౧-౧౦. సమ్బాధసుత్తాదివణ్ణనా

౪౨-౫౧. పఞ్చమస్స పఠమే ఉదాయీతి తయో థేరా ఉదాయీ నామ కాళుదాయీ, లాళుదాయీ, మహాఉదాయీతి, ఇధ కాళుదాయీ అధిప్పేతోతి ఆహ ‘‘ఉదాయీతి కాళుదాయిత్థేరో’’తి. సమ్బాధేతి సమ్పీళితతణ్హాసంకిలేసాదినా సఉప్పీళనతాయ పరమసమ్బాధే. అతివియ సఙ్కరట్ఠానభూతో హి నీవరణసమ్బాధో అధిప్పేతో. ఓకాసోతి ఝానస్సేతం నామం. నీవరణసమ్బాధాభావేన హి ఝానం ఇధ ‘‘ఓకాసో’’తి వుత్తం. పటిలీననిసభోతి వా పటిలీనో హుత్వా సేట్ఠో, పటిలీనానం వా సేట్ఠోతి పటిలీననిసభో. పటిలీనా నామ పహీనమానా వుచ్చన్తి మానుస్సయవసేన ఉణ్ణతాభావతో. యథాహ ‘‘కథఞ్చ, భిక్ఖవే, భిక్ఖు పటిలీనో హోతి? ఇధ, భిక్ఖవే, భిక్ఖునో అస్మిమానో పహీనో హోతి ఉచ్ఛిన్నమూలో తాలావత్థుకతో అనభావంగతో ఆయతిం అనుప్పాదధమ్మో’’తి (అ. ని. ౪.౩౮; మహాని. ౮౭). సేసం సబ్బత్థ ఉత్తానమేవ.

సమ్బాధసుత్తాదివణ్ణనా నిట్ఠితా.

ఇతి మనోరథపూరణియా అఙ్గుత్తరనికాయ-అట్ఠకథాయ

నవకనిపాతవణ్ణనాయ అనుత్తానత్థదీపనా సమత్తా.