ్గియం పాచిత్తియం.
ఉదోసితసిక్ఖాపదం
౨. నిట్ఠితచీవరస్మిం భిక్ఖునా ఉబ్భతస్మిం కథినే ఏకరత్తమ్పి చే భిక్ఖు తిచీవరేన విప్పవసేయ్య, అఞ్ఞత్ర భిక్ఖుసమ్ముతియా నిస్సగ్గియం పాచిత్తియం.
అకాలచీవరసిక్ఖాపదం
౩. నిట్ఠితచీవరస్మిం భిక్ఖునా ఉబ్భతస్మిం కథినే భిక్ఖునో పనేవ అకాలచీవరం ఉప్పజ్జేయ్య, ఆకఙ్ఖమానేన భిక్ఖునా పటిగ్గహేతబ్బం, పటిగ్గహేత్వా ఖిప్పమేవ కారేతబ్బం, నో చస్స పారిపూరి, మాసపరమం తేన భిక్ఖునా తం చీవరం నిక్ఖిపితబ్బం ఊనస్స పారిపూరియా సతియా పచ్చాసాయ. తతో చే ఉత్తరి నిక్ఖిపేయ్య సతియాపి పచ్చాసాయ, నిస్సగ్గియం పాచిత్తియం.
పురాణచీవరసిక్ఖాపదం
౪. యో పన భిక్ఖు అఞ్ఞాతికాయ భిక్ఖునియా పురాణచీవరం ధోవాపేయ్య వా రజాపేయ్య వా ఆకోటాపేయ్య వా, నిస్సగ్గియం పాచిత్తియం.
చీవరపటిగ్గహణసిక్ఖాపదం
౫. యో పన భిక్ఖు అఞ్ఞాతికాయ భిక్ఖునియా హత్థతో చీవరం పటిగ్గణ్హేయ్య అఞ్ఞత్ర పారివత్తకా, నిస్సగ్గియం పాచిత్తియం.
అఞ్ఞాతకవిఞ్ఞత్తిసిక్ఖాపదం
౬. యో పన భిక్ఖు అఞ్ఞాతకం గహపతిం వా గహపతానిం వా చీవరం విఞ్ఞాపేయ్య అఞ్ఞత్ర సమయా, నిస్సగ్గియం పాచిత్తియం. తత్థాయం సమయో, అచ్ఛిన్నచీవరో వా హోతి భిక్ఖు, నట్ఠచీవరో వా, అయం తత్థ సమయో.
తతుత్తరిసిక్ఖాపదం
౭. తఞ్చే అఞ్ఞాతకో గహపతి వా గహపతానీ వా బహూహి చీవరేహి అభిహట్ఠుం పవారేయ్య, సన్తరుత్తరపరమం తేన భిక్ఖునా తతో చీవరం సాదితబ్బం. తతో చే ఉత్తరి సాదియేయ్య, నిస్సగ్గియం పాచిత్తియం.
పఠమఉపక్ఖటసిక్ఖాపదం
౮. భిక్ఖుం పనేవ ఉద్దిస్స అఞ్ఞాతకస్స గహపతిస్స వా గహపతానియా వా చీవరచేతాపన్నం ఉపక్ఖటం హోతి ‘‘ఇమినా చీవరచేతాపన్నేన చీవరం చేతాపేత్వా ఇత్థన్నామం భిక్ఖుం చీవరేన అచ్ఛాదేస్సామీ’’తి, తత్ర చే సో భిక్ఖు పుబ్బే అప్పవారితో ఉపసఙ్కమిత్వా చీవరే వికప్పం ఆపజ్జేయ్య ‘‘సాధు వత మం ఆయస్మా ఇమినా చీవరచేతాపన్నేన ఏవరూపం వా ఏవరూపం వా చీవరం చేతాపేత్వా అచ్ఛాదేహీ’’తి కల్యాణకమ్యతం ఉపాదాయ, నిస్సగ్గియం పాచిత్తియం.
దుతియఉపక్ఖటసిక్ఖాపదం
౯. భిక్ఖుం పనేవ ఉద్దిస్స ఉభిన్నం అఞ్ఞాతకానం గహపతీనం వా గహపతానీనం వా పచ్చేకచీవరచేతాపన్నాని ఉపక్ఖటాని హోన్తి ‘‘ఇమేహి మయం పచ్చేకచీవరచేతాపన్నేహి పచ్చేకచీవరాని చేతాపేత్వా ఇత్థన్నామం భిక్ఖుం చీవరేహి అచ్ఛాదేస్సామా’’తి, తత్ర చే సో భిక్ఖు పుబ్బే అప్పవారితో ఉపసఙ్కమిత్వా చీవరే వికప్పం ఆపజ్జేయ్య ‘‘సాధు వత మం ఆయస్మన్తో ఇమేహి పచ్చేకచీవరచేతాపన్నేహి ఏవరూపం వా ఏవరూపం వా చీవరం చేతాపేత్వా అచ్ఛాదేథ ఉభోవ సన్తా ఏకేనా’’తి కల్యాణకమ్యతం ఉపాదాయ, నిస్సగ్గియం పాచిత్తియం.
రాజసిక్ఖాపదం
౧౦. భిక్ఖుం పనేవ ఉద్దిస్స రాజా వా రాజభోగ్గో వా బ్రాహ్మణో వా గహపతికో వా దూతేన చీవరచేతాపన్నం పహిణేయ్య ‘‘ఇమినా చీవరచేతాపన్నేన చీవరం చేతాపేత్వా ఇత్థన్నామం భిక్ఖుం చీవరేన అచ్ఛాదేహీ’’తి. సో చే దూతో తం భిక్ఖుం ఉపసఙ్కమిత్వా ఏవం వదేయ్య ‘‘ఇదం ఖో, భన్తే, ఆయస్మన్తం ఉద్దిస్స చీవరచేతాపన్నం ఆభతం, పటిగ్గణ్హాతు ఆయస్మా చీవరచేతాపన్న’’న్తి. తేన భిక్ఖునా సో దూతో ఏవమస్స వచనీయో ‘‘న ఖో మయం, ఆవుసో, చీవరచేతాపన్నం పటిగ్గణ్హామ, చీవరఞ్చ ఖో మయం పటిగ్గణ్హామ కాలేన కప్పియ’’న్తి. సో చే దూతో తం భిక్ఖుం ఏవం వదేయ్య ‘‘అత్థి పనాయస్మతో కోచి వేయ్యావచ్చకరో’’తి. చీవరత్థికేన, భిక్ఖవే, భిక్ఖునా వేయ్యావచ్చకరో నిద్దిసితబ్బో ఆరామికో వా ఉపాసకో వా ‘‘ఏసో ఖో, ఆవుసో, భిక్ఖూనం వేయ్యావచ్చకరో’’తి. సో చే దూతో తం వేయ్యావచ్చకరం సఞ్ఞాపేత్వా తం భిక్ఖుం ఉపసఙ్కమిత్వా ఏవం వదేయ్య ‘‘యం ఖో, భన్తే, ఆయస్మా వేయ్యావచ్చకరం నిద్దిసి, సఞ్ఞత్తో సో మయా, ఉపసఙ్కమతాయస్మా కాలేన, చీవరేన తం అచ్ఛాదేస్సతీ’’తి. చీవరత్థికేన, భిక్ఖవే, భిక్ఖునా వేయ్యావచ్చకరో ఉపసఙ్కమిత్వా ద్వత్తిక్ఖత్తుం చోదేతబ్బో సారేతబ్బో ‘‘అత్థో మే, ఆవుసో, చీవరేనా’’తి, ద్వత్తిక్ఖత్తుం చోదయమానో సారయమానో తం చీవరం అభినిప్ఫాదేయ్య, ఇచ్చేతం కుసలం, నో చే అభినిప్ఫాదేయ్య, చతుక్ఖత్తుం పఞ్చక్ఖత్తుం ఛక్ఖత్తుపరమం తుణ్హీభూతేన ఉద్దిస్స ఠాతబ్బం, చతుక్ఖత్తుం పఞ్చక్ఖత్తుం ఛక్ఖత్తుపరమం తుణ్హీభూతో ఉద్దిస్స తిట్ఠమానో తం చీవరం అభినిప్ఫాదేయ్య, ఇచ్చేతం కుసలం, తతో చే ఉత్తరి వాయమమానో తం చీవరం అభినిప్ఫాదేయ్య, నిస్సగ్గియం పాచిత్తియం. నో చే అభినిప్ఫాదేయ్య, యతస్స చీవరచేతాపన్నం ఆభతం, తత్థ సామం వా గన్తబ్బం, దూతో వా పాహేతబ్బో ‘‘యం ఖో తుమ్హే ఆయస్మన్తో భిక్ఖుం ఉద్దిస్స చీవరచేతాపన్నం పహిణిత్థ, న తం తస్స భిక్ఖునో కిఞ్చి అత్థం అనుభోతి, యుఞ్జన్తాయస్మన్తో సకం, మా వో సకం వినస్సా’’తి, అయం తత్థ సామీచి.
కథినవగ్గో పఠమో.
కోసియసిక్ఖాపదం
౧౧. యో పన భిక్ఖు కోసియమిస్సకం సన్థతం కారాపేయ్య, నిస్సగ్గియం పాచిత్తియం.
సుద్ధకాళకసిక్ఖాపదం
౧౨. యో పన భిక్ఖు సుద్ధకాళకానం ఏళకలోమానం సన్థతం కారాపేయ్య, నిస్సగ్గియం పాచిత్తియం.
ద్వేభాగసిక్ఖాపదం
౧౩. నవం పన భిక్ఖునా సన్థతం కారయమానేన ద్వే భాగా సుద్ధకాళకానం ఏళకలోమానం ఆదాతబ్బా, తతియం ఓదాతానం, చతుత్థం గోచరియానం. అనాదా చే భిక్ఖు ద్వే భాగే సుద్ధకాళకానం ఏళకలోమానం, తతియం ఓదాతానం, చతుత్థం గోచరియానం, నవం సన్థతం కారాపేయ్య, నిస్సగ్గియం పాచిత్తియం.
ఛబ్బస్ససిక్ఖాపదం
౧౪. నవం పన భిక్ఖునా సన్థతం కారాపేత్వా ఛబ్బస్సాని ధారేతబ్బం, ఓరేన చే ఛన్నం వస్సానం తం సన్థతం విస్సజ్జేత్వా వా అవిస్సజ్జేత్వా వా అఞ్ఞం నవం సన్థతం కారాపేయ్య అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం.
నిసీదనసన్థతసిక్ఖాపదం
౧౫. నిసీదనసన్థతం పన భిక్ఖునా కారయమానేన పురాణసన్థతస్స సామన్తా సుగతవిదత్థి ఆదాతబ్బా దుబ్బణ్ణకరణాయ. అనాదా చే భిక్ఖు పురాణసన్థ తస్స సామన్తా సుగతవిదత్థిం, నవం నిసీదనసన్థతం కారాపేయ్య, నిస్సగ్గియం పాచిత్తియం.
ఏళకలోమసిక్ఖాపదం
౧౬. భిక్ఖునో పనేవ అద్ధానమగ్గప్పటిపన్నస్స ఏళకలోమాని ఉప్పజ్జేయ్యుం, ఆకఙ్ఖమానేన భిక్ఖునా పటిగ్గహేతబ్బాని, పటిగ్గహేత్వా తియోజనపరమం సహత్థా హరితబ్బాని అసన్తే హారకే. తతో చే ఉత్తరి హరేయ్య, అసన్తేపి హారకే, నిస్సగ్గియం పాచిత్తియం.
ఏళకలోమధోవాపనసిక్ఖాపదం
౧౭. యో పన భిక్ఖు అఞ్ఞాతికాయ భిక్ఖునియా ఏళకలోమాని ధోవాపేయ్య వా రజాపేయ్య వా విజటాపేయ్య వా, నిస్సగ్గియం పాచిత్తియం.
రూపియసిక్ఖాపదం
౧౮. యో పన భిక్ఖు జాతరూపరజతం ఉగ్గణ్హేయ్య వా ఉగ్గణ్హాపేయ్య వా ఉపనిక్ఖిత్తం వా సాదియేయ్య, నిస్సగ్గియం పాచిత్తియం.
రూపియసంవోహారసిక్ఖాపదం
౧౯. యో పన భిక్ఖు నానప్పకారకం రూపియసంవోహారం సమాపజ్జేయ్య, నిస్సగ్గియం పాచిత్తియం.
కయవిక్కయసిక్ఖాపదం
౨౦. యో పన భిక్ఖు నానప్పకారకం కయవిక్కయం సమాపజ్జేయ్య, నిస్సగ్గియం పాచిత్తియం.
కోసియవగ్గో దుతియో.
పత్తసిక్ఖాపదం
౨౧. దసాహపరమం అతిరేకపత్తో ధారేతబ్బో, తం అతిక్కామయతో నిస్సగ్గియం పాచిత్తియం.
ఊనపఞ్చబన్ధనసిక్ఖాపదం
౨౨. యో పన భిక్ఖు ఊనపఞ్చబన్ధనేన పత్తేన అఞ్ఞం నవం పత్తం చేతాపేయ్య, నిస్సగ్గియం పాచిత్తియం. తేన భిక్ఖునా సో పత్తో భిక్ఖుపరిసాయ నిస్సజ్జితబ్బో, యో చ తస్సా భిక్ఖుపరిసాయ పత్తపరియన్తో, సో తస్స భిక్ఖునో పదాతబ్బో ‘‘అయం తే భిక్ఖు పత్తో యావ భేదనాయ ధారేతబ్బో’’తి, అయం తత్థ సామీచి.
భేసజ్జసిక్ఖాపదం
౨౩. యాని ఖో పన తాని గిలానానం భిక్ఖూనం పటిసాయనీయాని భేసజ్జాని, సేయ్యథిదం – సప్పి నవనీతం తేలం మధు ఫాణితం, తాని పటిగ్గహేత్వా సత్తాహపరమం సన్నిధికారకం పరిభుఞ్జితబ్బాని, తం అతిక్కామయతో నిస్సగ్గియం పాచిత్తియం.
వస్సికసాటికసిక్ఖాపదం
౨౪. ‘‘మాసో సేసో గిమ్హాన’’న్తి భిక్ఖునా వస్సికసాటికచీవరం పరియేసితబ్బం, ‘‘అద్ధమాసో సేసో గిమ్హాన’’న్తి కత్వా నివాసేతబ్బం. ఓరేన చే ‘‘మాసో సేసో గిమ్హాన’’న్తి వస్సికసాటికచీవరం పరియేసేయ్య, ఓరేన‘‘ద్ధమాసో సేసో గిమ్హాన’’న్తి కత్వా నివాసేయ్య, నిస్సగ్గియం పాచిత్తియం.
చీవరఅచ్ఛిన్దనసిక్ఖాపదం
౨౫. యో పన భిక్ఖు భిక్ఖుస్స సామం చీవరం దత్వా కుపితో అనత్తమనో అచ్ఛిన్దేయ్య వా అచ్ఛిన్దాపేయ్య వా, నిస్సగ్గియం పాచిత్తియం.
సుత్తవిఞ్ఞత్తిసిక్ఖాపదం
౨౬. యో పన భిక్ఖు సామం సుత్తం విఞ్ఞాపేత్వా తన్తవాయేహి చీవరం వాయాపేయ్య, నిస్సగ్గియం పాచిత్తియం.
మహాపేసకారసిక్ఖాపదం
౨౭. భిక్ఖుం పనేవ ఉద్దిస్స అఞ్ఞాతకో గహపతి వా గహపతానీ వా తన్తవాయేహి చీవరం వాయాపేయ్య, తత్ర చే సో భిక్ఖు పుబ్బే అప్పవారితో తన్తవాయే ఉపసఙ్కమిత్వా చీవరే వికప్పం ఆపజ్జేయ్య ‘‘ఇదం ఖో, ఆవుసో, చీవరం మం ఉద్దిస్స వియ్యతి, ఆయతఞ్చ కరోథ, విత్థతఞ్చ, అప్పితఞ్చ, సువీతఞ్చ, సుప్పవాయితఞ్చ, సువిలేఖితఞ్చ, సువితచ్ఛితఞ్చ కరోథ, అప్పేవ నామ మయమ్పి ఆయస్మన్తానం కిఞ్చిమత్తం అనుపదజ్జేయ్యామా’’తి. ఏవఞ్చ సో భిక్ఖు వత్వా కిఞ్చిమత్తం అనుపదజ్జేయ్య అన్తమసో పిణ్డపాతమత్తమ్పి, నిస్సగ్గియం పాచిత్తియం.
అచ్చేకచీవరసిక్ఖాపదం
౨౮. దసాహానాగతం కత్తికతేమాసికపుణ్ణమం భిక్ఖునో పనేవ అచ్చేకచీవరం ఉప్పజ్జేయ్య, అచ్చేకం మఞ్ఞమానేన భిక్ఖునా పటిగ్గహేతబ్బం, పటిగ్గహేత్వా యావ చీవరకాలసమయం నిక్ఖిపితబ్బం. తతో చే ఉత్తరి నిక్ఖిపేయ్య, నిస్సగ్గియం పాచిత్తియం.
సాసఙ్కసిక్ఖాపదం
౨౯. ఉపవస్సం ఖో పన కత్తికపుణ్ణమం యాని ఖో పన తాని ఆరఞ్ఞకాని సేనాసనాని సాసఙ్కసమ్మతాని సప్పటిభయాని, తథారూపేసు భిక్ఖు సేనాసనేసు విహరన్తో ఆకఙ్ఖమానో తిణ్ణం చీవరానం అఞ్ఞతరం చీవరం అన్తరఘరే నిక్ఖిపేయ్య, సియా చ తస్స భిక్ఖునో కోచిదేవ పచ్చయో తేన చీవరేన విప్పవాసాయ, ఛారత్తపరమం తేన భిక్ఖునా తేన చీవరేన విప్పవసితబ్బం. తతో చే ఉత్తరి విప్పవసేయ్య అఞ్ఞత్ర భిక్ఖుసమ్ముతియా, నిస్సగ్గియం పాచిత్తియం.
పరిణతసిక్ఖాపదం
౩౦. యో పన భిక్ఖు జానం సఙ్ఘికం లాభం పరిణతం అత్తనో పరిణామేయ్య, నిస్సగ్గియం పాచిత్తియం.
పత్తవగ్గో తతియో.
ఉద్దిట్ఠా ఖో ఆయస్మన్తో తింస నిస్సగ్గియా పాచిత్తియా ధమ్మా. తత్థాయస్మన్తే పుచ్ఛామి, కచ్చిత్థ పరిసుద్ధా, దుతియమ్పి పుచ్ఛామి, కచ్చిత్థ పరిసుద్ధా, తతియమ్పి పుచ్ఛామి, కచ్చిత్థ పరిసుద్ధా, పరిసుద్ధేత్థాయస్మన్తో, తస్మా తుణ్హీ, ఏవమేతం ధారయామీతి.
నిస్సగ్గియపాచిత్తియా నిట్ఠితా.
సుద్ధపాచిత్తియా
ఇమే ఖో పనాయస్మన్తో ద్వేనవుతి పాచిత్తియా
ధమ్మా ఉద్దేసం ఆగచ్ఛన్తి.
ముసావాదసిక్ఖాపదం
౧. సమ్పజానముసావాదే పాచిత్తియం.
ఓమసవాదసిక్ఖాపదం
౨. ఓమసవాదే పాచిత్తియం.
పేసుఞ్ఞసిక్ఖాపదం
౩. భిక్ఖుపేసుఞ్ఞే పాచిత్తియం.
పదసోధమ్మసిక్ఖాపదం
౪. యో పన భిక్ఖు అనుపసమ్పన్నం పదసో ధమ్మం వాచేయ్య, పాచిత్తియం.
పఠమసహసేయ్యసిక్ఖాపదం
౫. యో పన భిక్ఖు అనుపసమ్పన్నేన ఉత్తరిదిరత్తతిరత్తం సహసేయ్యం కప్పేయ్య, పాచిత్తియం.